فمان الله ما جاني من احساس المحبة كود
بعيد الذكريات اللي تتل القلب وتجرّه

مدام ان الزمن قفّا بزينك يا نحيل العود
ربيع العمر خليته صحاري جرْد مصفرّه

وتركت الحب بين أمرين لا ضايع ولا موجود
اشوف الآوله مره .. واشوف الثانيه مره

فلا تطرد ورى قلبٍ تحدّه عن لقاك احدود
يحاول بس أحلامه تلاشت وأنتهت حسره

عزيز النفس ما يقبل محبة بابها مسدود
ولا يمشي على دربٍ يذل الراس ويضره

شقا عمر الوفا يجني حسافة جهده المحصود
وعطيب الجرح ياخذ له على ديار الغلا فرّه

تعبت أسأل وش أهدافك وأدوّر كنزك المفقود
ألين إني اكتشفت اللي وراك وظهر سِرّه

وش أبغى في غلاك اللي يجي لاشافني موجود ؟!
أنا قلبي مهو لعبة .. حسب رغباتك تفرّه

غلاك وحبك الوهمي تراه إليا وصل مردود
معاد أبغاه لا والله وفك القلب من شرّه

أنا قلبي عليك أبعد من إحساس الغلا المقصود
ولا يخطر على بالك كلمة حبٍ اتغرّه

حسافه حب ربيته على حضن الأمل مولود
نسى فضل الحبيب اللي توفّى وما لحق بِرّه

فمان الله خذ وردك وشعرك والعطر والعود
ولا يبقى لك بقلبي علامه وامسح الجره