المشاركة الأصلية كتبت بواسطة ارماز

الإختبار في تخصصك اللي قدمت عليه
بالنسبة للمقابلة هل تقصد إنها تكون في نفس اليوم ؟
غالبا لا ،
أول شي يصححون الإمتحانات و بناء على الدرجات و المعدل يختارون الحاصلين على أعلى علامات .

أما إذا تقصد بشكل عام ، طبعا فيه مقابلة خصوصا لوظيفة المعيد!
لازم يتأكدون من شخصيتك اتزانك قدرتك على الشرح و توصيل المعلومة و النطق السليم ( أحيانا يطلبون تحضر برزنتيشن صغير بس يبلغونك قبلها )
يسألونك وش تضيف للقسم و للجامعة ككل .
و بما أن الإعادة تستلزم الإبتعاث راح يسألونك كذا سؤال بخصوص اللغة و هل قمت بخطوات للتحضير للدراسة خارجيا ( اختبار لغة و غيره )
و هل بحثت عن برنامج معين و ايش ناوي تكمل فيه

إذا جبت علامة كويسة بالإمتحان و حضرت للمقابلة مثل ما كتبت لك نسبة قبولك بالوظيفة بتكون كبيرة جدا بإذن الله .

خصوصا نقطة الدراسات العليا و الإبتعاث اظهر لهم إنك جاد و مطلع على الشروط و البرامج و حاطط في بالك جامعات معينة هذي بتعطيك دفعة قوية للترشيح .
و لو عندك فكرة بحث علمي أو مجال معين بتبحث فيه يا سلام .


لازم تتكلم بصوت واضح و كلماتك تكون مفهومة و بدون توتر و ارتباك لأنهم يختبرون فيك هل تقدر تدرّس أو لا ..
برضو المظهر الشخصي جدا مهم احرص تكون رسمي و مرتب جدا ، يا حبذا الزي الرسمي ( ثوب وغترة و حذاء رسمي) بعيدا عن السكربز و الكروكس و الصنادل و النظارات الشمسية أو ألوان أو قصات صارخة غيرها
قد يستغرب البعض من نقطة المظهر لكنها جدا مهمة و بعض اللجان تحط علامات خاصة لها ، و لو ما حطوا فهي بالتأكيد بتزيدك قبول عندهم لأنها بتعكس جديتك و رغبتك بالوظيفة و الكلام عام لكل متقدمين و متقدمات الإعادة .

مهم برضو إذا عندك خبرة عمل سابقة تجهز كلام عنها و تبين لهم كيف استفدت و كيف صقلتك تجربتك بالعمل في المكان الفلاني ..

ممكن جدا يستفزونك بسؤال او اثنين حاول خليك مبتسم و هاديء و جاوب بدون نرفزة .

بالعربي تخيل إنك دكتور أو بروفيسور و رايح تسوي مقابلة تلفزيونية .. كيف بيكون مظهرك و تصرفك ؟

كلامي كتبته لكم من واقع خبرتي العملية إن شاء الله فالكم التوفيق
دعواتكم لي يعوضني ربي بوظيفة مناسبة لي و التفوق في اختباراتي