|
رد: تجمع مبكر لمناقشة الدورة رقم "47" بكلية الملك فهد الأمنية
اقتباس:
المشاركة الأصلية كتبت بواسطة صبي وائل
السلام عليكم،، مساء الخير يا شباب
انا بصراحه صار لي اربع ايام مسجل ابسئل كم سؤال لكن توه يتفعل حسابي بالمنتدى
انا عمري ثمان طعشر سنه صف ثالث ثانوي علمي بصراحه ناوي الكليه الأمنيه بعد البكالريوس لكن حطمو معنوياتي الي ما قبلو بالكليه انا محتار ما ادري اي قسم ادخل بالجامعه عشان اضمن القبول علمًا ان معدلي خمس و ثمانين و محتار بين الE و الحاسب انا ودي بالE لكن اخاف ما يقبلونن و انا امنيتي الكليه الأمنيه
واحد/ لذلك ابستفسر ايهم اكثر قبول الE او الحاسب و وين يعينوني بعد التخرج من الانجليزي و الحاسب؟
اثنين/وش اكثر قسم سهل من اقسام الحاسب؟
ثلاثه/سمعت ان الجامعه الي انت متخرج منها لها دور بقبولك اذا كانت جامعه عريقه و انا بصراحه ابدخل جامعة القصيم؟
اربعه/انا صاير علي حادث و جاني كسر بأول الخشم(عند العيون مب الغضاريف و بسوي عمليه السنه الجايه و سمعت انهم ما يقبلون بدون ما تجيب لهم تقرير العمليه ف هل اذا جبت لهم التقرير يقبلونن؟
خمسه/انا خايف من انه يكون معي دوالي خصيه او نظري ما يكون كامل علمًا اني ارى بشكل ممتاز؟
سته/اذا عينوني ملازم بأقدمية سنه اتقاعد وش رتبتي؟
سبعه/كم الشيك الي استلمه بعد التخرج من الكليه الأمنيه لأن فيه ناس تقول ثمانين الف و ناس تقول تسعين الف
ثمانيه/كم الراتب او المكافأه الي تصرفها الكليه لطلابها اثناء الدراسه و هل هي راتب استطيع اخذ قرض عليه او لا؟
تسعه/هل تعين الكليه بعض خريجيها في مكافحة المخدرات و وش القسم الجامعي الي يعينون منه حقين المكافحه و كم عدد الي عينوهم الدوره الماضيه في المكافحه؟
عشره/هل يعينونك في المدينه الي تطلبها انت او عشوائيًا؟
عارف اني ازعجتكم لكن قسم بالله اسئله معقدتني اتمنى انكم تجاوبوني لكن ابغا اجابات مضمونه ما ابي اجتهادات شخصيه و يعطيكم العافيه
|
وعليكم السلام ورحمة الله وبركاته
مساء النور
لا تتحطم معنوياتك ابداً بخصوص اي وظيفة مستقبلية وخذها نصيحة اخوية مني
ولكن كذلك لا ترفع سقف طموحك بخصوص الكلية بشكل كبير ولكن تفاءل خير وعسى الله يكتب لك المطلوب
انا الحمدلله متخرج اداب لغة انجليزية ومعدل ممتاز مرتفع مع مرتبة الشرف الاولى واسألني اي شي بخصوص القسم وابشر بالاجابة
لكن الحاسب علمي والانجليزي ادبي وانت اختار الانسب لك بعد الاستخارة
واحد/
جميع التخصصات مطلوبة ويتفاوت الطلب كل سنة ولكن زي ما عرفت من دورة 46
التخصصات الاكثر طلباً هي الشريعة والقانون والبدنية واللغة الانجليزية ..
التعيينات على حسب الاحتياج من الوزارة، ولكن زي ما سمعت فإن الانجليزي غالباً للجوازات والحاسب غالباً لقطاعات الامن العام "غالباً"
اثنين/
انت لا تبدأ بدايتك الجامعية ع حسب الاسهل !
كل تخصص بالجامعة تدرسه بشكل مفصل حتى لغتك الام ف انت جهز نفسك كلياً وتوكل على الله والباقي يهون
ثلاثة/
نعم لها دور، جامعات المملكة العريقة لها سمعة كبيرة ولكن هذا م يعني ان الجامعات الباقية ما لها نصيب
في دورة 46، طلاب تم قبولهم وهم من جامعات متوسطة السمعة، توكل على الله جامعتك طيبة والله يوفقك
ودائماً تذكر ان لكل شي تمتلكه دور في قبولك، شهادتك معدلك تخصصك ...
اربعة/
هنا بصراحة م اقدر اوضح لك لان حالتك ما مرت علي والله يكتب لك الشفاء العاجل
ولكن كان فيه بعض الشباب في دورة 46 كان عندهم بعض العمليات وقالوا في الكشف الطبي تقدر تمشي
اذا ما كانت العملية مؤثرة على اداءك، الله يشفيك
خمسة/
اعمل كشف، وتعالج..
لا تنسى انت معك سنين قدامك تقدر تتحسن فيها حتى في طولك
ستة/
الله اعلم..
ولكن لي قريب يقول الرتب والراتب يختلفوا في كل قطاع من ناحية الزيادة
سبعة/
الله اعلم..
اطمح للكية وفالك القبول بعد البكالريوس والله يعطينا من فضله
ثمانية/
قالوا نصف الراتب الاساسي
تسعة/
نعم، الدراسات الاجتماعية والكيميائية زي ما شفت وسمعت في دورة 46 والله اعلم
عدد اللي يتعينون يختلف من سنة لسنة
عشرة/
اظن عشوائياً
اتمنى اني افدتك ولو بالقليل ..
بالتوفيق ~
التعديل الأخير تم بواسطة Exploter11 ; 05-03-2017 الساعة 01:10 PM
|