السلام عليكم ورحمة الله وبركاتة
اول شي اعتذر منكم جميعا خاصة للي راسلوني على الخاص وللي راسلوني على الايميل لاني من بعد ما شفت اول واحد راسلني كان صامل وعلى طول استأجر المحل قمت انا وحذفت الايميل
انا شاركت واحد شرواكم مباشرة بعد ماكتبت الموضوع بفترة بسيطة راسلني على الايميل وابشركم محلنا مبيعاته اليومية احيانا توصل ١١ الف ريال باليوم وصافي الربح (اليومي) ما بين ٤ الى ٨ الاف ريال ماشاءالله تبارك الله لا حول ولا قوة الا بالله .
ربحنا الشهري مايقل عن ١٢٠ الف ريال ماشاءالله تبارك الله
محل الخضار اذا كانت مبيعاته اليوميه ١٠٠٠ ريال
(خضار وفواكه وورقيات وغيرها) .. يكون ربحه تقريبا ١٠٠٠ ÷ ٢ = ٥٠٠ ريال تقريبا
يعني ٥٠٠ ريال راس المال
والباقي ربح صافي وهو ٥٠٠ ريال ... هي طريقة غير دقيقة لكنها تقريبيه بنسبة ٩٥%
اما لو كانت مبيعات محلكم ١٠٠٠ ريال يوميا وكلها من (الخضار فقط) وليس الفواكه ممكن يكون الربح ٧٥٠ ريال صافي يوميا
١٠٠٠ ريال مبيعات ÷ ٤ = ٢٥٠ رأس المال والباقي هو الربح
كذلك لو كانت المبيعات من (الورقيات فقط) يوصل الربح من مبيعات ١٠٠٠ ريال الى ربح ٨٠٠ ريال صافي في اليوم
١٠٠٠ ريال مبيعات ÷ ٥ = ٢٠٠ رأس المال والباقي هو الربح
عندنا ٤ عمال واحد يداوم معي من الصباح لين ٢ الظهر و٣ يداومون مع خويي من ٢ الظهر الى ١٠ ونص الليل
واحد من العمال الثلاثه يداوم معي بدري من اذان الظهر عشان يوصل طلبات ويطلع بدري على الساعه ٩
اذا نزلت للسوق اجيب خضار اداوم فالمحل لين اذان الظهر او ١١ الصباح وخويي يجي فالحل لين اذان العشاء واحيانا اجيه على المغرب وامسك المحل لين نقفل اهم شي يكون اللي بتشاركونه فاضي وغير موظف نصيحه لله شغلت الخضار زي ماشرحت تبي ناس متفرغين ومتفاهمين وقبل كل شي يخافون الله
موقع المحل بعيد عن حي طويق اللي انا ساكن فيه لكن والله العظيم الفلوس والارباح الكبيرة تخليك تدق مشوار لو ٤٠٠ كيلو فاليوم رايح جاي
الان انا ادور بيت للايجار في شمال الرياض عشان يكون قريب من المحل لان المحل في شمال الرياض
والسلام عليكم ورحمة الله وبركاتة
اعتذر عن الرد او المشاركه في الموضوع لاني ماعندي وقت بصراحه لكن رجعت لكم عشان اعلمكم وش سويت وزي ماقلت لكم في بداية الموضوع مجال الخضار فيه ذهب ذهب ذهب ذهب بس للي بيصبر على التعب اول ٣ شهور وبعدين ينسى شي اسمه تعب اذا صار يلعب بالفلوس لعب وتذكروا كلامي ولا تنسوني من دعواتكم الله يرزقني ويرزقكم .