السلام عليكم ورحمة الله وبركاته ..

لي ساعه طالع من الوزاره وبقول لكم كل شيء بالتفصيل الممل .. عرفت ليش هالمماطله وعرفت ليش معلقين كذا وعرفت سبب الاخبار المختلفه اللي نسمعها من الموظفين في التليفون .. رحت لمكتب الوزير وبصراحه ماقدرت ادخل واخذت كذا معلومه من مدير مكتبه .. راح اذكرها لكم لاحقاً في سرد الموضوع .. رحت لشؤون الموظفين والتقيت خالد الشلهوب وراح اسرد كلامه في سياق الموضوع ورحت لمدير شؤون المتعاقدين نايف المطيري وطلع في انتداب في امريكا لمدة اسبوعين وقالوا لي الخبر تاخذه من مدير الموارد البشريه بمرتبة سفير ورحت له وراح اسرد لكم كلامه في سياق الموضوع .. طبعاً التحليل النهائي لكلام اي واحد منهم اتركه لكم ..
.
.
سكرتير الامير خالد قال انه يعرف موضوعكم وان الان موقف كل شيء وان من سنه ماتوظف عندنا احد سواء الاشخاص اللي توظفوا عن طريق الخدمه المدنيه وان الموضوع يعتمد على الامور المالية ..
.
.
رحت للاخ خالد الشلهوب وقال لي : احنا الان في مرحله صعبه وان الفرز ماجانا كشؤرن موظفين ولا اعتقد ان هاليومين حولكم شيء . وان الموضوع عند شؤون المتعاقدين روح لهم يمكن يفيدونكم وان شؤون الموظفين اذا جاهم الفرز راح يعلنون النتائج وقال مادام فيه مسابقه مستحيل مايكون فيه وظائف ولما قلت العدد كم قال مدير شؤون المتعاقدين بنفسه مايدري وان اللي يحدد اللجنه وان مستحيل السفارات بالخارج مايكون فيها متعاقدين لان هذا اتفاقيه دوليه بس برضوا محتاجين سعوديين علما بان الانتدابات في الوزاره اللي كانت طويله ايامها قلت وصارت بالقطاره .. قلت طيب متى الوقت قال مو عندي اجابة سؤالك ..
.
.
طلعت لشؤون المتعاقدين ماحصلت المطيري ولقيت موظف نفسيته في راس خشمه . يحسسني ان وظائفنا هو يدفع رواتبها يكلم واحد قبلي بنفسيه تعبانه ومابغيت احتك معه الا بسؤال وقلت له ابي استفسر عن مسابقة المتعاقدين قال للحين ماصار شيء ..!!
.
.
رحت للموارد البشريه ولقيت السكرتير عسل ومتعاون وشرحت له ضروفنا وقلت ابي ادخل على السفير . جلست ساعه بعد الصلاه ودخلني ولقيت السفير ايضاً عسل .
عرفته بنفسي وقلت له حرفياً : انا جيتك باسم جميع المتسابقين على هالوضايف التعاقديه واتشرف اتكلم باسمهم وانا جيتك ابي من الله ثم منك تريحنا باجابات شافيه لان والله اخذنا الف خبر غلط وانا سعيد بدخلتي عليك .. ابتسم وقال تفضل
قلت وش صار على المسابقه قال حقيقه ماانظرنا في نتائج المقابله الى الان قلت طيب متى ؟ قال قريبا جداً بس ماابي اعطيك وقت ؟ قلت طيب ايش اللي اخرها قال حاليا عندنا امور مالية وقفت كل شيء ومتى ماضبطت راح نعلن . ممكن اسبوع او اسبوعين الله العالم . قلت سمعت ان ممكن مايكون فيه توظيف ..؟ قال لا طبعاً احنا محتاجين موظفين بس حالياً رافعين يديننا عنها
وقال لي اصبروا وتفاؤلو بالله
وان راح تتوظفون اذا كتب لكم الله وظيفه
قلت كم العدد قال اذا فرزنا نستفسر عن الوظايف اللي نحتاجها وناخذ العدد ..
قال لي شيء اسعدني .. قال احنا الان يوم بعد يوم نحتاج موظفين وشهر بعد شهر نحتاج ايضاً ومافي احد قبلكم يعني كل يوم يزيد عدد المقبولين ..
.
.
السلطان مادخلت عليه لاني اعرف انه بيقول لي رح دور وظيفه زي ماقال احد الاخوان هنا ولانه ايضا قالها لشخص موظف بالوزاره قبل يتوظف ..
.
واعتذر على الاطاله