لتكتمل الصورة


قصيدة للشاعر علي الأحمد((عاشق الجوري)) بعنوان ((حزن طفله))

ابله دلال ..
يا * يمه * تسلم عليك
تقول : مريولي قصير ..
وشرايط الشعر الحرير ..
ذابت حزن ..
وامست بلا ارض ووطن ..
* يمه * صحيح !
وشـ تقصد بـ ارض ووطن؟
والبارحه انتي معي
غربه وانا بيدك وطن ..!



* يمه * صحيح .. !
اشوف انا * الجده * تصيح ..
وانا اصيح ..
وابوي عينه توجعه ..
* يمه * خلاص ..
والله اتوب ...
ماعاد اشخبط بالجدار ..
وماعاد اخرب غرفتي ..
وبـ أحفظ اناشيد اّمتي ..
وبـ ألبس جلاّلك للصلاه ..
ادري طويل ..
لكن انا ودي اكون ..
مثلك ..
جميله بـ عين ابوي
مثلك..
عفيفه بـ عين اخوي ..
لو كان باقي لي عيون ..!!


تصدقين ..!
لو بـ شتكي منـّك
عليك ..
استاهلك ..
تصدقين ..!
لو ينتهي عمري انتظار ..
يستاهلك ..
بس ترجعين ..!
تصدقين ..!
امس الضحى ..
فسحة فصلنا احتفال..
كل ٍ معاه امه وانا ؟
مالي احد ..
الا دموعي وضيقتي ..
وريال .. من " ابله دلال "