السلام عليكم .. يسعد مسائكم بكل خير يارب

اولا الحمدلله تم قبولي مبدئي امس وان شاء الله تتيسر وربي يرزقني ويرزق الجميع الى القبول النهائي

ثانيا راح اكتب كل شي صار بالقبول المبدئي من والى :

طبعا الموعد كان امس بتاريخ 11 - 8 الساعه 6 الصباح بالرياض مبنى التخطيط والتطوير بمكافحة المخدرات خلف شرطة النظيم.

اتكلت على الله سبحانه ومشيت طبعا اللبس رياضه ومافيه اي رياضه محدده اي رياضه عندك اخوي البسها بدون ( الجزمه الرياضيه ) الله يكرمكم, الشعر يدققون ادا كان كثير او قاص قصة لدلك حلق وخفف شعرك ويكون متساوي يعني ( اهتم بالمظهر ), وايضا بدون جوال نهائيا.

توصل هناك طبعا بكامل اوراقك وشهاداتك وبطاقة الاحوال الاصل تكون معك برضو.

يفتشونك الشرطة العسكرية تبع المكافحة ادا كان معك جوال او شي وبعدها تكمل دخولك.

جمعونا في الميز اول شي وانتظرنا لان فيه ناس قبلي كانوا جايين ويمشون بالترتيب على شكل صفوف عددنا كان 30 شخص تقريبا جنود اوائل.

بعدها مشونا الى مبنى ثاني : اول شي الطول والوزن ادا امورك تمام خلاص تعدي المرحلة اللي بعدها مرحلة تدقيق اوراقك الشهادة والمؤهل او ادا تحمل دورة تدريبية القياس وجدا دقيقين بهالاشياء, ادا عديت مرحلة التدقيق بعدها تروح لصالة صغيرة لتنتظر المقابلة الشخصية, يدخلون على الضابط بشكل دفعات يعني كل 5 اشخاص يدخلون.

المقابلة الشخصية : جدا جدا سهلة يسالك وش مؤهلك وكم مدته ويعطيك ورقة فيها 3 فقرات عن المملكة يقولك اقراها يشوف قراءتك كيف, ( خل صوتك عالي ومخارج الحروف واضحة وخلك واثق ولا تتوتر ) اول ما يشوفك قراءتك كويسه يقولك خلاص روح يعطيك بطاقتك وورقة معها مكتوب اجتاز المقابلة الشخصية.

مرحلة تعبي اوراقك وبياناتك : فيه كرسي اول ما تطلع من المقابلة الشخصية عليه دفتر طلب الالتحاق تاخده وورقة صغيره ثانيه, تجلس على كراسي هناك وتطلع صورك الشخصية وتدبسهم بالاماكن المخصصه لها بالدفتر وتعبي بياناتك على دفتر طلب الالتحاق ( بياناتك اللي على وجه الدفتر فقط ).

بعدها في افراد قدامك وضابط تعطيهم الدفتر يختمون عليه ويعطونه للضابط جمبهم ويناديك تجيه يعطيك الآتي :
1 - خطاب للاحوال المدنية .
2 - خطاب للادلة الجنائية .
3 - خطاب لجهة الكلية او المعهد اللي اخدت منه مؤهلك للتصديق .
4 - الكشف الطبي . ( الكشف الطبي فقط في الرياض وجازان لدلك تختار المكان الانسب لك ) ويعطونك موعد المستشفى .

هدا كل اللي صار معاي بالضبط, واتمنى اني ما اطلت عليكم جدا مع اني م خليت شي كل شي بالتفصيل, سامحوني.

والله يوفقكم ويرزقكم الوظيفة والاستقرار واللي ما حالفه الحظ لا تيأس واكثر من الاستغفار واعتبر كل امر يصير ف هو خير لك, ودعواتكم .