................................
عند إقتراب صالح إلى مبنى مركز الهيئة ، يرى كثرة السيارات من بعيد وعند وصوله يرى تجمهر عدد غفير من الصحفيين
يحملون الكاميرات والمايكروفونات ، يحيطون بالمركز من كل جانب ، وقد أغلق باب المركز من الداخل ،
دون استجابة لكثرة تساؤلات هؤلاء المتطفلين ..

صالح : خير يا جماعة وشفيكم مجتمعين هنا عند المركز ..
أحد المتجمهرين : والله ما ادري بس شفت اللمة قلت يمكن في مضاربة ولا حادث ولا .. يقاطعه أحد الصحفيين ،
أحد الصحفيين مبتسما : أنت تشتغل هنا في المركز يا أخ ..؟؟
صالح : لا
الصحفي : أجل وش دخلك .؟؟

صالح يخترق الحشود ، ثم يطرق الباب ، ويصيح بأعلى صوته ،
ياشيخ أبو معاذ ياشيخ أبو اسحاق يا أبو علي _ العسكري الصامت _
ولكن دون مجيب ..
صالح : والله ياشيخ لأنصركم بقول الحق والله ثم والله ،
صالح ( ينادي الصحفي) : لوسمحت ياسيد ، أنت صحفي صح ؟؟؟
الصحفي : لا عارضة أزياء ، وليه أنا ماسك المايك ومعي مصور ..؟؟؟
إيه صحفي خير وشتبي أنت ؟؟؟
صالح : ياخوي أنا أبي أقلكم الحقيقة ،
الصحفي ( ابتسامة صفراء تعلو محياه ) : قول يا أخ قووول ..
صالح : ترى كل الي مكتوب بالجريدة ، كذب في كذب ،
أنا كنت مع الشيخ أبو معاذ أمس
وكنا ... الصحفي( يقاطعه ): لحظة لحظة خلني أشغل المسجلة ،
الصحفي : تفضل ، بس من البداية الله يخليك..
صالح : أقول ، كل الي انكتب في الصحف هو خرطي ..الصحفي يقاطعه
مرة أخرى ،
الصحفي : ياخوي مالك شغل بالجريدة ، انت قل القصة على طول ..
وياليت لو تأكشنها شوي،،
صالح : بس الي انكتب كله كذب ومووب صحيح وإفتراء
على جهاز الهيئة المبارك ..
الصحفي : أقول لا تفلسف ، نبي قصة فيها أكشن ..
صالح : وش لون يعني ..؟؟
الصحفي : يعني تكون قصة مثيرة للقراء تفهم أنت ولا لا ؟؟؟
صالح : أقول يابن الحلال أنا باقولك الحقيقة والي صار هو...
..(الصحفي ، يسحب على صالح ، ويروح في جهه أخرى من المبني

صالح تقفل معه ـ، ويركب الكراسيدا ، وينطلق وهو غاضب . باتجاه حارته الشعبية ..ثم يتوقف عن البقالة
( حيث اجتماع الشلة عادة ) فوق الدكة ..
ويلبق الكراسيدا بعيدا عن الطريق ، وينزل، وهو حائر يفكر بالذي جرى له ..


يتقدم شخص شاحب الوجه ، لم يتبقى من أسنانه سوى واحده في الامام ،
وقد تعهد السوس باسقاطها عاجلا غير آجل ...
أبو سنة : سلام يابو ..
صالح : وعليكم ..
أبو سنة : وينك يارجال ساحب على أمنا سيفووون ؟؟
مسوي فيها ، والله العظيم من بعد ماشريت الكراديسا ، وأنت ماتعطينا وجه ،
صالح : أولا اسمها كراسيدا ، ثانيا : يابن الحلال أنا رجال مشغول
شايفني فاضي مثلك ،
لا شغل ولا مشغلة ، مغير على شرب هالتتن و أذية الرايح والجاي ،
أبو سنة : الله الله يابو صلوح ، الله يرحم ، يعني صرنا محنا قد المقام ،
وإلا أيش ؟؟؟
صالح يفكر بعمق ، ( على غير العادة ) ويزفر بشدة : اففففففففففففففف ،
الله المستعان على هذي الحياة .. عجايب والله يابو سنة ،
قسم بالله عجايب ..؟؟
أبو سنة : خير ياخوي وش الهرجة ، ترى ماحب الي زي كذا .
؟ لا تكون فكوكي ،؟؟ _ مصطلح حواري _ لا أنصح القارئ بمعرفة معناه الدقيق ..
صالح : يا أخي ، في ناس في هذا البلد ماهمها إلا تخرب
وتشوه سمعة الاسلام والمسلمين ،ورجال الهيئة ، الله يعطيهم العافية
يا خي والله العظيم لومووب الهيئة كان تشوف الفساد في كل مكان أي والله ،
الله ينصرهم ، الله يخليهم ويخلي الي جابهم ياشيخ ...
نظرة إعجاب تعلو محيا أبوسنة وهو يقول :
أبو سنة : أخصص ياولد ، والله محسسني أني مشغل قناة المجد وأنا جالس
أسمعك كذا ...
صالح : أقوول الشرهه موب عليك ، علي أنا الي أتكلم مع واحد مثلك ..
صالح يشغل الكراسيدا وينطلق إلى حيث لا يعلم ..

اليوم الثالث /
ترررن تررن ....ترررن تررررن .........
صالح وهو نائم منذ يوم ونصف : افففففففففف وش هالجوال مغير يطنطن ،
الي يشوفني يقول وزير الصحة ...
صالح : هلا
المتصل : سلام عليكم ورحمة الله ، أنا مندوب شركة ( مكاوي روبي ) ..؟؟
عندنا مكوى ، قوي وفعال وسعره فقط 6000 الآف ريال سعودي ،
وبامكانك شراء المكوى باقساط ميسرة ...
صالح يقاطع المتصل بصوت عالي ...
صالح : أقول ورى ماتقفل السماعة ، لأجي اكسر مكواك على راسك ..؟؟
المتصل : أخوي أنا مجرد مندوب مبيعات ، وعلى باب الله ،
( بصوت حزين ) والله تعبت ياخوي من هالشغلة ،
كل ما اتصل على واحد يهزأني ،
والله موب حاله هذي ..
صالح : طيب لا تبكي يابن الحلال ..
المتصل : تصدق مشترطين علي الشركة أني ما استلم راتب لأين أصرف لهم بضاعتهم الخايسة على أي احد وبأي طريقة ..
تكفى اخوي تشتري مني
الله يرحم والديك ،
صالح : لا حول ولا قوة إلا بالله ، يابن الحلال حنا موب لاقين الي ناكل به ،
نروح نشتري مكوى بستة الاف ..؟؟؟ اقولك ، ياخوي أنا عندي لك نصيحة ،
المندوب : سم أنا أسمعك ..
أنا أشتركت في منتدى ممتاز جدا ، اسمه على ما أظن ( منتدى حلول البطالة في السعودية ) ويوفر فرص كثيرة للسعوديين ،
ودايما ينزلون وظايف للسعوديين ،
يا خي رهيب هالمنتدى .طيب أنت سعودي؟ ،
المندوب : أي نعم سعودي ، شايفني علي عوض ، علشان مندووب ؟؟ ،،
أقول إما تشتري ولا تشوفلي شغله عندكم بالمنتدى ولا بأي مكان ،
صالح : أقول يالطيب ، قرأت في المنتدى البارح قبل لا أنام أن فيه تقديم على مركز التجنيد ،
ويقلك طالبين خريجين ثانوي ، وش رايك ، نقدم أنا وأياك ،
على الموقع ،
المندوب : أي والله رأي زين ، بس كيف التقديم؟؟
على الانترنت ولا لازم نروح لهم هناك في المركز؟؟؟
صالح : لا ياخوي ماعاد تروح ولا مكان ، قدم على الموقع ،
وتراه بكرة آخر يوم ، لا يفوتك ..
المندوب : الله يجزاك خير ، فكيتني من هالشغلة المقرفة ،
صالح : ( بضحكة مزعجة ) هععخخخععع لا تستعجل يمكن ماتنقبل وترجع لهم ،
المندوب : لا يارجال قل خير الله يرحم والديك ..
صالح : توكل على الله ، وانا اليوم بادخل بياناتي ، وإن شاء الله نتقابل في مركز التجنيد بعد القبول النهائي ،
المندوب : على خير يالله مع السلامة ،



بعد فترة من الزمن أضنها اسبوع /

صالح : بصوت عالي ، (وكأنه حاز على بطولة كأس العالم) : يمه يمه يمه...
أمه : لاحول ولاقوة إلا بالله ، والله ياوليدي من بعد الحادث الي صار لك
وأنا أشوف حالك موب عاجبني عسى الله يجيب العواقب سليمة ،
خير ياوليدي وش عندك تبي اسويلك غدى ..؟؟
صالح : أبشرك يايمه أبشرك ، طلع اسمي في القبول النهائي لمركز التجنيد
في مكة المكرمة
والدورة بعد شهر ، اللهم لك الحمد والشكر ..
أمه : مبروووك مبرووك ياولدي الله فرجها عليك ،
وأنا قلتلك مابعد الضيق إلا الفرج ، بس إلزم صلاتك وبرك بوالدتك ،
والله بيرزقك ..
صالح : هذا كله بفضل دعاك يالغالية عسى الله يطول لنا في عمرك
ويجعلك ذخر لنا ..
أمه تحظن الولد وتسلم في جبينه ، وتدمع عيناها من شدة الفرح **
الله يوفقك ياولدي الله يوفقك ........


النهاية ...
هذي نهاية كل عاطل سعودي ..






تنويه قد لا تكون النهاية مرضية لكل من تابع قصتي منذ البداية ، وإنما كانت مجرد إشارات ، لما شاع في مجتمعنا ، من مشكلات ، لايمكن حلها بمجرد الافتراضات القصصية ، اعتقد انها تحتاج لعمل كل واحد منا ، واعتقد اننا جميعا نشترك في حمل المسؤولية .. والله يوفقنا لعمل ماهو خير لنا في الدنيا والآخره ..)

تقبلو تحياتي / عــاطل مو باطــل *

يعطيك العافية سناريو رائع....لأحداث واقعية
شوهت صورت بلدنا وديننا من بعض ضعاف النفوس والجهلة من الناس...
مشكور وتمنياتي لك بالتوفيق...ومزيد من الإبداع....

يارجال على الملازيم انك تحوففه <<خربها الرجال
انت وش رايك نعلف كتاب
قصدي نؤلف كتاب ونسمية(من روائع عاطل وصعفق)
ونخلي واحد من الشباب يصرفة لنا
ترى واحد من الاعضاء ذاك اليوم اشتغل في مكتبة
بسرعة قبل مايطير الرصيد الي بالصرافة <<500ريال
قبل لاتجي فاتورة الجوال(طلع مخي تجاري ههههه)
تقبل مروري

[gdwl]المندوب : سم أنا أسمعك ..
أنا أشتركت في منتدى ممتاز جدا ، اسمه على ما أظن ( منتدى حلول البطالة في السعودية ) ويوفر فرص كثيرة للسعوديين ،
ودايما ينزلون وظايف للسعوديين ،
يا خي رهيب هالمنتدى .طيب أنت سعودي؟ ، [/gdwl]

اخوي عاطل مو باطل

ابدعت واعجبتني الدعايه لمنتدانا

ما شالله عليك تسلسل احداث جميل ومنمق<<<وش جاني على كلمة منمق اليوم ماسكه معي

مشكوور استاذي ابدعت فعلا بكل الاجزاء الثلاث

ماشاء الله

بارك الله فيك

جميل ماكتبت

عاطل مبــــــــــــــــــــــــــــــــــــدع
روعه متابعه من الاولى زي عزيز المشاهد خخخخخخخ
الله يرزقك بالوظيفه ويوسع في رزقك

وثيقه مرت من هون