حادي / الصمت ..

متحنكف · #1 (**permalink**) 23-05-2009, 12:26 AM

حادي الصمت ما عندي لصمتي بديل
..................... وانت ليله تغافلها الجـفا مـا درت

ويـن اودّيك يـا همّ ٍ بقلبي ثقيل ..؟
..................... جعل تسري بك الليله ليامن سرت

ايه خايف على دمعة عيوني تسيل
..................... ما قدرت اتجاهلها وهي ما أقدرت

كانت اصعب على نفسي من المستحيل
.................... لين سالت على شان الغلا وأعبرت

عزّتي تطلب الفرقــا بيوم الرحـيل ..
.................... لو جروحي على طول العمر ما برت

جيت عابر سبيل ورحت عابر سبيل
..................... والمحبه ربت في داخلي وأكبرت

انت ياللي ليا مالت جروحك تميل ..
..................... الليالي خذت منـّي وما قصـّرت !

لا تسولف ترى ليل المفارق طويل
..................... كـل كلمه على بالك فبالي طرت

شوف عيني وتلقى للمحبه دليل ..
..................... مير نفسي لتقليب المواجع ضرت

طوّل الصمت وأربكت الشعور الجميل
..................... قلت اببعد مدام ان الجروح أكثرت

خل دمعك يسولف للـوداع ويسيل ..
.................... والا انا دمعتي طاحت وهي ما درت

* جابر البطحي

حادي / الصمت ..

الأرشيـــف