عليكم السلام والرحمه ..
اولاً اسأل الله ان يوفقك ويرزقك من واسع فضله ..
المبلغ جيّد جيداً للبدء في مجال المقاولات ..
في البدايه انصحك بالتخصص وهذا اصلا اجباري لازم في البدايه تتخص بشيء مُعين بعدها تكمل وتتوسع للتخصصات الثانيه ..
انا عندي مؤسسة مقاولات عمرها تقريبا سنتين ونص .. ولكن ما اشتغلت فعليا الا من 8 شهور تقريبا وتخصصت في البناء عظم
نجاره - حداده - بناء .. فقط
صراحه عانيت كثير في البدايات ولازلت أعاني إلى الآن من بعض العماله الموجودين عندي
من ناحية "التنفيذ" صرت اتعلم طُرق التنفيذ الصحيحه من المهندسين واليوتيوب خصوصا
ولازلت اتعلم عشان اصحح لعمالتي اللي يشتغلون مثل الباقين شغل مشي حالك .. وانا ما يعجبني الكلام هذا .. اذا ما صار الشغل حسب الاصول والا اسكر المؤسسه افضل لي عن وجع الراس ..
انصحك تحرص كثير على موضوع المهنيّه اختااااار العماله بعنايه ولو تحاول تجتهد وتتعب شوي وتدور ناس من هنا نقل كفاله افضل لك
حتى لو توصي العمال اللي تعرفهم اذا يجيبون لك ناس متعلمين نقل كفاله وتدفع عموله لهم ماراح تخسر ..
شغل المقاولات عامه يعتمد على سمعتك .. وسمعتك تجي من شغلك .. وشغلك ماسكينه العمال
الخلاصه إذا ما كان عندك عماله فنيّه تشتغل صح خصوصا في العظم .. تجنّب هذا التخصص حالياً
وادخل مجال اللياسه - بلاط - سباكه - كهرباء - دهانات
المجالات هذي شغلها كويس وسريع وربحها ممتاز ولا تحتاج لا خشب ولا معدات ولا دوخة راس
..
بالنسبه للتعامل مع العماله ما انصحك بالرواتب في بداياتك لانها بتكون مصاريف زايده عليك..
يا تعاملهم بالمتر او اليوميه او قطوعه ..
العمل مع الشركات او اي مكان ثاني مافيه مشاكل ابد وانت المستفيد
المهم تحرص على نقطتين .. ضمان حقك + السعر اللي تستلم فيه الشغل مايكون متدني او يخسرك ..
الباقي مو مهم لو تتاخر حقوقك فتره بسيطه تبقى مضمونه
بالتوفيق ..