المشاركة الأصلية كتبت بواسطة وحيدة بمشاعري

ياااي احس كانه حلم .... الله يتمم لكم على خير يارب ...
طبعا انا تعينت العام لله الحمد .. تعينت في الاحساء مدينة ماعمري زرتها ...كنت وقت التقديم متمللة من كل شيء حولي عمري راح وانا انتظر التعيين سنة وراء سنة ... وضاقت فيني الدنيا خواتي الي اصغر مني والي اكبر كلهم توظفوا وتزوجوا ... ومافيه الا انا بالبيت مقابلة الجدران خخخخ ... المهم وقتها ضاقت فيني الدنيا وكلمت اخوي وقلت له ان التقديم فتح قالي قدمي في مناطق كثير .. المشكلة ان ما عندي احد اذا تغربت يروح معي حتى اخوي ذا وقتها كان شهر ويطلع على امريكا T_T
المهم استخرت ربي وقدمت .. وفي شهر 10 اذكر وانا نايمة الضهر خخخ وتجيني رسالة ثم رسالة ثانية و انا الي ارفع راسي واناظر الرسالة الى وهي من الخدمة المدنية بضرورة المطابقة ... المهم اني رميت الجوال وكملتها نومة خخخخ
ثم بعدين قمت واكلم خواتي اني تعينت واكلم اخوي ... المهم هنا شلت هم نفسي كيف راح ادبر نفسي وكيف وانا مامعي احد .. بس قلت يااارب .. وما خاب من قال ربي .
سبحان الله الي سخر لي عباده في تيسير امري كله ... المهم وداني اخوي لللاحساء واخذنا شقة مفروشة وكنت انتظر المقابلة .. ورحت المقابلة كانت جددددا عادية بالنسبة لي قابلتني وحدة الله يسعدها قالت عرفي عن نفسك وخبراتك واخر اعمالك ..بعد ماتكلمت عن نفسي قالت لي ماتحتاجين انتي مقابلة الله يسعدها يارب ذيك الانسانة . المهم بعد ماخلصت المقابلة كنا نروح يوميا لنفس المكان الي اجريت فيه المقابلة ونوقع حضور لحين صدور قرار التعيين والتوجيه للمدارس .
في ذا الوقت فتحنا موضوع في نفس منتدى حلول البطالة عن متعينات الاحساء وتجمعنا كل المتعينات ثم بعد ذلك فتحنا قروبات واتس اب عشان تواصلنا يكون مع بعض على طول .. وكنا نعطي علومنا لبعض ثم بعد ذلك تعرفنا على بعض في مكاتب التوجيه وسبحان الله الي يسر لي امري واتعرف على معلمات منهم ونتجمع ونسكن مع بعض في شقة ... ثم صدرت قرارات التوجيه للمدارس وبعدها توجهنا للمدارس من الصباح الباكر كمعلمات خخخخ .
لله الحمد الي ييسر الامور وتصير كانها حلم بالنسبة لك ... اول سنة اعرفي انك راح تواجهي صعوبات كثيرررة وعقبات لكن تعلمي كيف تتخطينها بنجاح ... وكوني فطنة ومتنبه لكل شيء حولك يدور في المدرسة من اول ماتدخلين لحد ماتطلعين .. شوفي الجدول الي راح يعطونك وجدول باقي المعلمات شوفي المهام الموكلة لك ..والى راح يرمون كل شيء عليك ويثقلون كاهلك بالجدول لذلك تنبهي عزيزتي .
ملاحظة جدااا مهمة ... اذا رحتي للمدرسة اطلبي منهم انك تشوفين قرار تعيينك وتوجيهك للمدرسة ثم صورية واحتفظي منه بنسخ عديدة لانك راحح تحتاجينة كثيرررر ...حتى لو نقلتي ..
ادري طولت عليكم ... لكن حبيت انقل لكم تجربتي الي مريت فيها لعلكم تستفيدون عزيزاتي ...وبالتوفيق