السلام عليكم ورحمة الله وبركاته

أخواني الغوالي

علطول وبدون مقدمات

حبيت أقولكم أني تعبت وأنا أدور وظيفه ولم أجد حتى الأن بسبب مؤهلاتي!!وللحين أنا طالبة وماتخرجت

ففكرت بمواهبي الشخصيه اللي ممكن تفيدني

أنا أنسانة أحب أطبخ الأكلات الشعبية السعودية وحلويات البيت والأكلات الرمضانية..وبمهارة فائقة..


بس ماأعرف كيف ممكن أستغل هالصفه اللي فيني وأستفيد منها مادياً؟؟

فكرت اني أطبخ من بيتي وأبيع بس أنا أحياناً ماأملك في محفظتي حتى ريال واحد,,,,,فكيف أقدر على شراء مقادير الطبخ والأواني!!!والأهم كيف أوصل هالأكل للناس؟


صرااااااااحه تسكرت الدنيا بوجهي

بس أبي منكم أراء وأفكار


هل من الممكن أن أجد أحد يتعاون معاي وننجز شيء سوا؟؟

هل من الممكن أني أستغل هالموهبة اللي عندي بدون تعقيد أو تكلف؟؟






الله لايهينكم ابي ردودكم ومساعدتكم

يسعدني اني ارد عليك يا غالي
شرف كبير للمنتدى بتواجدك الكريم
لانك انسانه ما وقفتي امام الصعااااب واجهتيها
وحلو انك فكرتي تعتمدي على نفسك وعلى الموهبه اللى الله وهبك هذه الهبه
والله انا من المؤييدين لك يا غاليه
وبالعكس يكفي انك ما استحيتي مثل بعض البنات
انا من رايي اول شي انك تروحين للمطاعم الشعبيه وتعطيهم قدر مجانا يبيعونه ويشوفون ربغه الزباين عليه اذا مشي وشافوا الاكل معاك تماام وتستفيدين امرين الاول انها صدقه والثانيه تشوفين الناس تقبل عليه والا تتوهمين ان طبخك حلو << لا تزعلين بس الناس اذواق
اكيد بيستمرون معاك ويكثرووو عندك المطابخ و لازم تتعبين في البدايه وشويه صبر والله بتفتحين مطعم باذن الله
وخلي املك بالله كبير وان شاء الله ربي ما يضيع تعبك
واذا على المقادير واغراض المطبخ حددي ايش اللى تحتاجينه وان شاء الله اللى هنا ما راح يقصرون
وانا اولهم
والله يوفقك يارب ويحقق لك طموحك

تحياتي لك
اخوك
فؤاد

وزعي صور بالطبخات على المنازل القريبة والقريبة جداً منك وبالأسعار
صدقيني الطبخ المنزلي مطلوب كثير ويفضل الكثير الأكل من طبخ المنازل
وإن شاء الله تتوسعي مستقبلاً وتكون لديك سيارة لتوصيل الطلبات
وفقك الله

هلا فيك ودام ربي معطيك النفس الحلو اهم ماعلى الناس اليوم بطنهم
ونصيحة اخ لك ابدي من بيتك وجيرانك وتاكدي رايح تاصلين ومايحتاج تشترين اغراض
اغراض البيت عندك
ومن اي منطقة انتي والاهم ابي تركزي على الاهل والاصدقاء والمعارف وترى دعواتهم ودعايتهم لك مجانيه
من طبخ الاكله ومنين الحلا بسرعة البرق الانتشار
وي مشاروه ونا اخوك جاهز كل الود

والله ما عندي زود على كلام الاخوان واذا فيه مناسبه عند احد اقاربك قوليلهم انا بسوي شغله من عندي وخذيها واذا سالو عنها قوليلهم اذا تبون اسويلكم هي واوصلها كمان وعندي قائمه بالاكلات الا اسويه والحلويات مع الاسعار
ولا تنسين احنا في وقت صيف ومناسبات وجمعات وسمر وسهر وانتي وشطارتك يا عسل
والله يوفقك واعطينا الاخبار

أنا سويت مثل ماقلتوا من زمان

طبخت لأهلي وصديقاتي والجيران واخذت معاي للجامعه وأخذت أراء ناس كثير

وكلهم أثنوا على طبخي,,,وأي شيء أسويه لازم أنسأل عن طريقته ولله الحمد


لكن...أفكر لو طُلب مني طبخه لاأملك مقاديرها؟؟

أو طلبوا مني توصيل أي طبخه لمكان بعيد ومالقيت سيارة؟؟


وش أسوي؟؟بأفقد مصداقيتي أمام الناس!!وهذا مو بيدي


كل ماحليتها من ناحية خربت من ناحية ثانيه



*بس صراحه اعجبتني فكرتك أخوي فؤاد يوم قلت:

أعرضي قدر مجاناً على مطعم!!


صراحه فكره حلوووووووهـ والحمدلله أنا واثقة من طبخي,,,لكن معقوله فيه مطاعم يقبلون هالعرض؟؟


بأستفسر من بعض المطاعم القريبة


ومحلات الحلويات,,,,لأن عشقي هو طبخ الحلا المنزلي


وربي لو لقيت تجاوب,,,أني اكون أسعد أنسانة بالدنيا



الله يسعدكم أخواني الغوالي

الله يوفقكم ويرزقكم من حيث لاتحتسبون بصراحه كلامكم شجعني وأفادني كثير كثير



يعطيكم ألف عافيه

واللي عنده أي أقتراح أو فكره جديدة لايقصر تكفووووون

صح نسيت أقولكم

اللي يعرف مطعم أو صاحب مطعم بالرياض ممكن يقبل أني أتعاون معه يدلني عليه الله يسعده


وبعد لو تبون تجربون طبخي ممكن تحددون لي وش تبون؟؟حلا وألا معجنات وألا أكلة شعبية,,,,,,وممكن أوصلها لكم بأي منتزه أو مكان وتكون مجاناً كتجربة>>>بديت أسوي دعاية لنفسي هههه

من جد أنا مستعدة لهالشيء بس بشرط أني أوصل هالطلب لأجتماع أهل أو حريم بملاهي أو منتزه عائلي بالرياض وممكن يتعرفون علي من هناك,,,ويكونون فاتحة خير لي

ممكن اذا اوضاعك الماديه مو كويسه تطلبين فلوس على توصيل الطلب ممكن يكون المره الاولى مجانا عشان تكسبينهم بعدين لا عجبهم شغلك قوليلهم طيب بس انا اخذ على التوصيل 15 او 20 انتي شوفيه وش كثر المكان بعيد او قريب منك وحددي بس خليك معطيتهم خبر ان المره الاولى انا اوصلكم والمره الثانيه راح اخذ اجره على التوصيل وهذا شي عادي ومن ابسط حقوقك
وانا عني راح اقول لبنات عمي وقريباتي هم مجنونات حلويات وانا بعد
واي شي تبينه لا يردك شي
وبالتوفيق

ايه بالنسبه للمطعم اختاري مطعم شعبي قريب منك دقي عليهم وقوليلهم الفكره عشان لو صار اتفاق معهم مستقبلا يكون التوصيل لهم سريع وقريب منك
وانا ارشحلك بعض المطاعم الروما نسيه وغوزي وممكن المطبخ السعودي
واذا كلمتيهم قوليلي وش صاااااار معك

وعليكم السلام ورحمة الله وبركاته
اختي مالي بالطبخ صراحه بس حبيت أساعدك
دام متوفر عندك النت استغلي المنتديات النسائية لعرض طبخاتك بالصور
واي اوردر تسوينه لزبون ضيفيه للعرض حقك
تقدرين تسوين لك بيج او سبيس عالنت تخلينها لعرض المنيو مع الصور والاسعار
وتستقبلين فيها اراء الزباين اللي تعاملوا معاك
وبعد سوي لك كرت ووزعيه على المدارس (استهدفي فئة المدرسات) راح يكون عليك طلب صدقيني وبالنسبة لتكاليف المقادير في البداية اخذي المبلغ مقدم لين توقفين على رجلك وعقب خلك مرنه مع الزباين لو كنتي بالخبر كنت هريتك طلبات
موفقه