فرفوشة ترى جالسة اكتب والله من قبل تطلبيني قلت بحط التفاصيل اللي صارت معي عشان اللي ودها تعرف ..

قدمت نهاية شهر 8 عن طريق اعلان وصلني وكان فيه ايميل ماكان ايميل رسمي لان الاعلان اقتصر على جهة حكومية بدون ذكر اسمها ، رسلت شهادتي ودوراتي والخبرة والهوية .
واتصلوا فيني بداية شهر رمضان رحت للمقابلة في الرياض وقالوا انتظري الرد
كلموني نهاية شهر 4 ورحت وقعت العقد واخذت الكشف الطبي

العقد من صفحتين كان مكتوب فيه فقط بدل المواصلات 700 ريال وماكان مكتوب الوظيفة ولا المرتبة ولا الراتب الأساسي ولا التاريخ ، تاركين الخانات فاضية سألت المديرة وكانت متجاوبة للأمانة معي الله يسعدها . قلت ليه ؟ قالت الوكيل هو اللي يقرر المسمى الوظيفي والمرتبة وبناء عليه يتحدد الراتب الأساسي . مدة العقد مكتوب سنة ويتجدد اذا كانت الموظفة محافظة على سرية المعلومات ومنضبطة في عملها وتأدي المطلوب منها سألتها بس سنة ؟ قالت يتجدد سنويًا لا تقلقين من هالناحية اذا كنتي منضبطة يستمر العقد واذا اثبتي نفسك تتثبتن والتثبيت ماندري بعد شهرين ، شهر ، اسبوع ، سنة ، سنتين أو أكثر .... ، و محد يدري متى قرارات التثبيت تنزل . بس فهمت من كلامها ان موضوع العقد مايقلق ولايخوف حتى لو طول التثبيت سنين مدام انتي منضبطة و انو غالبًا الحمدلله في تثبيت و أن شاء الله مايطول ، انا بصراحه سمعت كثير يقولون قبل السنة فيه تثبيت ، دعواتكم ..

تفاصيل العقد الباقي عادية تتكلم عن الانضباط و الإجازات نسيتها للأمانة . و وقعت وطلبت مني ان ما اكتب التاريخ . اظن عشان الراتب لان مفروض من تاريخ العقد ينصرف لي راتب .

بالإضافة للعقد كان فيه الكشف الطبي ، الكشف الطبي مكتوب فيه اسم المستشفى وهو يكون مستشفى حكومي و حسب مدينتك ومايطول اليوم الثاني تطلع نتائج الكشف اللي هو كان تحليل البول "تكرمون" وختم من مركز الدرن والأمراض الصدرية .
اللي من جدة غالبًا في مستشفى مدائن الفهد بس مركز الدرن تروحين له بالأول ، أنا بالفرع ماقالوا لي هالشغلة رحت المستشفى وقالوا بالأول اختميها من مركز الدرن ، ختمتها ورجعت للمستشفى بسرعة اسوي التحليل . نصيحة قبل 11 تكونين في المستشفى تسوين التحليل لان عينات التحليل تطلع لمركز السموم يوميا في وقت واحد فقط اللي هو الساعة 12 الظهر ، عشان يفحصون العينة ويرسلون النتيجة للمستشفى صباح اليوم الثاني ويختمونها بنفس اللحظة المستشفى وتستلمين ورقة الكشف الطبي في نفس اللحظة بعد .
أنا تأخرت جيت 12 وقالوا خلاص طلعت العينات ماعاد يمدي بس بكرة الساعة 12 نرسلها لمركز السموم
ومن بكره رسلوها الساعة 12 واخوي راح على مركز السموم على طول وحاول معهم واستعجلهم واخذ نتيجة التحليل وطلع على المستشفى قبل ينتهي الدوام المستشفى وختموها لي وطلعت على الفرع ولحقت عليهم نهاية الدوام. عشان كذا بدال المرمطة اطلعي الصبح بدري

المهم اعطيتهم النتيجة وقالت انتظري اتصال بالمباشرة ..

كنت كل فترة اتصل وابثرهم واسأل متى المباشرة ، يقولون الوكيل للحين ماوقع العقود ، وبعد شهر ونص تقريبًا اتصلوا فيني الاشراف النسوي بالرياض يوم الاربعاء اللي طاف يبلغوني أن الأحد دوامي 6/16

وهذي تفاصيل التفاصيل وأي سؤال أنا حاضرة أبد لاتشيلين هم اسألي باللي في خاطرك ولو عندي اجابة اكيدة تأكدي بجاوبك والله يطمن قلوبكم يارب