نصيحتي لك وبكل أمانه ان هالاعمال هذي لا تسمن ولا تغني من جوع .. تحديث حافز او عروض باوربوينت او اكسل واداره حسابات تويتر .. ما اعتقد ان فيه احد بيتعامل معك لانها بدائيه والكل يقدر يسويها او يروح لاقرب مكتبه ويخلصها بدقايق بسعر رخيص , ولو فرضا لقيتي احد تتعاملي معاه ماراح يعطيك الا عشره او عشرين ريـال فقط ! وشغل التسويق لو فيه خير كان ماشفتي الجرايد مليااااااانه اعلانات بالهبل عن مسوقين لانهم مو لاقين ريال واحد وشغله تتعب وتجيب المرض والله وكلها مشاكل

اختي اذا انتي صغيره وعمرك ماتعدى الـ 18 و تحسي انو عندك (طاقه) وتحسي فيها بداخك ونفسك تستغليها بحاجه كويسه .. انصحك والله انك تشتغلي على تطوير نفسك لانها راح تنفعك بعد التخرج من الثانوي ...

على سبيل المثال : اذا تحبي تبدأي بحقظ القران واستمريتي بدون انقطاع انا اضمن لك بعد الله راح تختميه في اقل من سنتين , وما اجمل انو الانسان يحفظ كلام الله ويكون هو الشفيع له يوم القيامه ويفتح ابواب رزق و خير كثيره عليك وانا اعرف معلمات في دور تحفيظ ماعندهم شهاده متوسط لكن حافظين القران وماشاء الله رواتبهم حول الـ 4 الاف ودوام مريح خمس ساعات باليوم وفوق هذا تكسبي اجر تعليم القران للبنات الصغار هذا غير الاجر والدعوات اللي بتجيك من الكل .. والوظيفه مضمونه بأذن الله اذا مالك رغبه تكملي الجامعه .

او اذا مالك رغبه بكل الكلام اللي كتبته فوق .. تقدري مثلا تطوري من نفسك وتبدأي تتعلمي اساسيات اللغه الانجليزيه في البيت ( لان افضل معلم لك هو نفسك ) وشوي شوي راح تتفاجئي ان مستواك تحسن وصرتي تقدري تتكلمي وتكوني جمل وتفهمي المحادثات اللي بالافلام وهذي بحد ذاتها انجاز مو بسيط للي يتعلمها بنفسه وانتبهي تخسري فلوسك على دورات او معاهد كلها نصب في نصب وهمهم الفلوس فقط لاغير , واذا تمكنتي من اللغه وتطور مستواك بإمكانك العمل مدربه لغه بشهاده الثانويه العامه في معاهد اللغه الخاصه أو تقدمي دروس خصوصيه لطالبات المتوسط والثانوي وحتى بنات الجامعه مستقبلا ..

البدايه دائما صعبه وممله .. بس النهايه بتكون سعيده وفيها خير لك بأذن الله .. والمعذره على الاطاله