الله بوفقك ويرزقك من حيث لا تحتسب أخوي انا كان عندي بوفيه وبعطيك بعض النصائح
اول شيء لا يكون بالرخصة بوفيه لان البوفيه فيها فيزه عامل واحد فقط اما المطعم تقدر تأخذ أكثر على حسب المساحة.
اما المعدات خذها مستعملة انا ما أدرى انت من وين لكن انا اخذتها من حراج الدمام كانت جودتها ممتازة وسعرها ممتاز بعد.
بالنسبة للأكل الدجاج تأخذه من سوق الجملة الثلاجات اما بالنسبة للخلطات النت ما خلى شيء حاول تتميز بخلطة خاصة فيك عن باقي البوفيات وانصحك لا تفكر بالرخيص بقدر الطعم عندك مثلا الشاي فيه انواع كثيرة رخيصة جدا يعني مربخك عالي لكن الزبون ما راح يجيلك مرة ثانية والاجبان والكاتشب كذلك على سبيل المثال لا الحصر.
اما بالنسبة للعمال انتبه ثم انتبه انك تجيب عمال موب على كفالتك لأنك ما راح تسيطر عليهم مثلا بعد ما تمشي امورك يقولك تزيدني ولا امشي وهذا اكثر شيء بتقوله يرحم والديك اقعد ليه تترجاه لان العمال شحيحين وجدا لا تقول اشوفهم واجد لو بغيتهم ما تحصلهم ، والشي الثاني لو جوك البلدية وقالوا سوء نظافة بالمحل يعطونك غرامة وانت بدفعها لأنك لو خصمتها عليه بمشي ويخليك اما اذا صار على كفالتكبتخصمها منه ومرة ثانية يحرص اكثر ، وفيه شغلة مهمه اذا العامل على كفالتك بتعطيه راتب بسيط اما اذا موب على كفالتك يأخذ راتب عالي جدا
اما بالنسبة من وين تجيب العمال رح مكاتب الاستقدام وتقولهم ابي عمال اشتغلوا بمطاعم واحرص انهم يعرفون عربي لو واحد على الأقل انصحك بالأسيوي الهند والفلبيني والبنجالية وانحش من العرب لأنهم أكثر مشاكل ورواتبهم اعلى
وفي شغلة مهمه جدا هي بتكلفك لكن بحتميك من سرقه العمال الي هي برنامج المحاسبة حتى يحسب كل صغيرة وكبيرة عندك بالبوفيه والشي الثاني الكاميرات اذكر واحد من الشباب كان عنده مطعم مشويات وكان يشوف في زبائن واذا حاسب العامل يقول يعطيه شيء بسيط لدرجة انه كان ناوي يقفل المحل فقال لازم اجلس بالمحل وانا احاسب الزبائن وشاف الوضع طيب والرجال وسع المحل لكن مهما يكون ما راح تقدر تجلس بالمحل يومك كله فجرب الكاميرات وبرامج المحاسبة بعدها صار يتابع العمال من بعيد يدخل الموقع حق شركه الكاميرات وفيه مباشر وفيه تسجيل والحمد الله الان الرجال فتح فرع ثاني