جتني ويسبق دمعها كل الأعذار ...


..........بين الرجاء واليأس تعلن ندمهــا...



تبكي تنوح وحالها قام ينهار ...


.........نظره اللي ماتعدى قدمهـــا....



بنت تهول بزينها كل الأبصار....

..........ضاع الحلا من حسنها والتزمهــا....



أجمل بنات الكون تلفت للأنظار ....


...........غصب على اللي شافها يحترمهــا....



ومدت يديها ترتمي ذل وإصغار....


...........وأفضت براكين المشاعر حممهــا....



**قالت رجيتك لو تناسيت ما صار...


...........ماحد عن الزلات نفسه عصمهــا....


أبعترفلك يا بعد كل الأخيار ....


............نفسي تودك دام حبك حكمهــا....



(أهملتها همشتها عمد وإصرار


...........قصدي أحسسها وأزيد بألمهــا )!!



ومن حزنها كني على واهج النار...


........والمشكله هالقلب ماقد ظلمهــا....



وبقيت واقف تايه الراي محتار !!


.............انظر لها نظره حبيب رحمهــا....



مدري أخلي حبنا رمز تذكار...


.............واترك اساها باقي لو وسمهــا...


لتعيش في دنيا المحبين تعبار...


...........رسمه إنمحت فنانها ما رسمهــا....



وإلا أعيد الحب وأنثر لها أزهار...


...........وأحيي بقايا الشوق دامه زهمهــا....



قلت أرفعي هالرأس يابنت الأحرار...


.............قربك حياة الروح وبعدك عدمهــا....



هاتي يديك نكمل العمر مشوار...


..........ونبني صروح الحب بأعلى هرمها....