اقتباس:
المشاركة الأصلية كتبت بواسطة علي قاسم
اول معلومة لزوم تاخذها في بالك انو لزوم المحل اللي بتفتحه انك تجيب عمالة على الكفالة 100%
ثاني معلومة لاتأجر المحل للعمالة انت خسران 100% والعامل اللي مايبغى يشتغل اعطه خروج نهائي - مستعد اجيب لك عمالة بروست من كيرلا مدربين جاهزين معلمين بروست بدون مقابل - لوجه الله - بس لاتأجر المحل تكفى لاتأجره لانك خسران اذا بتأجره
-----------------------------
المعدات جبتها من جدة حراج الصواريخ وعليها ضمان - مكينة البروست انواع وكل نوع له سعره سواء جديد او مستخدم
اللي عندي مكينة بروست امريكي هني بني سعتها 5 حبات دجاج - يعني 10 بروست كل عشر دقائق .
جيب مكينة للبطاطس تكون حوضين افضل واسرع لك او عادي تشغل البطاطس بمكينة بروست ومكينة البروست تتحمل كيس كامل مرة وحدة
انا جايب مكينة قلي حوضين صيني جديده 2800 ريال من جدة . شغالة تمام الحمد لله -----
اول شيء قبل ماتفتح المحل روح للدفاع المدني وخذ شروطهم قبل ماتتعب نفسك وتخسر وتطلع رخصة بلدية وبعدين الدفاع المدني يرفض يعطيك تصريح لان اذا فتحت محل بروست قرب محطة بنزين الدفاع المدني يرفض يوقع لك على التصريح حق البلدية
بعد ماتاخذ شروط الدفاع المدني -- روح للبلدية وخذ شروطها وطبقها وبكذا 70% من مشوارك تختصره بتوفير الشروط قبل ماتخسر
----------------------------
اهم شيء اهم شيء لاتتسرع في افتتاح المحل من شان تكسب ترى اول افتتاح مهم اذا جاء الزبون وذاق البروست وكان تمام رجع
اذا مو تمام مايرجع مره ثاني لانه خسر في بروست ومن يعوضه انت تتعامل مع اهم حاسة ذوق لدى الانسان
------------------------
مكينة البروست لها تسليك خاص بها لانها تاخذ 38 امبير ولزوم لها قاطع افضل لك وللمكينة
يعني تجيب سلك اكثر من 7 مل انا مركب 7 مل مثل حق المكيف للمكينة بس القاطع مركب 60 امبير اذا ركتب قاطع 32 امبير بتحرق المكينة لزوم قاطع اما 60 او 100 امبير افضل
-------------
مكينة البطاطس كمان لزوم سلك اكثر من 3 مل وتركب افياش 15 امبير مثل حق المكيفات -- لاتركب لها فيش 13 امبير بعد شهر بيحرق عليك الفيش والمكينة لزوم تركب مثل حق المكيف او اي فيش بس اهم شيء فيش 15 امبير
--------------------
جيب لك ثلاجات فريزر اقل شيء 2 وحدة كبير داخل المطبخ والثانية صغيرة امام الطباخ عند المكينة من شان البطاطس يكون مثلج
والثلاجة اللي داخل من تقطع الدجاج لزوم تحطه جوته لحد العصر
المعدات تحتاج الى مكاين بروست ومكاين بطاطس وقطاعة دجاج سعرها بين 2500-3000
وتحتاج الة حقن الدجاج بالحراق - وفيه انواع والافضل الماني وسعر غالي مستخدمه فوق 4500
-----------------------------
التوابل فيه انواع كثيرة انا اشتريها مع مورد من جده التوابل تحتاج
ملح بروست اللي اعرفه فيه نوعين ملح الاول ملح بروست فايف ستار - الثاني ملح تابل
بودرة بروست اللي اعرفه فيه نوعين بودره الاول بودرة فايف ستار - الثاني بودرة تابل
انا استخدم ملح وبودرة فايف ستار وكل كرتون منها سعره 115 ريال
الحراق نوعين فيه نوع حراق اسناد اشتريه 550 ريال 20 كيلو
وفيه نوع اسمه شطه بس ماقد استخدمته ولا اعرف وش اسم الشركة بس سعره 2100 ما اشتري منه
الزيت للقلي اشتري زيت العربي او زيت دلال -- لاتشتري زيت رخيص من شان يحترق الزيت بسرعة وكل زيت على حسب جودته
اغلب المحلات تستخدم زيت العربي
كمان تروح عند اي عطاره وتقول له يعطيك 7 بهارات او اكثر اساسية للطبخ في كل بيت ويخلطها لك مثل هيل كمون فلفل اسود زنجبيل الخ....
بالنسبة للثوم تحتاج مكينة ثوم مستخدمه بين 1000 و 1500 على حسب استخدامها وجودتها
اي سؤال ثاني تفضلوا وانا كلي اجابات واتمنى الناس تفتح مشاريع خاصه بها ولا تأجرها
والله اواجه ضغوط اني أجر المحل من العمالة ولكن انا رافض وانا حاليا صار لي شهرين وتعبت ولازلت اتبع ولكن حقي وفلوسي وتعبي ما افرط فيها
وسوف اتقدم واجتهد والله مايضيع التعب ولكل مجتهد نصيب
نصيحة اللي يبغى يفتح محل لا يأجر
انا اورد لنفسي من واشتري البضاعة وكل شيء للمحل واجيب واصلح واركب لاني ابغى انجح ولا اريد ان تقل عزيمتي بالكسل وكلام الناس واستسلم واصبح خسران بالتأجير من العمالة ..
الحمد لله والشكر على كل شيء.
انتظر الاسئلة للي يبغى يعرف معلومات اكثر
وماتوفيقي الا بالله
|
اقتباس:
المشاركة الأصلية كتبت بواسطة علي قاسم
نسيت اقول لك اهم معلومة
اهم شيء في كل المحلات التجارية هو الموقع
مثلا مجمع تجاري اجار الفتحه الواحدة 2500 ريال
حصلت محل قريب من المجمع التجاري اجاره 1500
وين اخذ ؟ لاتفكر ان الاجار غالي = زبائن كثير ||| اجار رخيص _ زبائن قليل
وافضل طريقة لادارة التكاليف مبدئيات هو انك تطلع كل شيء بيومه
مثلا اجار 3000 في الشهر اقسمها على 30 يوم كل يوم طلع 100 ريال للاجار
راتب العامل المعلم الاول 2700 في الشهر اقسمها على 30 يوم كل يوم يطلع 90 ريال للمعلم
العامل الثاني 2300 ----- تقسم على 30 يوم وكل يوم تطلع 77
المحاسب 1800 تقسم على 30 يوم تطلع لك 60 ريال يوميا
ومضيف الزبائن والمنظف 1500 وهنا يطلع لك 50 ريال يوميا
كل يوم يجي لك دخل منه طلع الراتب اليومي منه يعني كل يوم تطلع 377 ريال في اخر الشهر تقدر تطلع الرواتب والاجار للجميع بدون جهد
الفلوس الفائضة تشتري بها بضاعة للمحل وبعد اول يوم ينتج نفسه بنفسه
لاتستعجل على الارباح , الارباح تجي بعد 8 شهور اذا انت مستعجل واذا على مهلك سنة
اذا استعجلت على الارباح راح تقتل المحل الخاص بك
اهم شيء فكر بالموقع حتى لو كان اجار غالي = عائد مادي عالي
اجار رخيص = عائد مادي قليل
لاتأجروا المحل , اصبروا واجتهدوا لحد ماربي يسهل الامور والله مايضيع تعبك
اهتموا بالموقع ..
|
ماشاءالله تبارك الله .. كفيت ووفيت بالشرح .. الصراحه معلومات مهمه والغالبيه يجهل النقاط اللي ذكرتها
اكيد اني بنقل كفاله العامل على اسمي وكل شي يتم بأسمي وادارة المحل كذلك .. مافكرت أجره
ربي يجزاك بالخير ويفتح لك ابواب الخير ويعطيك الين يرضيك .. ويكتب لك الاجر في معلوماتك ونصائحك ومساعدتك لـ اخوانك و اخواتك المقبلين على افتتاح مشاريعهم الخاصة
بالتوفيق ياخوي .. وبأذن الله لنا تواصل معك اذا الله يسر الامور ان شاءالله