اليوم طاري العيد جتنا حكاويه
كلٍ على شوفه يحث الركايب

يبي نهار العيد عجله حراويه
عسا يشوف اللي به القلب ذايب

وانا من جروحي ليا مر طاريه
ماكنه الا هم وحزن ومصايب

وش الفرح من غير شوفه واحاكيه
ولا .. وش الاعياد والزين غايب

اخفي عن العذال حزني واباريه
وجروحي اللي من فراقه عطايب

اجي واروح وهاجسي يم راعيه
واقول في قلبي ترى الحزن عايب

لابان في وجه المعايد مواريه
الناس بعيونه تشوف العجايب