26-02-2010, 04:27 PM
|
 |
عضو مهم
|
|
تاريخ التسجيل: Nov 2009
المشاركات: 219
معدل تقييم المستوى: 2286
|
|
وبعدين ياشباب حاب اضيف لكم بعض الملاحظات وبعض الاجوبة للاستفسارات اللي وجدتها بالموضوع
اولاً : من ناحية الرواتب افضل شيء الشرطة العسكرية وهذي لايختلف عليها اثنين لان على سبيل المثال / الجندي الشرطة العسكرية راتبه يكون حول 6000 وعليها اما الجندي الفني اذا مرة مرة يمكن يدخل بداية الـ 5000 .. طبعاً الارقام ليست اكيده ولكن للتوضيح فقط
وبالنسبة للواسطات ومالواسطات ترى في عالم معاي جو للكشف الطبي لا واسطاتي ولا واسطاتك مقدمين عاديين يعني لاتجلسون تنشفون حلوق الشعب واسطات ومدري ويش انا معاكم صح ان كل شيء هالايام صار بالواسطة وفي عالم اذا جابت واسطة تمشي ، بس يعني اللي ماعنده واسطة ماله رب يعني ؟ عادي ياخوي قدم وعيش حياتك وانتظر دورك وان ماجاتك اليوم بتجيك بكرة وان ماجاتك بكرة بتجيك بعد سنة والا بعد 3 سنين وعادي يا اخوان مافي احد بيولد من بطن امه وظيفته جاهزة له ، اكيد بيدور عليها ويتعب عشانها ويحصلها
وبالنسبة للي يقول انا معاي واسطة كل مارحت اسأله وشش صار في موضوعي يقولي اوراقك باقي عند شؤون الافراد مارجعوها ، ياحبيبي هذا الواسطة اللي تقول عليه ، انا ما بأظلم الرجال بس اتوقع انه يسوق امها < باللهجة العامية عشان نفهم بعضنا اكثر
انا صارت لي سالفة عند شؤون الافراد من نفس اليوم ارسلو (مراسل) لمبنى الرئاسة مدري اش سوو واخر اليوم الساعة 12 ارسلو مراسل من هناك وجابو معاملتي وخلصتها اليوم الثاني والحمدلله على كل حال
يعني اللي باوصله لك اذا مرة مرة مرة مرة بيطول بيجلس كم يوم او كم اسبوع ويردون عليهم ماتوصل بالشهور الشغلة ، لكن انا انصحك زي ماشفت احد الشباب مثل ماوصاك رح للشلهوب تراه من اكثر من شخص سمعت انه رجال رايته بيضاء ومايقصر مع احد شف وش موضوعك وعطه اياه وسو نفس ماقالك الرجال
وباختصار يالذيابة هذي هي الحياة وهذي هي العسكرية وهذي هي الوظايف وهذا هو حالنا يوم بعد يوم ، هذا جيلنا احنا بالقوة نطابح عشان وظيفة جندي اول الزمان يقول لي ( عمي ) رتبته عميد طيار يحلف بالله العظيم على ايامنا كانو يسحبون الاعرج والاعمى يقولون له تعال توظف بس ضابط
والحين الواحد يجيك بكلية تقنية والا بجامعة ويمرمطون دين اهله ، طبعاً هذا على جيلنا
انتظرونا مع الجيل القادم < اللي بيصيرون يدورون واسطات على سيكيروتية على اسواق لان التجنيد في كل القطاعات العسكرية مايدخلها الا ولد الشيخ الفلاني والا ولد الفلان الفلاني
ياعوووال والله حالتنا مضحكة بس وش تسوون اسكتو ومشو حالكم
وبعدين لاحد يجلس يتخوف يقول طولي كذا وزني كذا ممدري ايش كذا ، ياحبيبي انت وياه انا شفت لكم ناس مدري وش تبي وداخلة تكشف كشف طبي اقزام ودبب ومتان واحد قابلني يوم الكشف الطبي في شؤون الافراد يحلف لي بالله العظيم انه في يوم الكشف الطبي حقه يقول مشو ناس كثير فيهم عاهات تعرفون وش عاهات .؟
الشيء اللي يهتمون له في الكشف الطبي ( المظهر + النظافة + الرائحة )
هذي الثلاث الاشياء عوامل سحرية ممتازة اذا زبطتو اوضاعكم قبل الكشف تلاقون اموركم تمشي زي اللوز يالوز وبعد توفيق من الله عز وجل طبعاً
يعني ياحبايبي هدو اللعب ولاتجلسون تحرقون في اعصابكم واعصاب غيركم ، وصدقوني لو مكتوب لك انت وياه وياه ان لكم فيها نصيب واجتمعت عليك الدنيا ومافيها يحاولون ابعادها عنك مابعدها الله عنك ، ولو جبت واسطات الدنيا ومافيها عشان تتوظف فيها وربي مارادها لك لو تطابح مطابح ماتوظفت فيها
لاتقولون هذا مطوع وجاء ازعجنا والله ياعوال اني ادشر منكم بس ماقلتها الا استنتاج لاكثر من سالفة حصلت لي ولاقاربي وبالواسطات اللي تقولون عنها اللي كل ماقرأ رد في الموضوع القى فيه كلمة واسطات واسطات وكأن الواسطات هي الاكسجين في الحياة ماحد يقدر يتنفس بدونها ؟ !
يعني لاتجلسون توسوسون وتكبرون وتصغرون وربي ياعووال لو لكم فيها نصيب ماتبعد عنك تلاقون الله عز وجل يسبب الاسباب عشان تروحون لها بدون ماتدرون
والله يوفقكم جميعاً ، وتتيسر لكم ياحبايبي وتتسهل الامور وخذو نصيحة مجرب ، اذا بتجلسون تفكرون فيها وتشيلون همها بتتعبون ارموها ورى ظهوركم وعيشو حياتكم لين يجي يومها اما تجلسون توسوسن بانفسكم مو حل 
طبعاً ملاحظة اخيرة : لاتقولون هذا قال بدون واسطة تمشي الحياة ، صح الحياة بتمشي بواسطة او بدونها ، لكن في بعض الامور يبغالها واسطات معروف ، بس اللي ابوصله لكم من كلامي وازعاجي اللي من اول ان الواحد لا يجلس يتلف اعصابه واعصاب غيره بالوسوسة والاهتمام الزايد ، خلاص ياخوي انت وياه سويتو اللي عليكم ، تبون واسطة كلمو لكم اي واحد واصل يتوسط لكم ، وقضينا ولا عد تفكرون فيها اتركوا الباقي على الله ، اقسم لكم بعز الله وجلاله اني كنت ادخل هالموضوع اقرا فيه اول ماقالو لي خلاص اسستلم اوراق تعيينك يعني اشوف كلام من العيال اللي مروا في نفس الكلام يفيدوني ، بس يا اخوان اقسم بالله يلعن ام التحطيم والاحباط كل مادخل اقرا كلام يسد النفس اللي يقول انا مدري ايش واللي يقول انا مدري ايش ، ياشباب انتو مو داخلين تفضفضون هنا معاناتكم ، عندكم منتديات كثيرة ماكثر الله الا المنتديات ، بس ياخي كرهتوني ادخل هالموضوع من التفجيع اللي قاعد اشوفه بالموضوع ، ياخوان انتو هدوا على بعضكم لاتجلسون على قولتهم تزيدون الجرح الواحد يجي يلجئ في هالموضوع عشان يسأل او يستفسر ويلقى العالم انواع الاحباط والتحطيم يكرهون الواحد في الوظيفة من قبل مايكمل اوراق الوظيفة اصلاً .
اقولكم في النهاية قلت بنفسي ماعد بادخل الموضوع هذا خير شر من الوضع اللي صاير فيه
على فكرة ، كلنا اخوان ترى وكلنا نتقبل النصيحة يعني لاحد يزعل من كلامي بس صدقوني في ناس كثير منحبطين من ردود اغلب الناس بالموضوع واكيد في ناس كثير بيئيدون كلامي وبرضو في ناس بيرفضون كلامي ، لكن اتمنى في الاخير ان الاخوان اللي هنا يكونون اكثر لباقة مع العالم وتأكدو ان اللي جاي يستفسر جاي بعد ظروف وخوف ومصايب والا لو مو مهتم بالوظيفة ماجاء عشان يسأل بمنتدى في النت ، يعني لاتجلسون تفجعون بالعالم ، هدو على بعضكم وياخي اعطي لاخوك المسلم امل في الحياة اما الاسلوب اللي حاصل معليش لاتواخذوني كرهني الدخول للموضوع والله
تحياتي لكم ويعطيكم الف عافية ويستر لي على دين اهاليكم واحد واحد ياحلوين
اخوكم المحب لكم والله / حنش الدجاج 
|
العرض العادي
