السلام عليكم ورحمة الله وبركاته
الحمدلله توصلت لإتفاق مع احد الشباب زبون عندي في مؤسستي تنجيد مراتب وزينة سيارات
وعرض علي مبلغ حلو جداً مقابل المحلين بالعمالة اللي فيه طبعا للفائدة
1- عملي يعتمد على مهارة واحترافية العامل
2- اغلقت المحل قبل 4 سنوات لعدم توفر العمالة الماهرة وكانت فترة تعديل الاوضاع وماكانوا على كفالتي
3- سافرت للفلبين واعلنت عن حاجتي لحرفيين عن طريق مكتب استقدام وبالقوة لقيت 2 وكنت ابي 4 او 5
4- الحرفيين الفلبينيين يستلم مايقارب 3 الاف ريال سعودي بمحل يملكة بالفلبين والعامل اللي عنده يستلم 500 ريال تقريبا لما طلبت الحرفي طلب 10 آلاف ريال وهذا اصلا دخلي شهريا هههههههههه
5- تعبت من كثر ما اطارد وراهم والتاخير في انهاء سيارات الزباين وانا اصلا موظف شركة وراتبي يالله يكفي الحاجة وجازفت بالقرض والحمدلله ربي وفقنا
6- راعي العمارة رفع علي الاجار وقلت الارباح ويطلبون رواتب اعلى العمال
انا توكلت على الله واستخرت وقلت الافضل اقبلها للرجال خصوصا انه هو اللي عرض الشراء مو انا اللي محتد على التقبيل
------------------------------------------------------
انا كان لي رغبة من زمان افتح سوبر ماركت أسواق ومخابز 24 ساعة لكن ماديتي كانت ضعيفة وبعد مافتحت محل التنجيد والزينة اكتشفت ان عملي ممكن يتوقف او يتدمر بسبب العمالة والاعتماد عليهم كبير جداً والله يا اخوان كل يوم اشتغل واقول عسى الفلبينيين فتحوا المحل ما انحاشوا لانه قد انحاش واحد
لقيت عمارة تجارية جديدة راعيها يبي يأجر المحلات بالكامل 6 فتحات المساحة الاجمالية 400 م2 تقريبا واجارها سنة كامله 180 الف
باقي ماحسبت تجهيز المحلات والثلاجات والارفف ومواد الغذائية والخ الخ الخ لكن الفكرة تراودني من وقت ولما جا الرجال وعرض يشتري المحل احس انه جا بوقته
مع العلم اني ذكرت له عيوب الشغله وانها تعتمد على الحرفيين وان راحوا الشغل بينام وان اجتهدوا الشغل تمام
المحلات كنت اشرف عليها بنفسي من ادوات الشغل واوقات الدوام الخامات والمواد الى الفواتير وعدد الزباين والحمدلله وضحت للرجال كل العيوب والمزايا عاد هو وشطارته بادارة الشغل من بعدي
اللي اطلبه منكم الآن اللي عنده خبره في البقالات او اشتغل ببنده او العثيم او بلشرف وممكن يفيدني برده اكون شاكر ومقدر
واللي عنده افكار او رأي مفيد اتمنى يطرحه واللي بيشوف الموضوع تكفى ادعي لي قبل تطلع بالرزق الحلال ولك بالمثل ان شاء الله