بسم الله الرحمن الرحيم

هذا اول موضوع لي في منتداكم
وانشاء الله يحوز على رضاكم واستحسانكم .
في البدايه سأبدأ بقصة شخص عزيز علي كان عاطل وفقير ولكنه كافح وثابر ليغير مجرى حياته ويحسن مستوى معيشته .( في الاخير سأتطرق على باب يهم كل من يبحث على مشروع)

في البدايه ::


الوالد الله يخليه ويطول عمره وحيد جدتي وجدي وعايشين في منطقه جنوبيه كان هذاك الوقت مصدر رزقهم الوحيد من الارض اللي يزرعون فيها والغنم اللي يرعونها وكان اعتماد جدتي وجدي على الله ثم على الوالد واتكالهم كله عليه .لان زمان كانو يعانون من الفقر والشقى وكانت هذيك الايام الناس عايشين في بيوت قدم ووسط ذل ومهانه الواحد يدور للقمة العيش تحت الحصى .. المهم الوالد دقته الدنيا دق من جهت الفقر والشقى والمعاناة اللي عاناها من جدي الله يرحمه ..كان قااسي لدرجة انه كان محرمه كل شي حتى الغنم اللي ليله ونهاره يرعى فيها مايعطيه عليها ولا شي .. اليييييين جى اليوم اللي مل منها ابوي وقال لجدي(( انا راح اشتغل وماعاد ابغى اقعد معاك ))..جدي ماتكلم خلاه يروح وبعدين راح يدورشغل .وكلنا ندري ان زمان كانت الوظايف موجوده .. وما كان احد يتعب حتى يدور وبدون شهاده بعد ..حصل الوالد شغل في العسكريه وعينوه في هجره في المنطقه الشرقيه .. استمر الوالد فيها قرابة سنه ويستلم ست مائه ريال (( هذا قبل حكم الملك فيصل الله يرحمه وقبل تزويد الرواتب في العسكريه ))وماكان يكفيه الراتب ولا يتجمع معه لانه كل ما استلم راتب ارسل نصه لجدتي وجدي وهذا غير المصاريف حقته . تعب الوالد واصر انه يحسن عيشته راح وسوى له بسطه صغيره بالخشب في الهجره اللي ساكن فيها وبدا يبيع رز وسكر وشاهي فيها .. استمر على كذا قرابة سنه حتى وسع من المحل وبناه واستأجر الارض اللي هو فاتح المحل عليها . الى ان صار يصفى الشهر اربع الاف ريال من محله اللي هويبيع فيه هذا من غير راتب العسكريه .. حتى انه وضف عامل يشتغل بداله وقت مايروح واشترى له دينه يروح عليها مسافة 150 كيلو يحمل اغراض للبقاله .وربي رزقه على نياته وطيبته حتى انه مافكر في كلام اخوياه في العمل واستهزائهم عليه حتى المدير حقهم كان حساد وماسلم منه يوم شاف الوالد بدى ينجح في تجارته راح وكتب فيه بأنه مهمل في العمل ويتأخر وقال كلام كثير عنه . الى ان جائت ورقة نقله من العمل لمنطقه تبعد مائه وخمسين كيلو عن مكان تجارته راح الوالد وهو مقهوور من اللي سوى فيه المدير .وصبر على اللي جاه منهم واستمر في تجارته رغم بعد العمل حقه من مكان تجارته .صار كل ماخلص من الدوام راح لتجارته واستمر على المنوال قرابة سنتين . صار الناس اللي في الهجر يبنون بيوت على الخط العام ويأجرون المحلات راح الوالد وانتهز الفرصه وراح يستأجرها منهم ويفتح فيها محلات مثل المواد الغذائيه والمواد الصحيه ومخابز وخياطين وكل ما فتح محل راح استقدم عماله وخلاهم يشتغلون في المحلات وبراتب معين ((الايام هذيك ماكان احد يعرف يأجرها على العمال مثل الكسلانين اللي في وقتنا الراهن يأجرون وينامون )) ...المهم .. صار دخل الوالد مايقارب 15000 شهريا هذا صافي الارباح من التجاره غير راتبه من العسكريه . الوالد كل مازادة فلوسه طمع زياده .. وانتهز كل فرصه ماحد سواها في هذيك الهجره حتى انه راح يشتري سيارات كاش ويبيعها اقصاد على العسكر . ومشت معاه هذي الطريقه حتى انه في تلك السنه باع مايقارب سبعين سياره من مختلف الاشكال وهذي الطريقه رفعة من ميزانية دخل الوااالد كثييييييييييييير .. وهذا بفضل الله ..احواله تحسنت وشترى سيارة خاصه له واراضي تجاريه على خطوط عامه بس اللي بقى عليه روحته للديره والزواج (( هذا الكلام كله وهو عزوبي قبل يتزوج امي الله يحفضها ))وفي مشكله بعد كانت تشغله وهي العسكريه لانها كانت تربطه ربط والتاجر تعرفون انه لازم يكون متفرغ لتجارته ولا بياكلونها الهنود . فكر الوالد و قرر انه يأجل فكرة فصله من العسكريه وراح طلب منهم اجازه عشان يروح فيها يعرس ويزور جدتي وجدي لانه صار له اكثر من خمس سنوات ماشافهم رفضو طلبه لان ذيك الايام مات الملك خالد الله يرحمه وكان عندهم مرابطه في العمل وعيت تنفع مع الوالد وزعل لانه من يوم مادخل العسكريه ماقد طلب منهم اجازه ويوم طلب منهم يعيون . خذ السالفه عناد وقدم تقعد مبكر . ورفضو طلبه الثاني بعد لان العمل حق الوالد (( تبع وزارة الداخليه )) الي يقولون فيه القسم يعني حساس )) المهم ..ركب الشيطان راس ابوي وهرب من العمل واتجه للديره ومعاه مايقارب ثمان مائة الف (( كانو مايعترفون بالبنوك تلك الايام )). المهم ...راح الرجال الديره وهو ناكس العقال وملمع الموتر والدراهم تحت السيت . وقت ماوصل الديره وبعد ماسلم على جدي وجدتي وشافهم وشافوه . اليوم الثاني راح يتفق مع مقاول عشان يبني له بيت في الديره وبعدها راح يشترى في الاراضي اللي كان نفسه فيها من زمان .. وصار يتملك الاراضي في الديره لدرجة ان الناس شكوفيه وقالو من فين جاب كل الفلوس؟؟؟ حتى انهم طلعو اشاعات ان الوالد كان يهرب في المخدرات وناس قالو انه سرقها وناس قالو انه ظحك على تاجر وخذها عليه وقالو وقالو ..... كلام كثيييييييييير .. بس الوالد ما مشى مع كلامهم . ولا فكر فيهم اصلا .. المهم انه تزوج هذيك السنه وراح بعده للشرقيه وتوقف في عمله عشان هروبه 45 يوم بعدها قدم تقعد ومشى معه الحال هذي المره وقعدوه .. وراح تفرغ لتجارته والحمد لله صار من التجار الكبار والله يديمها نعمه . بعد مارزقنى للوالد انا واخواني عيشنا عيشه لاهي عيشة ترف ولا عيشة فقر بل عيشه متواضعه كأي بيت احواله عاديه عشان مانتغير مع الضروف بس الشي الوحيد اللى ماودي انه حفزنا عليه الوالد هو تكميل الدراسه فأخوتي الكبار عندما وصلو الكفائه في الدراسه اخذهم الوالد يشتغلو عنده والمشكله انهم من الأوائل في المدرسه . انا الوحيد اللي فيهم قدرت اخذ الثانويه بس النسبه زي وجه بوش ((. ماتنفع بريال . ))
وبعدها رحت اشتغل مع الوالد وخلاني محاسب في السوبر ماركت لمدة لاتزيد عن سنه وبعدها طفشة من القعده والحبسه وقلت له يشوف لي أي شغله غير المحاسبه خلاني سواق مع السواقين اودي بضايع للسوبر ماركت وللأدوات الصحيه . وماطولت في هذه الشغله مو لاني طفشت لا ... بس حبيت اني اعتمد على نفسي وماأبغى الوالد يصرف علي ويعطيني مرتب ...ابغى اعتمد على نفسي واصرف على نفسي بنفسي .(( الرجال يبغى يعتمد على نفسه زي ابوه )) .. فكرة في مشروع واستشرت اخواني واعطوني افكار بس كلها ماتنفع اكثرها حبسه وشغل مكاتب يعني افتح لك محل جوال او محل اكترونيات او محل خضره ....الخ ... بس ماعجبتني ولا فكره من افكارهم ..قعدت فتره افكر الا ان توصلت لشغله تروق لي كثيييييييييير حتى اني ندمت اني مافكرة فيها من زمان وكمان نتاسب كل امكانياتي ومبادئي وتكيفي ...الاااااااااااوهي
((((((شغلت النقليااااااااااات ))))))))
يعني سواق دينه .. والله انها ناسبتني كثيير كثييير .. والدخل اللي ادخله منها فوق الفين ريال شهريا .. وبعدين هي شغله حره ومتنقله في كل مكااان .. زي التكسي وتصلح للعزوبيه اللي ماوراهم شي ابد .. بس يبغالها صبر وسعت بال . وتصلح للي يبي الفلته من المسئوليه يعني منت مسؤول ألاعلى دينتك ..وبعدين اللي يبي يشتغل هذي الشغله مو ضروري انك تبقى في المنطقه اللي انت عايش فيها تودي المشوار المطلوب منك وترجع لنفس المنطقه عشان تدور مشوار ثاني لا كذا مابتستفيد شي ابد لانه هناك احتمال انك ماراح تلقى مشاويركثيره في منطقتك اللي انت عايش فيها . بس انا اقلك وشتسوي .. اول شي الله لايهينك روح اشتر لك دوشق ومخده ..وبعدين ... مثلا انت في الرياض روح مواقف الدينات اللي في منطقة الرياض وقفت وانتظرت خلنا نقول انك لقيت لك مشوار للمدينه المنوره روح وصل المشوار واذا وصلت المشوار لا تحاول ترجع ودينتك فاضيه .كذا ماراح نستفيد شي ابد انتظر حتى ولو يوم كامل مافيه أي مشكله فراشك موجود معك ..اكيد بتلقى اليوم الثاني مشوار بس انصحك اذا لقيت لك مشوار داخل المدينه وانت ماتعرف المدينه مزبووط فانصحك لا توديها . لان الزبون يمكن يقص عليك مثلا يقول لك ابغاك تحمل عفش من شارع كذا الى شارع كذا .. انت مابتعرف الشارع بس بتقله قريب ولا بعيد اكييييييد أي واحد بيقلك قريب عشان تخفض له السعر .. وبعدييييين اذا مالقيت كلامه مزبوط بتاكلها خابوور لانك اتفقت معاه خلاص .. بس لو تبي النصيحه منت مجبور .. خلها للي يعرف المنطقه يعني من اللي عايشين فيها ..المهم .. لو لقيت لك مشوار من المدينه المنوره ..لجده .. رووح لاتتردد وتقول لا ابغى ارجع الرياض ... وصل مشوارك موضرووري انك ترجع لمك واهلك والله مايطيرون .. بس روح وصل مشوارك وانتظر لو يومين مو مشكله المهم انك ماتسافر فاضي وهاذا اهم شي .. ويمكن تلقى لك مشوار من جده للرياض وهذه فرصه عمر تجيك في الشهر مره او مرتين هذ اذا كان حضك حلو .. لان المشوار من جده الى الرياض لا يقل عن الف ومائتين ريال .. الشغله يبغى لها صبر وركوود .وراح تلقى رزقك ان شاء الله ..

المهم يا أحبتي ..

اولا :غرضي من موضوعي وبالتحديد قصة الوالد الله يحفظه ان تكون محفزه للي يبي يدخل في النشاط التجاري
ويبي يبدأمن الصفر ويصعد درجه درجه ويتكل على الله ثم على نفسه ويديرها بمثابرته وبجديته وتفكيره . ..واستغلال النقص التجاري في المنطقه اللي انت ساكن فيها واهم شي التجميييييع .. هذى اهم نقطه . واكبر دليل الاجانب اللي يشتغلون عندنا في السعوديه عمركم شفتم هندي او مصري او بنقالي او يمني جالس كل يوم يعسل في المقهى .او فاتح له حساب في مطعم او بقاله.. لا والله ماتلقى ابد .. ذول جاين يحوشون تعرفون كيف يحوشون يعني يحط القرش على القرش عشان اذا راح بلده استفاد منها .. وبعضهم يستفيدون منها عندنا في بلدنا زي اليمنه وبعض الهنود فاتحين محلات على حسابهم . ونحنا لازم نستفيد منهم . ونحرم نفوسنا بعض الوقت حتى ندخر المال الكافي لفتح مشروع تستفيد منه مدى الحياه . وتقدر منه تبني حياتك .((اما سالفت الدنه )) والله انها مفيده ويبغالها واحد مايتعاايب من شي(( يعني مغسول وجهه )) حتى وان عارضو اهلك واقاربك عليها حاول انك تقنعهم انها شغله مشرفه . ولا فيها أي عيييييب .. ولا تصيرون زي صاحب المثل (( مات من الجوع وانفقع من الشياخه )) ............. هذا اللي قدرة عليه اليوم واعذرونى على القصور او الاخطاء الاملائيه ان وجد ..

وانشااء الله انكم تستفيدون من موضوعي هذا ..

تحياتي لكم

( سواق دينه مر من هنا فقط ))

بصراحه اخوي اولا وقبل كل شي احيي روح الوالداللي عانى الكثييير عشان جدك وجدتك( من جد يرفع الراس ) وثانيا انت مثاااابروتقكيرك حلولأنك تبي تتعب على نفسك اتمنى لك التوفيق من كل قلبي

ما شاء الله تبارك الله

بصراحه عاجزه عن التعبير واخاف ما اوفيك حقك

ما اقول الا الله يخلي لك الوالد ويطول بعمره

ونشوفك مثله أن شاءالله

وعقبال ما نشوف شبابنا العاطل بنفس تفكيرك واصرارك على العمل

يعطيك العافية
مشكوووووور

وونععععععععععععععم بالأباء الي كذا صح ماضيع وقته وراء الراتب في اخر الشهر زي الموظفين السعودين يصرفون ويسددون القروض والاقساط ويصرفون مابقي من الراتب
وهكذا الى متى وفي الاخير مايستفيد من وظيفته شي لكن يدخل فيها الفطنه والعقل واهم شي القدوة وشكرا على موضوعكم الشيق واشكر عاشق الدينه

الله يوفقك ويرزقك

الله يرزقنا واياكم من حيث لانحتسب