المشاركة الأصلية كتبت بواسطة يادافع البلاا

بسم الله

بقولك شغله ومن تجربة

رحت للأمام 3 مرات تم رفضي بحجه المعدل جيد مع أني صديقتي تم قبولها وهي مقبول قلناحظ ونصيب وتصير

المره الثالثه قلت وش الدبلومات المتوفره غير التربوي قالو توجيه قلت دخلوني

درسته بعد ماخلصته قدمت تربوي وكان فيه مجال للجيد لدخول وطبعا منحه من الملك أبناء الضمان ما يدفعون الحمدلله والله يجعلها في ميزان حسناته يعنى لو ماكان فيه مكرمه ومنح تعليميه ما دخلت لا التربوي ولا التوجيه بس ربي كتب لي

المهم وقت التربوي الترم الأول جا اختبار قياس كنت أراجع معكم ترى يابنات التاريخ بالتجمع وجبت كتب وصرت اخصص وقت للمذاكرة لقياس

المهم جا يوم الأختبار فتحت الأسالة وبققت عيوني وأطالع ليكون ورقة غير تأكدت أنها لتخصصي التاريخ

راسي صدع ربطته بطرحه لأني من الأساله أنهرت قمت أختار عشوائي وربي يشهد علي وحدت الأجابات وطلعت من اللجنه متأكده من عشر أجابات فقط الباقي حقره بقره

جيت لأمي اللي دوم تدعي لي بالتوفيق قالت كيف قلت على الله كل شي

يوم طلعت النتيجه كنت مو متحمسه ومابي انصدم وكنت بمحل أييكيا مع أخوي وأختي طلبت من صديقتي تشوف النتيجه طبعا صديقتي قفلت ودقت وقالت الف الف مبروك نجحتي مدري وش كان شعوري تتكلمي جد ولا تمزحين أحلفي وتحلف كان أخوي بيكفخني قصري حسك وأنا أصارخ معقوله نجحت حتى ماصدقتها بس رجعت البيت تأكدت بنفسي

بعدها قلت بس الوظيفه عند الباب وليومك ذا وأنا غاسله يدي

وأيقنت ان التوفيق بيد الله واللي كاتبه ربي بيصير لي

التربويه ماراح تاخذ رزق الغير تربويه والعكس برضو

تخيلي يا مواهب صديقتي من الأوائل بجامعه سعود ودرست مباشرة تربوي بعد ماتخرجت تربوي وصارت أدارية لأنها مو مجتازه قياس وكانت من البديلات

هنا نعرف أن مقسم الأرزاق ربي

والله يكتب لي ولكم الوظيفه اللى تتمنونها

والحمدلله أولا وأخيرا أنا في نعمه ماكلين شاربين نايمين وبأمان وعافيه هاذي أكبر شي بالحياة وأهم من الوظيفه

قلت تجربتي لكم علشان تخففون من أحساسكم السلبي وأعرفو لو لكم رزق والله لتأخذونه

طولت عليكم بس قلت أذكرها لكم علشان توكلون أمركم لله وتحمدون الله على كل شي