افضي الصدر لكنه يرد ويضيق
من العله اللي لجت بالصدر واخفيتها


ابدي برودي لكن وسط قلبي حريق
كم عبرت(ن) في غياب الناس هليتها


بي جرح لكن مهو سطحي خطير وعميق
كل ما التهب واشتعل بالصدر ناديتها


راحت وانا خاطري فيها ضاع والطريق
اللي يدل الخفوق ليا بغى بيتها


ماكن لي بالبلد عزوة ولا لي رفيق
يالعن ابو حيها يالعن ابو ميتها


كيف عزلتني عن العالم بليا صديق
حسبي على الحظ الاقشر ليش حبيتها


الجادل اللي خذت قلب المعنى وسيق
ياما على هجعت العالم تحريتها


اقول يمكن تجي وأخذ زفير وشهيق
ولوهي بكيفي مثل لمح البصر جيتها


ادله النفس والا مالاملها بريق
والله لتبطي كثر ماني تباطيتها


معها أتعلق بقشه مثل حال الغريق
اقفى ضعنها وانا بالروح ساويتها


قولوا لها والله ان الوضع بي مايلييق
وان طولت سبحة المكنون فليتها


قولوا انه لها بالود عهد (ن) وثيق
وإني على من نطق بالضاد بديتها


هي طاقت الصبر عني بس انا كيف أطيق
ياليتها ترحم المفجوع ياليتها


او ليتها قبل ياصل مركبي للمضيق
تراجعت عن زعلها يوم راضيتها


اقسى من الموت غيبتها وتنشيف ريق
صبري جبل والجبل هده ديناميتها


لو انها سالفة فرقى عشيق لعشيق
مبطي تجاوزت محنتها وعديتها


لكنها روح مسجونه جسدها طليق
لو كان عندي طريقة حل حليتها


تعرض صورها بعيني في شريط (ن) دقيق
وعلى كثر عرضها مايوم مليتها


وعلى صورها غراب البين ينعق نعيق
مشؤم يفرح على العالم وتشتيتها


ضاع الزمرد وضيعت الذهب والعقيق
واللي بقى ذكريات (ن) ماتناسيتها


يامر الايام من عقب العسل والرحيق
وياكبر الاحزان لو حاولت تفتيتها