اليوم ابحكي للملا بعـض الاسـرار
عن وقتنا اللي شب في الخلق نـاره
شريت لي ارضـاً وكثـرت الامتـار
ارضاً عليها حـوش عالـي جـداره
وُدي ابتني وارتاح من هـم الايجـار
لكن حظـي منهمـك فـي انحـداره
واقابل اصحابي ويلحق بنـا الجـار
والجار دايـم يستمـع شـور جـاره
قالوا انت ماتابعت وش جا في الاخبار
فيهـا خبـر قاسـي ثقيـلاً عيـاره
سعر الحديـد الاولـي يافهـد طـار
واليـوم ماتقـدر تسـوي عـمـاره
إرجع وبيع الارض واسمع للاشـوار
وادخل مع اهل العلم واهل الحضـاره
في سوق الاسهم مع طويلين الاعمار
اللي يعرفـون الفلـك فـي مـداره
في كـل يومـاً تربـح الفيـن دولار
يمكن تزيد ان كنت راعـي شطـاره
وارجع وبيع الارض من بعد الانـذار
وادخل على سوقاً بسطنـي خضـاره
واقضي نهاري في هواجيس وافكـار
في صالة الاسهـم مسنتـر خفـاره
واسبوع واحد بس والسـوق ينهـار
وانهار مشروعي في وقت انهيـاره
قالوا في بنك الراجحي قرض جبـار
واللـي يقـدم يستلـم فـي نهـاره
فرصه ثمينـه تُنتهزعنـد الاحـرار
هـذا التعـب لابـد تجنـي ثمـاره
واخذت لي قرضاً وانا منـه محتـار
اخاف كسـراً مايجـي لـه جبـاره
وارجع لسوق الحظ الاقشر والاعصار
واللـون الاحمـر ماتغيـر حمـاره
ثمَ اندمر من بعـد ينسـاب واعمـار
هـذا الدمـار اللـي دفنـي غبـاره
واطلع وانا قلبي على الغبـن صبـار
واحس في كبـدي لهيـب الحـراره
قلت اشتري هالحين تفـاح وخيـار
واثر الغلا في السوق رافـع شعـاره
صار الغلا جيشاً له اخيـول واغبـار
من كل صوب يشن حملـه وغـاره
لاواللّـه الا اسواقنـا ولعـت نــار
والـرز سعـره مستحـل الصـداره
في كل شيـاً زودوا رقـم الاسعـار
وين انت عنهـم ياوزيـر التجـاره
لو يستمر الوضع تدرون وش صـار
الشعـب ابعطيكـم نهايـة مـسـاره
النصف الاول يتجـه عنبـر اشهـار
من كثر ماذاقـوا القهـر والمـراره
واللي بقي يأخذ صغيريـن الاعمـار
يشحذ بهم في كـل شـارع وحـاره
تكفى يابو متعب لهـم لـد الانظـار
انت الزعيم اللـي يـزف البشـاره
الشعب يرجي نظـرة القائـد البـار
اللـي ليـا قـرر ينـفـذ قــراره
قلتـه وبرجـع للقصائـد والاشعـار
وان ماحصل مكسب فلابـه خسـاره
شريت لي مكتب معـه كرسـي دوار
واخذت لي حاسب وشاشـه وفـاره
زوداً علـى لوحـة مفاتيـح بـزرار
والطابعـه للطبـع رهـن الإشـاره
يازين مرقـاب القصائـد والاشعـار
إن ماحصل مكسـب فلابـه خسـاره
منقوله