السلام عليكم ورحمة الله وبركاته وبعد :
انا معيد سابق في الجامعه فرع جده ومبتعث ان شاء الله في خريف 2016 لإكمال الماجستر والدكتوراه ولقد مررت بالمنتدى بمحض الصدفه بعد انقطاع طويل لمده سنه تقريبا ... و وجدت بعض الاخوه والاخوات من من يحتاجون الى بعض المساعده والمعلومات التي كنت في يوم من الايام في امس الحاجه اليها ولذلك قررت ان اكتب لكم هذي المشاركه والتي ستتضمن ابرز المعلومات عن الجامعه واجراءات التوظيف وما الى ذلك .
بسم الله نبدا وعليه نتوكل :
اولا بعد التقديم واجتياز المقابله الشخصيه سيتم التواصل مع المرشحين من الرياض واخبارهم بالقبول المبدئي وهو بالاصح قبول نهائي ولكن من الصعب يقولون لك قبول نهائي وانت ما بعد طابقت اوراقك .
ثانيا حيتواصل معك احد من HR في كل فرع و حيخبرك على موعد المطابقه وتوقيع العقد كلها حتكون في نفس اليوم .
ثالثا رح تطلع لمستشفى الحرس تبع الجامعه وتخلص كل الفحوصات الطبيه والتطعيمات اللازمه .
رابعا بعد ثلاثه ايام تقريبا ترجع للمستشفى وتاخذ نتيجة الفحص الطبي و تاخذها ل HR
خامسا تحدد مع موظف HR يوم المباشره المناسب لك ( في اريحيه من هالناحيه ولكن في حدود المعقول طبعا 😊
سادسا قبل يوم المباشره لازم تطلع البطاقه الوظيفيه ( badge) و تباشر على خير ان شاء الله في يوم المباشره و تقريبا حيكون في سبتمبر .
وكذا خلصت اجراءات التوظيف كامله 😅
نتدخل على الجامعه 🙈
الجامعه عندها سياسه غريبه نوعا ما عن باقي الجامعات السعوديه ورح اذكر ذلك بالتفصيل الممل.
اولا الجامعه تحت مظلة الحرس الوطني ما يعني انك ستجد شعار الحرس الوطني في كل ورقه في الجامعه ( على صيغة المبالغه ليس الا 😐
و كما هو معروف ان نظام الحرس الوطني هو نظام التشغيل الذاتي وهو نظام عقود تتجدد سنويا (اتوماتكيلي) مثل الخطوط السعوديه او ارامكوا ..
• الرواتب مررره حلوه وتقريبا اقدر اقول هي اكبر دافع للانضمام للجامعه يعني المعيد في هالجامعه افضل من ناحية الماديه من المعيدين في الجامعات الاخرى اذا استثنينا بعض التخصصات والكليات الصغيره والبدلات .
•الدوام للمعيدين من 8 صباحا الى 5 مساء والانضباط شيء ضروري بالذات في الثلاث شهور الاولى بعد كذا ممكن يصير الموضوع فيه مرونه واريحيه اكثر.
• ربما يتسآأل احدكم ( طيب انا ايش مهمتي في هالجامعه ؟)
اكون صريح معكم المهمه الرئسيه لك كمعيد ان تحضر قبول ماستر( لا يهم مشروط او نهائي بنسبة لتخصصات العلوم الاساسيه اما الانجليزي فهناك بعض التشديد على القبول النهائي فقط ) من جامعه معترف بها في امريكا او كندا اما بريطانيا فهناك رفض قااااطع 😑
• نجي على المهام الاخرى ، طبعا تعامل معاملة عضو هيئة تدريس يعني تدخل مراقبات ، تغطي محاضرات في حال طلب منك، تحضر اجتماعات، و لكن لا يفرض عليك عبء تدريسي الا اذا طلبت انت هذا الشيء .
•طبعا العقد لمدة سنه في هذه السنه لازم تجهز نفسك وتدخل اختبارات سواءً لغه او GRE وما الا ذلك، المهم لا تضيع الوقت وانت ما سويت شيء لان كل ما يمر عليك الوقت يزيد الضغط عليك من اللي فوقك ... كمان حاول تجيب قبولك بنفسك ترى الشغله سهله يا اخوان بس البعض منا يحب يعقد الامور ويصعبها على نفسه ويستعين بمكاتب قبولات واخر شيء ينكبونه بجامعه ولا معهد ولا مدينه الله بالخير ..
•يعيب الجامعه البيروقراطيه القاتله في كل شيء .. لازم من التدرج في القرارات والمسوؤلين وهذي حتعاني كمعيد منها مستقبلا .
اخيرا اتمنى للجميع التوفيق والسداد والف مبروك لمن تم ترشيحهم وعقبال الباقين ان شاء الله .
ملحوظه : انا اتكلم هنا عن المعيدين في قسم اللغه الانجليزيه وقسم العلوم الاساسيه في كليه العلوم والمهن الصحيه فقط وليس لدي خلفيه عن باقي المعيدين في الكليات الاخرى .
ملحوظه : احضر معك رقم الآيبان مختوما من البنك في يوم توقيع العقد لتحويل الراتب عليه .
ان شاء الله ما نسيت شيء ولكن عالعموم هذي هي ابرز المعلومات اللي اتوقع انكم بحاجه اليها وبالتوفيق للجميع ولا تنسوني بدعوه في ظهر الغيب بالتوفيق والسداد في هذي الايام الفضيله .. واي استفسار انا حاضر و بالخدمه واعتذر للاخوان والاخوات اللي كانوا يرسلون لي على الخاص ولم اتمكن من الرد عليهم لانشغالي في الفتره الماضية
خالص تحياتي ...