اهلين اخواني
فيه مشروع حبيت استفسر عنه

وهو مشروع نسخ مفاتيح وبيع كوالين وسباح

هل هذا المجال فيه ربح
واين اجد مكائن النسخ للمفاتيح الابواب والسيارات

وهل فيه ايضا مكائن لنسخ
للمفاتيح الي على الكمبيوتر مثل السيارات الحديثه

واين ايضا اجد المفاتيح والكوالين التي تباع بالجمله

وابي سباح تكون كثيره وسعرها معقول حيث واحد قالي هناك
شخص اشترا مليون سبحه بعشرة الاف ريال هل هذه موجود

ارجو من من جرب هذا النوع من التجاره ان يخبرني عنه
وهل فيه نشاط وهل تنصحوني بالدخول فيه
ولو اردت عامل لديه معرفه بالامور هذي بدون نقل كفاله يعني راتب بس

وللعلم انا من بريده


وشكرا

الله يرزقك

ودي اساعدك
بس للأسف لايوجد لدي معلومة
ربي يوفقك

مشكورين عالمرور

وياليت يتم الايضاح
وشكرا

اولا اخوي المشروع مره حلو وانا كنت افكر فيه من زمان بس بصراحه ما نب فاضي وفيه ذهب وانا جاد في كلامي ولكن بشرط صاحب الحلال هو اللي جالس فيه ...
انا سويت له دراسه وكان المشروع مشجع حتى الى الان وانا افكر فيه ....
طبعا المحل راح يكلفك تقريبا 15 الف (هذه زياده من عندي ) للتجهيزات من مكائن واجهزه المكائن فيه
1- مكينه قص المفاتيح العاديه .
2- مكينه لحفر مفاتيح السيارات الجديده يسمونها مرسيدس .
3- جهاز برمجه للمفاتيح للسيارات الجديده
4- مفاتيح ابواب ومفاتيح سيارات اصليه وتجاريه وكوالين منازل ( هذي جبها من الصين او دبي )
والله يرزقك انشاءالله وتوكل على الله ,,,,,,,,,,,,
لا تنسى تقول ابحط فيه عامل واراقبه اذا قلت كذا فانت مع الاحترام مو راعي تجاره .
للمعلوميه لازم يكون الموظف فيه سعودي ولا يقبل بالاجنبي

ما قصر اخي ملكي سدير كفيت وفيت
وتوكل على الله وترى الايجارات بريده حلوه ورخيصه عندك الصفراء الفايزيه
ورايح تجد سعودي راتبه من الف واربع مائه الى الف وست
مع وجد عامل عندي ولا سيرلكني ارخص وتحت كفالتك وبا التوفيق
ولو تبيني شريك ترى معك
كل الود

بالتوفيق .

هلا بالاخ ملكي سدير
مشكور على تجاوبك
لكن من وين احصل هالاجهزه وكم تكلفتها
وبالنسبه للعامل فانا ياخوي عندي دراسه
ولااعرف اني اسوي الشغلات هذي
هل فيه محل تدريب زي كذا

وبالنسبه للمفاتيح الي الموحده يعني لو عندك بيت تبي تخلي كل بيبانه مفتاح واحد وين تحصله

والمسابح على كم بكميه كبيره

واسف عالاطاله
ومشكورين جميعا عالرد
.

مفاتيح الكمبيوتر أصبحت مفاتيح عادية تنسخ بالطريقة المعروفة
ويتم تركيب الريموت في المفتاح الذي بصفته برمجة للسيارة
بمعنت يتم تغيير المفتاح ويبقى الرموت نفسه
وفقك الله

^^^
تابع
بالنسبه ياخوي ملكي سدير
اشوف انك لك معرفه بالصين بسبب موضوع اخر لك بهذا القسم
فياليت تحدد قيمة الاجهزه الخاصه للمفاتيح المذكوره بردك ولو في شركات منافسات
ياليت تخبرني عنهن من ناحية التكاليف والافضل والصيانه لاني
كما تعلم طالب جامعي وعلى قد حالي وابي الزين لي

وياليت تشوف لي كميات كبيره من المسابح على كم

ونت ذكرت بردك
4- مفاتيح ابواب ومفاتيح سيارات اصليه وتجاريه وكوالين منازل ( هذي جبها من الصين او دبي )
ياليت توضح كم اسعارها واتمنى تشوفلي الرخيص والزين

لو فيه ميدليات وابواك متنوعة الاشكال فياليت تشوف كم السعر

حيث حسب مااسمع الان الاسعار هناك تكون رخيصه مره فياليت تكون كما سمعت
ومع الف سلامه