السلام عليكم ورحمة الله وبركاته
اخوني الاعضاء اليوم بقولكم قصه ومهزله جديده صارت معي يوم الاربعاء الماضي الموافق 24/ربيع الاول/1428
اتصل علي مدير شئون الموضفين بشركة العجو مساعد الرويلي
وطلب مني الحضور لمقر الشركه عشان اسوي مقاله شخصيه
المهم وصلت ورحب فيني الرجال ماقصر
اول سؤال سئلني اياه
وش شهادتك
جاوبته : هندسة كمبيوتر
قال يعني ثانويه ولا بعد الثانويه هذي
ضحكت ورديت عليه
قلت هذي بعد الثانويه تدرس خمس سنوات بالجامعه تخصص هندسة كمبيوتر وتحصل على الشهاده هذي
المهم
سئلني سؤال ثاني
وقال تعرف تطبع خطابات انجليزي على الكمبيوتر
قلت اكييد
قال حلو
اجل عندنا وظيفتين واختر وحده منهم
قلت له تفضل
قال الوظيفه الاولى:
بائع في معرض !!!!!!!!
رديت عليه وقلت له والوظيفه الثانيه
قال ادري ان الوظيفه الاولى ماعجبتك لان دوامها صعب ومتعب
قلت له وماتناسب مجال دراستي هذا اهم سبب عندي
قال طيب الوظيفه الثانيه ممتازه بالنسبه لك وراتبها حلو
قلت هات الوظيفه الثانيه
قال موظف أستقبال !!!!!!!!
هنا انا طارت عيوني من مكانها
حسيت انه قدم لي اهانه بحقي وبحق دراستي
قلت له لو سمحت يا اخ مساعد
انت عارف وش مجال دراستي
انا درست خمس سنوات وتعبت وتغربت عن اهلي وناسي وطلعت برى السعوديه
عشان اجي اتوظف بوظيفه تناسبني
وانت تقول لي موظف استقبال وبائع
ياخي هل انت ترضاها لنفسك او احد من اخوانك
يكون معاها هالشهاده وهذي وظيفته
قال لا
قلت اجل اذا ماعندك وظيفه مناسه لي ليش تتصل علي وتطلبني
عشان تفرد عضلاتك علي وتنزل من قيمة شهادتي
انا اصلا غسلت يدي منك من قلت لي هندسة كمبيوتر تعني ثانويه
هذا اكبر دليل على انك مو متعلم
طبعا هنا انا تنرفزت <<لاكن مسكت نفسي شوي
وقلت له
عندكم مهندسين كبيوتر بالشركه
رد علي وقال ايه
قلت كم واحد وش جنسياتهم
قال 3 واحد سعودي و 2 هنود
قلت له الاجنبي حاطه بمجال تخصصه وانا يالمواطن ابن البلد تبي اصير لك وللهندي موظف استقبال
اخذت اوراقي وقلت له حسافه انك سعودي وطلعت من المكتب
هذي كانت اول مقابله لي مع هالشركه
اتمنى انكم تاخذون الحيطه منهم
والي يبي الوظيفه هذي موظف استقبال براتب 3300 ريال
يروح لشركة العجو
شارع الستين بالرياض فوق بناية مكتبة المكتبه