اشتغلت مسبقاً بوظيفتين ف القطاع الخاص شهادتي بكالوريوس انقلش تربوي وطبعاً معروف التعيين ياخذ وقت على مايجي الوظيفة الأولى كان راتبها 3000 والثانية 3500 وجتني زيادة بالمن و السلوى 500 ريال فيها القطاع / صحة كون لم تقبلني المدراس الأهلية وقت تخرجي بحجة الخبرة مطلوب مني أخلص اشغال كثيرة ومتعددة مطلوب مني كل شهر آخذ اوفر تايم مدته اسبوع من ثمان الصباح الى ثمان الليل الأوفر تايم ماتاخذين عليه فلوس لأ .... تاخذين تايم باك يعني اشتغلتي اربع ساعات زيادة ثاني يوم غيبي اربع ساعات وريحي بس لاتطلبين فلوس لانه يخسر الميزانية .. اجباري عجبك ماعجبك غيرك يبغى يشتغل مطلوب مني أحل المشاكل واجيب دخل عالي وشيك قوي كل شهر مطلوب مني اجلس بمكاني وما أتحرك ولو تحركتي او لعبتي بجوالك ياويلك ترا فيه كاميرا فوقك وفيه ناس تراقبك مطلوب مني أحل مشكلة سببها الموظف اللي قبلي وخرب شغل مدته سنة كاملة وتعالي صلحيها بشهر واحد ... واذا ماتبين اطلعي ( للعلم الموظف هذا غير سعودي ) وعدوني بأنو لو خلصت شغل الموظف القديم رح تجيني مكآفآت و زيادات حلوة كرفت ليل نهار واشتغلت شهر كامل لمدة 12 ساعة حتى اخلص الشغل القديم طورت الشغل الجديد وغيرت تنظيم ومجرى العمل لقسمي و رتبت كل شي وخصصت لكل حاجة مجلدات عيونني مشرفة عليه طبعاً بنفس الراتب بس تغيير مسمى طالبت بزيادة راتب جاني رد انو انتي مابعد تكملين عندنا سنة ومايحق لك تطالبين واصلا هذا شغلك وواجبك ومن من الوصف الوظيفي تبعك ! مرت سنة وكانت الزيادة 500 ريال بس والأجانب اللي جبني زياداتهم على 1200 وعلى 1500 وعلى 2000 ريال ولما اعترضت عطوني مكافآه افضل موظف للشهر 1000 ريال تسكيتة زاد الشغل وطلب مني المشرف اني اغير التسعيرة للخدمات الخاصة بقسمي كون ان الموظف السابق عامل تسعيرة خربوطة سويتها وعدلتها وصلحتها وضبطتها كل شوي مناديني رئيس قسمي انتي مقصرة في عملك وانتي وانتي ولله الحمد مامسك علي شئ حامت كبدي خلاص كرف ثمان ساعات متواصلة حدي اصلي عشر دقايق والأكل ساندويتش بيد واليد الثانية اكتب فيها ع الكيبورد قعدت سنتين ونص وراتبي هو هو ماتغير وغيري ياخذ بالآلآف زيادات كل يوم والثاني تهزئ فيني واحتقار من المشرف الباكستاني ومشاكل ما أنتهت هذا غير تحقيق فتحوه معي استخرت وقدمت استقالتي ولله الحمد حالياً معي خبرة وشهادة حاسب ومصطلحات طبية و دورة محاسبة مالية وشهادة ICD-10 وكلهم بالدرج على أمل يجيني التعيين الخلاصة من الكلام ومن تجربتي ف القطاع الخاص الموظف السعودي موظف كفؤ ونشيط ومن كثر مانقول عن انفسنا كسالى صارت الأجانب تتجرأ وتقول عنا كيذا وهم اخس مننا يلعبون ويعملون حالهم يحوسون بالكمبيوتر وهم يقرون الأبراج صاحب أي منشأة سعودية مايهمه من تواجد السعودي سوى النقاط تبع التوطين وانقالت لنا انو مانبغاكم بس غصبن عننا وظفناكم ... الأوفر له والأفضل انه يوظف اجنبي وبالتالي مصلحته الزم ماعليه القطاع الخاص يساهم في اقتصاد الدولة لكن لما تعرف انه 131 مليار تحولت للخارج من العمالة الأجنبية ماتدري وش تقول