ي بعد عمري والله
الاخوان والاخوات هنا ماقصروا

اولاً / قولي دايم ان اللي حصلتس خيره
ثانياً / الاهل المفروض يوقفون معتس بالنهايه انتي بنتهم
ماهيب مشكلتس ان اللي تزوجتيه يصعب عليه القول انه انسان
ثالثاً / الله يخلي لتس ولدتس وتبلغين فيه وتسندين نفستس عليه
ويشيلتس بعيونه ويبر فيتس

رابعاً والاهم / لاتخلين الولد عائق
ولا الاهل ، ودام الكل متخلي .. انتي ابتدي حياتس من جديد
الزواج ماهو بكل شي ولاعمره كان حل للمشاكل

ابتدي حياتس من جديد
وقدمي ع كل شي ولاتستهينين بأي وظيفه ، حتى وان كان مدخولها عليتس شي بسيط
ع الاقل الدخل البسيط اذا جمعتيه كثر
والدخل البسيط يغنيتس ويغني ولدتس عن السؤال ،، وماتحتاجين احد

وحالياً لاتفكرين بالزواج ابداً .. حتى وان كنتي صغيره وفرصة الزواج عندتس كثيره
لكن لو حصل وولدتس يكون معتس زين ع زين
ولو الرجال مايبي ولدتس ، انتي لا تبينه

ودايم رددي هذا الدعاء
( لا اله الا انت سبحانك اني كنت من الظالمين )
واكثري من الاستغفار ..

ونصيحه مني لتس ،، ولدتس محتاجتس
اسعدي نفستس واحرصي ع هالشي ، لان الغير لو اسعدتس اليوم
ماراح يسعدتس بكرا ..
اسعدي نفستس وابعدي عنتس اي شي يكدر سعادتس
وحطي في بالتس ان ولدتس اهم شي وهو اللي طلعتي به بالدنيا
وهو اللي يستحق انتس تعيشين علشانه
وان شاءالله لما يكبر يقدر اللي سويتيه لاجله ، ويبر فيتس ويعوضتس


والله يوفقتس ويسعدتس
ويسهل امورتس ويسخر لتس خلقه ي رب