العفوٍ حبيبي ،، وبالنسبة لقاعدة الامداد والتموين للأسف ماعندي عنها اي خلفية ، وايضاً رواتب ماعندي اي خلفية ، والطفرٍة كلنا مطفرين بس ييسرٍهـا رٍبـك ... ،
وبالنسبـة للكشف الطبي يالغالي انا بأشرح لك بالتفصيل الممل :
اول شيء يالغآلي لا تنسى + لا تنسى + لا تنسى -> تحلـق شعرٍك إذا كـان طوٍيـل ...
انا ماحد نبهني عن هالشيء ورحت على عمـآي ، وجيت لقيت شبآب كثير شعورهم طويلـة وردوٍهم العسكرٍ من عند الباص وقت التحضيرٍ ، يحضر الاسم واذا شاف شعر المتقدم طويل ، يقول له : رح حلـق عندهم ربع ساعة وبعدها بنمشي ، في حلاق مدري وين يقول جنب الرئاسة في الشآرع الخلفي ، فـ انت بلاش تبهذل نفسك ، خلك جاهـزٍ من بدرٍي وحلق شعرٍك من اليوم اللي قبله .. انا والله شعرٍي طويل ، بس في الصباح خذت لي دش قبل ما اروح للتجنيد ، وحطيت كريم ولبست آيـس كـآب ... قلت يمكن يمكن يمكن يدقرون على الشعور الطويلة ،، وبالفعل هذا الحاصل ... ،
المهـم ، مالك بطوآلها ، تروح للتجند حسب الموعد اللي محددينه لك في الورٍقة حقت الكشف ، تكون محضر على الموعد ، وتجلس تنتظر على بال مايجتمعون كل المتقدمين وبعدها يبدأون يحضرون عند الباصات برى ، فلان الفلاني ،، حاضر ،، ورنا راسك .. خلاص اركب اذا كان قصير واذا طويل ،، شلوٍت محترٍم مع سبق الاصرٍار والترٍصد ...
وبعدها تمشون من التجنيد على مستشفى الحرس بخشم العـآن ، ويخلونكم تنتظرون حق ابو ساعة ساعة وعليها لين مايجي رئيس الرقباء المسؤول عن جميع المتقدمين وهو المرافق لكم من ادارة التجنيد ، وبعدها يجيب اثنين عساكر ويبدأون في تقسيمكم مجموعـآت ، مجموٍعة 1 ، 2 ، 3 ، 4 ،5 ، 6 ، 7 ، 8 ، 9
تقريباً 9 مجاميـع
على فكرة لحظة لحظة ، نسيت اقولك ،، اهم شيء انك تفطر قبل ماتروح لان ماعندهم بوفيه اًٍو بقـالة ... ،
يعني حتى الموٍيـة مافيه ،،
المهم بعد تقسيم المجاميع يقولكم رئيس الرقباء خلاص روحو اجلسو على كراسي خشب زي حقت المدارس وانتظرو وكل واحد يحفظ رقم مجموعته اذا نادو على رقم المجموعة تقوم وتروح مع مجموعتك ، وهكذا ، طبعاً عشان الوقت لايضيع مثلاً مجموعة 1 ينادون عليها ويبدأون يدخلون طلابها واحد واحد على عيادة العيون ،، في هذي الاثناء يدخلون مجموعة 2 على عيادة الطول والوزن ، ومجموعة 3 على عيادة الصدر ، ومجموعة 4 على عيادة سحب الدم عشان يحلوون دمك .... وهكـــذا .... ،
وماراح تحس بالوقت لانك مجرد ماتخلص من هالعيادة توك تجلس على الكراسي الا ينادون على مجموعتك وتدخل على عيادة ثانية ،، وهكــذا ... ،
طبعاً بأذكرك لكم كل العيادات :
1 - عيادة النظـر .
2 - عيادة الطول والوزن .
3 - عيادة الصدر .
4 - عيادة تحليل الدم .
5 - عيادة الانف والاذن .
6 - عيادة الاسنـان .
7 - العيادة النفسية . < اسهل عيادة ، يسألك متى تخرجت وماذا فعلت من بعد ماتخرجت لهلحين .. اشتغلت ، درست ؟ وعلى طول يقلك روح
8 - عيادة تحليل البول ... اكرمكم الله جميعاً . < على فكرة انا افضل للاخوان انهم مايستخدمون دورات المياه الله يكرمكم جميع ، الا بعد مايخلصون عيادة تحليل البول ، لان ناس كثير راحت دورات المياه الله يكرمكم ويوم جاء وقت تحليل البول ،، توٍهقـوٍ ماعرفو يتصرٍفون ... فـ انتبهوٍ .
9 - عيادة تفسيخ السرآويل :
وهذي ياطويلين العمرٍ ، ينادي على مجموعتكم شخص من المسؤولين ويقول روحو على هالعيادة ، وتدخلونها ولكن فجأة ومن دون سابق انذار ، تجد ذاك الفحـل ينتظركم ورى باب العيادة وٍاول ماتدخل يقلـك فسسـخ زي الرٍجال ولا تخلي عليك الا السنآوي ، وتفسخون كلكم في وقت واحد ، ويبدأ يناديكم واحد واحد ويطلبك تسوي حركات غبية امشي اوقف خذ لفة ارفع رجل ونزل رجل ارفع اليد المعاكسة وهكذا ، على فكرة كل المجموعة داخل العيادة ومفسخين وماعليهم الا السنآوي والدكتور ينادي واحد واحد ، ويجلسون يطالعون فيك لين ماتخلص واللي بعدك يجي وانت ترجع توقف مع المجموعة في الخلف ، طبعاً في هذي الاثناء في دكتور جالس في غرفة داخلية بهـ العيادة ، فجأة تسمع صوته ينادي ، فـلان الفـلاني تعال ،، بعد ماتخلص من الدكتور الاول اللي يجلس يطلبك تسوي حركات زي الارقوٍز هههه ، تدخل للثاني بعد مايناديك ، ويكون لابس قفاز يسحب السنآوي من فوقك ويمسك بعض العلوٍم ويطلبك تكـح < عشان يبا يشوف عندك فتاق والا سليم ؟ وبعدها اذا انت حلو يتحرش فيك ويقلك ابشر بعزك ناجح الله لايعوق بشر ، بس كل شيء بحقه << هههههه بيجيه باند اليوم 
لا امزح بس يطلبك تكح وهو حاط اصبعه تحت بطنك في اليمين او اليسار عشان الفتاق مثل ماقلنا ، وبعدها يقلك البس وروح
طبعا في تفسيخ السنآوي ماحد يكون معاك ،، تكون لحالك ،،
وبس ياحبيب قلبي ،، 
هالشغـلانة كلها على بعضها تاخذ تقريباً من الساعة 10 ونص اليييين 3 ونص او 4 او 4 ونص بالكثير
طبعا ادري بتسألني وش 10 ونص ، وهم كاتبين ان التحضير من بدري من 8 مدري 7 ،، لان زي ماقلت لك ينتظرون الشباب يكتملون وبعدها يحضرون عند الباصات تاخذ وقت هذي برضو ، وبعددها مسافة الطريق يعني كلها حق ابو ساعة ونص ولا ساعتين
وخلاص بعد ماتخلصون الكشف يرجعونكم بـ الباصات مرة إْخرى للتجنيد اللي معاه سيارة يرجع واللي مامعه سيارة يدق اومها كعآبي لين التقآطع والا للشآرع العآم وبس
على فكرة في حاجة مهمة إللي هي ، ان تكون مركز مع مجموعتك لان بعض الاحيان تنشغل تتكلم بالجوال والا تروح دورة المياه اكرمك الله ، وفي هذي الاثناء ماتدري الا المجموعة نادو عليها ودخلو على عيادة ثانية ، فـ تتوهق ، صارت لي انا مرة واحده بس الحمدلله لحقت على نفسي ودخلت معهم العيادة ومن بعدها صحصحت صرت مرابط معاهم
طبعاً ادري اني كتبت كل شيء بالتفصيل وكتبت اشياء مالها داعي انها تنكتب بس حبيت اكتبها لاني يوم كنت استفسر في يوم من الايام مثلكم عن الكشف الطبي ،، ولا احد شرح لك شرح تفصيلي واضح زي كذا ،، الحين اتوقع انكم بتشوفون الشرح وبترتاحون
لان اقسم لكم بالله ان الكشف اسهل وابسط مما تتوقعون وترى شغلتها مرة سهلة وهينة ، بس حنا نخاف بزيادة الا ورب البيت الشريف الموضوع ابسط مما تتصورون اقلكم ناس قصار واوزانهم ماشاء الله تبارك الله فوق المسموح به ، ونجحوهم ، ناس فيهم عيوب خلقية ونجحوهم ، ناس عندهم تسوس في اسنانهم ونجحوهم و و و و و و ...... الخ
يمين بالله زي ما اقلكم ياشباب ،، يعني لاتجلسون تقلقون انفسكم على شيء تافه وربي اني كنت بانصرٍع قبل الكشف قلق وخوف ومدري ويش ، وفي الاخير طلع الموضوع ابسط بكثيييييييير مما توقعت بكثييييييرٍ والحمدلله ربي يسر لي اموري ونجحت مع ان وزني زايد حبتين ومكرٍش بعـد ..
لكن الحمـدلله على كل حال ،، وهذي دعوات الوالدة الله يرضى لنا عليها ،، خلو امهاتكم يدعون لكم قبل الكشف
،، من جد ياعووال كبرو عقولكم لاتجلسون توسوسون على الكشف سلاماات ، بعد كل هالشرٍح والتوضيحات التفصيلية ، وبعد مااثبت لكم ان الكشف مافيه تدقيق ، والله معليش اللي بيجلس يقلق ويوسوس هالحيـن هذا مريض نفسياً 
انا ماحد قالي هالكلام قبل الكشف الا كان ارتحت نفسياً وارتاحت اعصابي ورحت وانا مروق ، بس كنت كل ما اسأل احد يقولون والله هاه في تدقيق والله هاه مدري ايش والله هاه مدري ايش
وعموماً لو حصل شيء لا قدر الله ورسبتوا في اي عيادة ، يمديكم تعيدون الاختبار الظاهر مدري اش النظام اللي يسوونه في التجنيد ماعندي خلفية بس اظن يعطونك موعد جديد ، واذا عندك واسطة يكلم لك دكتور العيادة اللي رسبت فيها ،، ويزبط امورك ان شاء الله ولا كأن شيء صار
اما تجلس لي قلقان وانت باقي ما اختبرت سلامــــآت ؟ ؟ ؟
على فكرة الدكاترة اللي هناك مو دكاترة بس ، دكاترة ضباط ،،
دكتور العميد فلان الفلاني ، دكتور المقدم فلان الفلاني ، دكتور الرائد فلان الفلاني
يعني ضباط دكاترة اللي بيختبرونكم لابسين ثياب اغلبهم ، المصآرية الظاهر في 3 مصارية بس حق الاذن والانف وحقين تفسيخ السرآويل
يالله ياحلوٍين معليش طوٍلت عليكم بس حبيت ابيـن لكم ان الموضوع ابسط واسهل واتفه مما تتصورون والله العظيم
واي استفسار وأي خدمة انا جاهز حبآيبي .... 
30-03-2010, 05:29 AM
تكفون ياشباب ارجوكم رجاء حار ان تساعدوني على نشر هالموقع بأكبر شكل ممكن ، لنكسب الاجر سوياً بحول الله تعالى 
العرض العادي
