السلام عليكم
انا امس الاربعاء 7/1/2015 اختبرت كان الاختبار من 12 ونص الى 4
طبعا يعطوك تعليمات ووميزات البرنامج :
1/ الدراسة باللغة الانجليزية
2/ تحصل على شهادتين
3/ مكافأة للبكالوريوس 4500 والدبلوم 3500 او 3000 مو متاكدة
في شغله هم قالوا عليها وهي انو تم استحداثها للدفعة هذي وهي انو بعد الانتهاء من البرنامج تدخل في نظام مو فاهمة اسمه بس سعودي بروقرام شي زي كذا ويكون تستلم فيه راتب مابين 12-13 الف خلال سنة كاملة
بس الي مافهمته استلم الراتب وانا اشتغل عندهم ولا من دون شغل .

في نقطة مهمة الي هي هل بعد البرنامج في توظيف او لا ؟ هذا السؤال ما عطونا في عقاد نافع بمعنى انو على حسب الشواغر وحسب مهاراتك و ....

وعشان يحمسونا عرضوا صورة المبنى الجديد الي لهم كان شبة مدينة طبية ماشاء الله كبير
اسال الله ان يكون التوظيف فيه بكل مصداقية وشفافية وهذا الشي يحمس انو في شواغر باذن الله
عرضوا المواد الي سوف يتم دراستها والخطة الزمنية للبرنامج وقالوا حيكون سنة و 3 شهور تقريبا ويكون بنفس مستشفى الملك فيصل التخصصي بجدة .

الاختبار يبدأ 1/ بالاستماع ( ليسنييق ) تقرا كل فقرة ويكون عليها مقطع صوتي و وووواضح المقطع وسهل ماشاء الله بس ركزو على اساس تضمن الدرجة .
في نقطة في الليسنق يكون بالتدريج السماع في البداية يكون مقطع صوتي تسمعه تجاوب على فقرة وحدة وبعد كدا مقطع صوتي تجاوب بعده على فقرتين وبعد كدا مقطع صوتي تجاوب فيه على 4 فقرات فتركز وتقرا كل الفقرات .


2/ يعطوك دفتر كلو قرامر وريدنق تحلها خلال ساعة فقط

نصيحة ابدأ اولا بالقرامر لانو تجمع فيها درجات وتضمنها اكتر من الريدنق
الريدنق جا 4 صفحات يتدرج من السهل للصعب بس حلوه وواضحة طبعا انا 3 صفحات فوتها وحدت اجابتي فيها
مااااافي وقت ابدن عشان كذا حاولوا تبداو بالقرامر وتخلصوها ب ربع ساعه او 10 دقايق مو اكتر وبعد كذا الريدنق ساعة الا ربع عشان يمديكم .

مررررا قهروني كيف نقرا دا كلو ونحله بساعة

القرامر ذاكروا تصريف الافعال بجيمع الازمنة
متى نستخدم at - in -on وكذا جاني سؤال عن اسم شارع street حطيت at

ذاكروا Model verb و Adv , Ajv جات بالاختبار
و جاء there are , thier وكذا متى تستخدم

where is it ? او where it is حاجة زي كدا انو وسط جملة انو احد بيدور على حاجة ضايعة وبعدين ايش يقول ودي الخيارات

جاني برضو more , the most وهكذا
قاعدة if جات
المهم القرامر كان اساسيات اللغة وجميله ويحتاج لها مذاكرة او مراجعه عشان تجاوب صح وتضمنوا درجات .

بعد الساعة مانتهت بكل سررررعة سحبوا ورق الاسئلة وبدينا في التعبير لمدة ثلث ساعة
جاني تعبير عن الانترنت وايجابياته وسلبياته تكتب 15 سطر او 150 كلمة .
اهم شي راعوا استخدام فوكاب سليمة وقرامر سليم ومتنوع و راعوا قواعد الكتابة السليمة

اخيرا : قالوا مافي درجة نجاح تخيلوووو وانو حياخذوا اعلى الدرجات .

اسال الله لي ولكم التوفيق والنجاح
انا حقيقي نفسي فيه حسيتوا شي محرز كدراسة مرتبة وبالانقليش و شهادة من كندا وكدا حتى لو مايبوا يوظفوني عادي
لانها اعتبرها فرصة للي سمح لهم بدخول الاختبار شي ايجابي وغير كدا نعتبرها منحة داخلية كانك برا تدرس بس ببلدك ومع اهلك وفرصة ممتاز لتطوير مهاراتك وتعلم شي مفيد وجديد وبناء علاقات ممتازة بالمستشفى .