السلام عليكم ,
لا يخفى على الجميع القرارات الأخيرة
وكبر سوق الجوالات وأرباحه والتي سيضل يحاربونا الأجانب عليه
ولكي لا تخسر في بداية مشوارك أقدم لك تجميعتي في محل الجوالات
القواعد :
عند تقبيل المحل يشترط عدم رفع قيمة الإيجار والتجديد ل5 سنوات
الإستمرار مهما كانت الأحوال فتأكد أنك في خلال 5 سنوات تكون جبت أضعاف ما دفعت
الديكور أسلوبك ذكائك هم رأس مالك في المشروع
نبدا أولا بالموظفين :
من ناحية العمل توجد عشرات الطرق المثلى لزيادة مبيعاتك وتحفيز موظفينك على الانتاجية والعمل
مثلا تضع جهاز للبصمة في المحل لمعرفة مواعيد دوام موظفيك
تجعل فترة 3 اشهر تجربة اداء للموظف بعقد عمل يوضح الشروط والواجبات على الطرفين ان اجتازت يوقع معها عقد عمل
وتقدر تسجلهم عن طريق الموارد البشرية ويدعمون معك بنسبة 50% من رواتب موظفيك
مثلا عندك موظف راتبها 3000 ريال يدعمونك 1500 ريال وانت تدفع 1500 ريال
احذر من جعل راتب موظفيك راتب مقطوع لابد من تحفيزهم بنسبة على المبيعات توضح بالعقد
صدقني يوجد رجال على قدر من الثقة والامانة لكن احرص على اختيار الافضل منهم
الموقع :
و طبعا ما بديت بالموقع عبث , و قد قرأت عن احد التجار قولة انه قال ان اهم ثلاث اشياء تسهم في نجاح الفندق هي : الموقع ثم الموقع ثم الموقع
و نفس الشي محل الاتصالات , لازم تختار موقع ممتاز + مكان مزدحم + يفضل جدا لو كان قريب او داخل سوق نسائي
و حسب ما قريت بموضوعك ان هالنقطة متوفرة*
و طبعا اذا كان المجمع ماشي المحل ما علية خوف من الخسارة , لانك تقدر باي وقت تسوي تقبيل للمحل , يعني واحد يجي ياجر المحل بدالك و يعطيك مبلغ معين , و في مجمعنا الي ما صارلة 7 شهور فية محل ما صارلة اسبوع انباع بـ 31 الف تخيل , و مهو بيع بس مسالة انه فرغة للشخص الثاني عشان يتقبل الاجار
الديكور :
دائما حاول ان لوحة محلك + الديكورات داخل المحل تكون مميزة , لان الناس الان ما تلتفت للجوهر قد ما تنتبة للمظهر , و تقدر انت تطبق هالشي على نفسك , و راح تشوف انك تلقائي و لا اراديا تروح للمحلات الي شكلة افضل و ديكوراتها حلوة , لانه يترسخ بذهنك ان بضاعته بعد كويسة مع ان غالب الي بالسوق واحد
و ركز على مسالة اللوحات على الباب انها تكون بارزة و مميزة و بتصميم حلو يجذب الزبون , و داخلية المحل تكون نظيفة , و الاكسسوارات و الجوالات مرتبة صح عشان تعطي انطباع حلو عند الزبون
حسب إستعلامي قالوا لي أن الديكور من محلات النجارة
أما بخصوص الألبسة يفضل أن تكون باللون الأحمر لأنها جذابة
وأحرص على الأمان مثلا زيادة حافة الموظف لكي لا يستطيع الزبون السرقة
مثال :
الموظف الزبون
___________________
وشاح أحمر |
|
البضائع :
تقدر تسأل أصحاب المحلات عن مندوبين جوالات
أما بخصوص الأكسسوارات روح محلات الجملة
طبعا مع الوقت راح تعرف انه فيه ناس مندوبين
يروح من محلات الجملة ويجبون لمدينتك
خذ أرقامهم
وتقدر تطلبها من النت
تعاملك :
بالنقطة هذي ما راح اعطيك تعليمات لكن ابقولك مثال واقع
اعرف اثنين اخوان و هم اصدقائي و عندهم محلين بالمجمع الي انا فية , واحد اسمة صلاح و الثاني فلاح
صلاح انسان جديد على الجوالات ما يعرف عنها الا معلومات بسيطة , عنده صعوبة بالتعامل مع الكمبيوتر , و ما دخل المجال هذا الا من 3 شهور
فلاح اخوة واحد ضليع بالجوالات و صارله اكثر من سنتين فيها و ما يخفاة اي شي حتى بالانضمة القديمة و عارف كل شي بالسوق*
لو سالتك اي محل يدخل اكثر تبي تقول اكيد فلاح , لكن و الله صلاح صاير يطلع محلة بالشهر اكثر من فلاح و فرق كبيييييييير هذا غير الزحمة الي عنده لدرجة انه يجيب جواللين ثلاثة لفلاح من الزحمة الي عندة*
تبي تقولي لية ابقولك هي مهي على المعرفة بشكل اساسي , لكن الزبون يبي واحد لطيف بالكلام معه , سلس بالتعامل , يرتاح له بالعربي*
و صلاح ما شاء الله علية متوفرة هالميزة و دائما اول ما يدخل الزبون ( تفضل يا طويل العمر , سم آمر وش اخدمك فيها , ابد المحل محلك , و الله لو تبيها مجانا تامر امر , من عيوني اخدمك و هلما جرى )
الجوالات :
اي واحد تسالة و تقولة وش رايك ببيع الجوالات الجديدة او وش رايك ابفتح محل جوالات يبي يقولك هج عن الجوالات الجديدة ما فيها مربح و خلك على المستعمل
كلامهم صحيح من جهة و غلط من جهة اخرى , صحيح ان الجوالات الجديدة ما فيها مربح الا 50 بالكثير , لكن انت بنفسك لو تدخل محل ما فية الا جوالات مستعملة وش تبي تقول ؟ تبي تقول هذا محل داج و على قد حالة , لكن لو تشوف صفق الجديد عنده و الايفونات و الجالكسي الجديد تبي تقول ما شاء الله عز الله انه محل طيب*
يعني انت ببيعك للجوالات الجديدة تعطي نظرة حلوة للمحل و بالتالي تجذب الزبون , و هي ما منها خسارة لان كثير الي يشترون جديد او يجيك واحد يبي يبدل جديد بمستعمل و بكذا انت بعت جديد + اشتريت مستعمل نظيف بسعر حلو , لان غالبا الي يبدل بجديد تحصل جوالة نظيف و ما يحرص كثير على فرق المبلغ
و طبعا تقدر تاخذ جوالات جديدة على التصريف , يعني ينزل عندك الموزع و اذا بعت تسلمة المبلغ
اما الجوالات المستعمل فما فية اي شك ان وراها ربح كبير جدا جدا , لكن بنفس الوقت متعبة جدا و كثير الجوالات الي ينصبون فيها و يبيلك تفحص الجوال زززززين قبل لا تشتري حتى لو كان غرك شكل الزبون انه مهو راعي نصب , وابعد عن المستعمل المفتوح لو كان فرق السعر كبير لان الزبون الي يبي يشتري مستعمل اول شي يسال عنه هو مفتوح و لا لا , و طبعا لازم شكل الجوال يكون نظيف
و طبعا لا تشتري الا الاجهزة المتداولة لان المستعمل الغير متداول صعب تصريفة
وأهم نقطة تحط شاحن وسماعة مع الجهاز ما راح يكلفك 5 ريال ويزيد عليك السعر
100 ريال
الأكسسوارات :
لاكسسوارات الربح فيها مهو عالي فقط لكن خيالي , و حاول تشتري من جدة او محلات الجملة بالرياض , لان السعر يكون ارخص + تتميز عن جيرانك الي يشترون من الموزعين الي يمرون على المحلات و يبيعون عليك و يبيعون على خوياك
و على سبيل المثال انا ابعطيك بعض اسعار شراء الاكسسوارات عشان تكون بالصورة
1 : كفر ايفون خلفي : شراء : 4 ريال , بيع 15 او 20
2 : ستكر حماية شاشة لاي جوال : شراء 2 او 3 , بيع 15 او 20
3 بطارية : شراء 10 ريال , بيع 50 ريال
4 : شاحن سامسونج : شراء 8 ريال , بيع 25
5 : مسمار فتح شريحة الايفون + القطعة الي تحول الشريحة من مايكرو لكبيرة : شراء : 2 او 3 , بيع 10
هذي على سبيل المثال بس على شان تتخيل الربح الي فيها*
البرمجة :
البرمجة و ما ادارك ما البرمجة , اقدر اقولك و بكل ثقة انك ممكن تطلع 60% من ربح المحل من خلال البرمجة فقط , لانها خدمة و ليست سلعة , يعني كامل المبلغ هو ربح*
و اعني بالبرمجة هي :
1 : تركيب برامج apple ( و اعني بـ apple : ايفون , ايبود , آيباد ) لان كلها نفس الطريقة
2 : تركيب سوفتوير apple
3 : تركيب جلبريك apple*
4 : تركيب برامج + رومات اندرويد
5 : سوفتويرات و برامج بلاك بيري
و هكذا , لان مجال البرمجة و اسع , و تقدر تتخصص بهالشي , لان اغلب المحلات ما يعرفون الا الاشياء الاساسية , لان فيه اشياء اخرى مثل فتح الايفون المقفل , و تشغيل جوالات اندرويد المقفلة , هذي ناااااادر الي يعرفها و تقدر اذا جاك الزبون ترفع علية المبلغ نوعا ما و لا يقول لا لان جوالة بحكم الميت
و اسعارة من 30 ريال الى مالا نهاية*
و طرق تعلم هذة الاشياء سهلة جدا جدا , و موجودة شروحات بالانترنت فيها كللل شي و بالصور بعد , و اذا بغيت مساعدة عن المصادر ما راح اقصر معك
نصائح متفرقة :
بما انكم ثلاث اخوان فالافضل انكم تقسمون الدوام بينكم على اساس يصير المحل فاتح من الصباح الى آخر الليل , لان في الصباح و آخر الليل تصير المحلات الي فاتحة قليلة فاذا جا زبون يبي يبيع جوالة او يسوي برمجة يكون نسبة ربحك اكثر بكثير
2 : حاول ان المحل ما يكون مرتع للاصدقاء و الاقارب , لان الزبون يتضايق اذا شاف ناس كثار داخل المحل و سوالف و محد يمة
3 : دائما خلك على اطلاع على الاسعار و على طرق البرمجة الجديدة لان التغيير يومي
وإذا لقيت لك موظف ياخذ مكانك شوي قم شوف السوق وش فيه وكذا
للأمانة منقول من عدة منتديات بما فيها بطالة جمعتها في دفتري الألكتروني
بس ما لقيت باقي المصادر
وأخيرا نقدم لكم دراسة جدوى بيع الجوالات :
http://goo.gl/8uZ5Qf