انا تعملت مع محلات الجمله سعوديين ويمنيين وهنود وباكستانين ومصريين ..

كانت بدايتي بـ اجهزة الكمبيوتر .. قبل 3 سنوات كنت انزل بضاعه بالاجل فوق السبعين الف ريال ..

كنت متعامل مع شركه تنزل لي لاب توبات وطابعات واحبار بس صاحب الشركه جدد الموظفين وغير نظام الشركه اضطريت اني اوقف تعامل معه بسبب انه اختصر نشاطه وصار يضغط علينا من حيث الدفعات ورفع الاسعار بالعربي جاب العيد في عمره..

الحين انزل للسوق مره في الشهر واشتري كاش والمندوبين اتعامل معهم بالاجل .. طبعا سوق الكمبيوتر مثل ماانتم عارفين النشاط صار وقت المدارس ودخلت هالشركات الكبيره مثل جرير واكسترا وصارت المنافسه قويه .. فحبيت اقلل المخاطره ..

طبعاً في بدايتي كنت اجلس في محلات الجمله واقارن الاسعار قبل لا اشتري من اي محل
وكنت فاهم وش اشتري ومسجل الاغراض بورقه واكتب سعرها من عند المندوب وعند كذا محل وكان هالشيء متعب لي لكن كان فيه متعه لاني كنت اسولف معهم قبل لا اشتري منهم وماكانت تفرق معي جنسية البائع

من حيث المفروشات ولي خبره بسيطه فيها بحكم معرفتي ببعص اصحاب المجال ..

المفروشات تقدر تنزل بالاجل وتتعامل مع الشركات فقط الي بينكم يكون عقود مصدقه من الغرفه التجاريه مثل شركة السريع وغيرها ..


السباكه والكهرباء على قولة واحد شغال فيها محلات الجمله تتعامل مع الجن بس انت تشتري منهم


طبعاً فيه قصص شفتها بعيني لـ اجانب نزلوا بضاعه بالاجل لسعوديين والسعوديين رفضوا يدفعون وقالوا لهم مالكم شيء وايضاً فيه مصري لهف بضاعه على محلات اخذها بالاجل وصرفها وسافر لديرته

محلات الجمله تخاف تتعامل معك اول مره بس اذا شافوك تسولف مع احد المحلات المجاوره لهم وعلى قولتهم طاق حنك يرتاحون لك او يطقهم حسد وزي كذا


فيه نقطه مهمه بخصوص شراء الجمله احب اوضحها

محل الجمله مايستورد كل شيء يستورد انواع معينه والباقي يشتريه من محلات جملة الجمله فيه اشياء بتحصلها رخيصه عنده واشياء غاليه بتحصلها رخيصه عند غيره علشان كذا انصح بالورقه والقلم ..