بصراحة شي غريب جدا أنهم مايسمحون للي قدم المرة الماضية انه يقدم الحين !!
يعني من باب الأمانة المفروض يذكر هالنقطة ببداية التسجيل مثلا أنا ماكنت مستعد نهائيا لأي مقابلة وتوي متخرج طازة، لو كانت هالنقطة مذكورة كان ممكن أهون عن حضور المقابلة علشان التقديم اللي بعده لكن أنا حضرت لأن اللي ببالي أني منب خسران شي واذا مالقحت ماضر الفحل
لكن كل شيء مقدر ومكتوب

4 نقاط للإخوان المتقدمين حاليا لعلها تنفعكم وبالمرة شيكوا على الردود من بداية الموضوع للفائدة الأكبر
1- الاستعداد النفسي قبل كل شي لأنك بتجلس قدام 7 أشخاص لاتتوقع انه واحد أو اثنين بس.. فلازم تنتبه لنقطة الثقة بالنفس وعدم الارتباك
2- في حالة تم ترشيحك للمقابلة وهذا مؤكد بنسبة كبيرة جدا في حال انطباق الشروط وأظن أنها بنسبة 100% لكن ماتأكدت،،،، المهم انه في الترشيح بيحطون لك موعد المقابلة والتوقيت، لاتسوي نفس غلطتي وتعتقد أن التوقيت مخصص لك وتجي قبله بعشر دقايق يقال لك جاي بدري التوقيت هو توقيت بداية المقابلات لأن الجميع اللي بنفس التخصص مرسلين لهم نفس التوقيت والترتيب لدخول المقابلة يصير من سبق لبق .. بمعنى تعال قبل موعدك بساعة واشحن الجوال فل.. فيه كنب تبي تتكي والنت ماشاء الله طيارة يعني لاتشيل هم

3- المقابلات تختلف كثيييرا حتى لنفس التخصص مستحيل اثنين تجيهم نفس الأسئلة ولكن أغلبية اللي سووا مقابلة تم سؤالهم عن المعلومات الخاصة بالمعهد، موجودة بالموقع وواضحة وسهلة ممكن قبل المقابلة بيوم تلخصها وتصير جاهز لأي سؤال يخص معهد الإدارة

4- النقطة الأخيرة في حالة انك غير مستعد نفسيا أو مانمت زين أو من هالقبيل اسحب على المقابلة لأن المقابلة بنسبة كبيرة هي سبب قبولك أو رفضك، وفي حال تم رفضك ماراح تقدر تقدم المرة الجاية مثل ماصار معنا

طبعا سياسة المعهد لاتركز على تسديد الإحتياج بقدر تركيزها على معايير محددة عندهم، بمعنى أنهم عادي تنتهي المقابلات وتعلن النتايج وماينقبل ولا واحد بنفس التخصص، لأنهم يدورون أشخاص فلتة
والدليل أنهم لهم عدة سنوات يفتحون تقديم إعادة لنفس التخصصات كل ترم يعني مرتين بالسنة مع أن المعهد 4 فروع فقط والفروع صغيرة،، يقدرون بسهولة تسديد الاحتياج حق 10 سنوات بتقديم واحد

بالنهاية الرزق بيد الله وماعليك غير فعل الأسباب
بالتوفيق للجميع