السلام عليكم ورحمة الله وبركاته.

خواتي إخواني الأعزاء أهلاً وسهلاً بكم

أحببت أن أكتب عن مشروعي الصغير لعل أن يفيد ويلهم غيري ويستفيد منه
مشروعي هوا طبخ منزلي لصنف واحد من الحلويات وهي سبموسة حلا
أكيد تعرفونها سبموسه بالجبنه مقليه بزيت وعليها شيرة سكر هذا كل شي !

دخلي اليومي غير ثابت لايقل عن 300 ريال والا يزيد عن 400 ريال
المهم أن الدخل الشهري أزود من 8000 ثمانية آلاف ريال ولله الحمد والمنه

كل اللي تحتاجينه عجينة سمبوسه حلا بـ 6 ريال عدد 3 أكياس
و كرتون جبن البقره الضاحكه دورين بـ 7 ريال تقريباً
رأس المال أقل من 25 ريال وربحها 300 ريال !

كل صحن أحط فيه 15 حبه سمبوسه وأغلفه بـ بلاستيك نايلون*

طريقة التوزيع على المحلات:
متعامله مع محلات القهوه العربيه في منطقتي كل محل أنزل عنده 10 صحون سمبوسه حلا

سعر البيع 10 ريال وصاحب المحل يبيعها بـ 12 ريال ع عملائه*
يبدا عملي بعد صلاة الظهر مباشره وأنتهي من التحضير الساعه 2 تقريباً
ويبدا القلي الساعه 02:30 والتزويع بعد صلاة العصر
وأصحاب المقاهي دائماً يقولون تخلص قبل صلاة العشاء !
وبعض عملئهم يحجوزن صحون بكره*
ودائماً يطلبون أن أزيد الصحون

يوم الجمعه والسبت هوا يوم عطلة الأسبوع أسوي خلية بالجبنه وحلا كاسات ولقيمات*
وأبيع الخليه واللقيمات بنفس سعر السمبوسه والحمد لله مايوقف ع طول تسحب

أما حلا الكاسات يباع بسعر 4 ريال ومربح جداً جداً جداً لكن ما يمشي
وياخذ وقت في المحل فـ حذفته من عملي وماعاد صرت أسويه.

مسويه إعلانات عند المشاغل النسائيه وبين صديقاتي في الجامعه*
وتجيني إتصالات من نساء المنطقه يحجزون من أطباق السمبوسه والخليه وفي الغالب أرفض*
بحكم الوقت غير كافي لتجهيز
فأنا طالبه بالجامعه والوقت ما يسمح بين إعداد طلباتهم وبين المذاكره والمراجعه وأنا مهتمه في دراستي أكثر من غيره

..
المهم وصلت نهاية الموضوع*
إذا بغيتي تستفيدين من وقتك وأنتي وحيده مثلي ماعندك حد يساعدك في التحضير
خليك على صنف واحد وتخصصي فيه*
مثلاً سمبوسه حلا أو لقيمات أو خلية النحل
مو شرط تحطين 10 أصناف يروح وقتك وفي النهاية تعب والدخل قليل جداً*

أو ممكن تتفقين مع صديقاتك وكل وحده تمسك نوع واحد من الطبخ وكذا تنتجيون أكثر
وأهم شي النوم المبكر للإستفاده من يومك القادم بأكمله من دراسه فتره الصبح
ومشروعك بعد الظهر وراحة بعد العصر ومذاكره بعد المغرب او العشاء
والنوم مبكر ع 10 او 11 كحد أقصاء*

وحذف ما يلهيكم عن مشاريعكم مثل شبكات التفكك الإجتماعي
خليك في عملك وفي دراستك والشبكات ذي كل اللي فيها مكرر
ضياع وقت ع الفاضي أمس مثل اليوم وبكره مثل أمس حياه روتينيه أبتعدي عنها

خواتي الكريمات هذا مشروعي حبيت ألهمكم به وإن شاء الله يفيدكم ويكون باب خير لكم
دعائكم الطيب لوالدي برحمه والمغفره*
و دعائي لكم أن الله يرزقكم من واسع فضله والا يحوجكم لأحد من خلقه.