البارحه من ضيقة الصدر محسوس
غـابت علــيّ الشمس بطـــراف قمه

رجلي على جمره وكبـدي على موس
عاميـن والثـــالث علـى آخـــر متمه

صديت عن وادٍ به الحبــل ممسوس
وعن وجـه ابِــن عمٍ يهيـن ابْن عمه

ماقلت جعل الروس تفدى لها روس
اقـــــــــول وجــــهٍ تمدحــــه لاتذمّه

لكنّ بيت النمـــــل والـــذر والسوس
ماهوب بيت اللــــي كبيـــــــرٍ معمّه

ادري مسيري عكس والدرب معكوس
وادري ســلاح الداب نابــــــه وسمه

ماكل جاسـوسٍ نسميـــه جاســـــوس
لــو نعــرف اللـــي كلفــــــه بالمهمه

الناس نِبت ضروسها ريش طاووس
تفاخـــروا ليــن انكـــر العبــــد عمه

تنومسوا فــي شــي ماهـوب ناموس
مثــل الصـــلاه اللي علــى غير يمه

اللــي معــه ثروة سنــــادات وفلوس
ويرهن مقابلهـــــــا كرامــــــه وذمه

يعطيك فالحِسنــــاء نداوات ودروس
ويصرف لك الاخلاق من راس كمه

إن عاف ماكن الطمـــع فيه مغروس
وان طمْع في حاجه .. نســى آبوه وامه

مانوس يالوادي ولا انتــــــه بمانوس
مهم ولا فيــــك حاجــــــــــــــه مهمه

اللي علـى جالك يصيــــدون جاموس
واللــــي وراهـــم ياكلـونـــــــــه بدمه

ذيابتك نـجســه وفيرانك نجـــــوس
من طحت بيـــن ايديـــه وداك فمه

اصنام تبنيها نصــــارى وهندوس
علــى قبـــور الانبيــــــــاء والأئمه

يامملكة صدري من القوس للقوس
من لا يهمــــــــك لاتشيليــــن همه

جد الولـــد منحوس وآبوه منحوس
جا من ظهــره وقــــال لِـ ابليس سَمّه

اهون علــيّ آعيش منفي ومحبوس
ولا ينبعث ريـــح الخيانـــه واشمه

مانيب دايم رايــق اخلاق وهجوس
إما ضويت بكارثـــه جبـــــت طمه