[align=justify]
السلام عليكم ورحمة الله وبركاته

بإختصار وبعد ما سكرت الأبواب بوجهي وفقدت الأمل بالحصول على وظيفة و قررت أفتح لي مشروع يصير لي مصدر دخل رئيسي وثابت وما أحتاج أحد غير الله ، خصوصاً إني أفكر إنه بكرة بيكون عندي أسرة و أولاد أنا مسؤول عنهم أمام الله أبغى أضمن لهم حياة سعيدة ، و لأن ما عندي رأس مال قررت إني أنسى أو بالأصح أتناسى موضوع المشروع .

مرة من المرات كنت جالس مع شباب في قهوه وكانوا يسولفون عن صندوق المئوية و إنهم متعاونين و يقدمون قروض حسنة للمشاريع و نصحني واحد منهم إني أقدم طلبي يمكن الله يكتب لي وأحصل على قرض منهم و ينفتح لي باب رزق ما كنت أدري عنه ، و فعلاً فكرت بمشروع كان برأسي من زمان و أقسم بالله العظيم إن هالمشروع حلمي وكنت واثق من نجاحه خصوصاً إن المجتمع ما زال محتاج للفئة هذي من المشاريع و فعلاً قدمت الطلب وشرحت مشروعي ، و جلست أنتظر ردهم .

لأني كنت واثق من مشروعي مليون بالمية ما توقعت أبداً يتم رفضه ، و فعلاً بديت أشتغل على الموضوع وإخترت المكان وسألت عن الأجار وطلع مناسب لرأس المال الي طلبته وكان يتراوح بين الميه وخمسين ألف للميتين ألف ريال ، و فوق كذا كلمت العمالة وإتفقت معهم ، و سويت دراسة جدوى للمشروع ، و قررت يكون عندي نظام مكافآت للعمالة من غير الراتب المغري .

لكن طولوا الصندوق ما ردوا ، و قررت أتصل فيهم وأسألهم ، لما إتصلت وسألت الموظف الي رد علي صدمني وقال لي بكل برود مشروعك تم رفضه ، طيب وش السبب ؟ قال إنه ما معي شهادة خبره خاصة بالمشروع ، و يقصد الموظف إن ما معي شهادة خبرة المفروض يحصل عليها العامل مو أنا ، أنا ما راح أشتغل بالمحل لأن عندي عمالة متخصصه في هذي الشغلة ، و أصلا في السعوديه ما عندنا ولا شخص يشتغل هالشغلة ولا أحد عنده هالشهادة ، و شيء طبيعي إنه العمالة بتكون حاملة للشهادة هذي ، صدقوني العيب مو فيني ، أنا كان من الممكن إني أشتغل لو معي هالشهادة لكن ما عندنا للأسف معاهد تدريب متخصصه في الشغلة هذي .

صدمني ، و قلت له مع السلامة و سكرت السماعه ، و قررت إني أنسى الوظيفة وأنسى المشروع ، و سألني أبوي ليش ما توظفت للحين ولا اشتغلت ، و خيرني بين إني أتوظف أو أطلع من البيت ، طيب ليش ما يفهم أبوي إن الوظائف مو بكيفي ؟ و هل لو ما لقيت وظيفة الحل الوحيد هو طردي من البيت ؟ أنا يائس بصراحة من كل شيء و إنسدت نفسي من كل شيء ، ما أحد راضي يفهم حجم الكارثه أو حتى يستوعبها !
[/align]