يالله عسى بعض الغلا ياقايد الغيد .. امخلوف
ان مارجع ربحه علي .. الله يرده راس مال
كم لي وانا تكويني الدنيا على روس الكتوف
وآشيل مالاطيق من شانك واحمّلها الجبال ؟!
وياما على شانك تحمّلت الخناجر والسيوف
وياما على شانك ليامن ضِقت شدّيت الرحال
وقّفتني بالشارع الضيّق وممنوع الوقــــوف
مسار واحد والمصيبه لايمين ولاشمــــــــال
تقول طوِّفها معي وآقول عيّت لاتطُــــوف
أجيبها منّا تجي منّا ولافيها مجــــــــــــــال
والحب ماينفع مَعَه فزْعه ولا واو امعطوف
الحب لو زالتْ جِبال الارض ذِكره لايزال
يرقى على حبال الوصالُ ويخدمه نبض الحروف
شوي من نسج الغلا وشوي من نسج الخيال
وش عاد لو غنّيت طاروقك وصفيت الصفوف
صفٍ يبا ياقف معي .. وصفٍ ليامن رحت شال
والله لتبطي ماوصلت ادنى مواصيل الهنوف
الجادل اللي دمعها لارحت والا جيت سال
الجادل اللي طيفها عندي ولا كل الطيوف
ام الغلا وام الحلا وام الدلع وام الدلال
والا انت حبك في حياتي ظرف من ضمن الظروف
اقلط على نزف الشعر والفال يقفاه العقال
اول ماكنت اسمع وآشوف والحين صرت اسمع واشوف
اتعبت رجلي في هوى نفسى على روح وتعال !!