الـنـاس أشـكـال وألــــــوان

قلب المملكة · #1 (**permalink**) 15-04-2007, 02:19 AM

الناس شافوا ضحكتي بعض الأحيان

قالوا ياحظه ويـن يلقـى السعـاده
ما يعرفون إن ضحكتي كلها أحـزان
ضحكت شفاه وبس... ماهي زيـاده
اضحك وأنا قلبي على الضحك شفقان
أجامـل الضحـاك وابـدي إشــاده
اضحك وأنا كن الحشا فيـه نيـران
قلبـي يصالـي جمرهـا والرمـاده
اضحك وهمي بالحشا طـور هامـان
ودي بنسيانـه ولا بــي جــلاده
والله زرع في داخلي صبـر وإيمـان
ما بان حزني لو عظيـم اضطهـاده
ونسيت همّي يوم شفت الـذي بـان
في طبـع نـاسٍ مهتويـن القـراده
سبحان ربٍ فـرّق إنسـان وإنسـان
كلهـم بشـر وتخالفـوا بــالإراده
متخالفـه اطباعهـم نطـق ولسـان
ومتشابهـه أوصافهـم والــولاده
بعض البشر كن الحسد عنده إدمـان
إذا شاف الفرح عندك تجيه البـلاده
يكره ويحقد ما يبـي يفـرح فـلان
أشقاه طبعه والجـزع صـار عـاده
وبعض البشر يفرح بتقطيع الأبـدان
بأعـراض خلـق الله يثـوّر زنـاده
يزداد بذنوبـه تبـع كيـد شيطـان
أغـواه بـدروب الجهـل واستقـاده
ما يعرف انه يـوم يوقـف وينهـان
يتبع إبليس وضيعـه عـن رشـاده
وبعض البشر يزعل إذا قيل غلطـان
زاد انفعاله وما رضـى فـي وكـاده
لا وا عجايب تنصحه نصح الأخـوان
وما يشكـرك متكبـراً فـي عنـاده
وبعض البشر يفرح إذا قيـل ذيبـان
زود أفعاله عجـل مـا هنـا ركـاده
وده السمعه حتى لو كان مـا كـان
والمشكلـه يمكـن ينـول السيـاده
وبعض البشر مع ربعه اليوم ما عان
في حالتـه يبغـى نظـر واستعـاده
قاطع رحم وعنده من الدين نقصـان
وأمـه وأبـوه ملازميـن الوسـاده
وبعض البشر من ماضيه صار قرفان
طبعـه جديـد وغيرتـه الشـهـاده
خلّى سلومه راعـي العلـم والشـان
غيّر طباعـه بعـد طـول اجتهـاده
وبعض البشر يسعى لمنصب وسلطان
وحاله تغيـر مـن قـرار اعتمـاده
راح وهجر ربعه نسى كـل عرفـان
نسـى حياتـه وانفـرد بابتـعـاده
وبعض البشر فيهم دوا كل وجعـان
عنـده دوا مـا تحصلـه بالعيـاده
دواه نفسـي وامتلـك كـل وجـدان
بيـن البشـر يملـك بفعلـه ريـاده
فيه الرجوله والكـرم ذرب الأيمـان
متمسـك بأصلـه وشغلـه عبـاده
له مجلسٍ في كـل الأوقـات مليـان
محبوب عند النـاس والطيـب زاده
شفت... البشر فيهم على كل الألوان
والقلب الأبيض احترص من سـواده

للشاعر\\\ عبدالله بن صبيّح