قصة العطاله والوظيف خخخخخ

يا اهل الخير · #1 (**permalink**) 06-08-2009, 10:54 AM

السلام عليكم
الحمد لله على كل حال لك الحمد والشكر يارب

سنوات طويله انتظرت الوظيفه وعندي واسطات قوويه بس ما عندك احد رتب ومناصب على الفاضي

تخرجت عام 1419 وجلست عاطل تقريبا 3 سنوات بعدين حصلت وظيفه في القطاع الحكومي

جلست فيها تقريبا سنه بعدين فصلت لضروف اجبرتني حاولت ارجع بس ما باليد حيله

كل مارحت لواحد اقوول رجعني يصررف ولا ما عنده سالفه والله حرام فيهم المناصب

المهم جلست بعدها تقريبا 6سنوات وانا كل شوي بمدينه ومحافضه ابي وظيفه بس ما لي نصيب
استقريت اخيرا في الريااض وجلست ادور في الشركات والدوائر الحكوميه اي وظيفه بس للاسف
حضي موزين الله المستعان بس
صار ليلي نهار ونهاري ليل ما يأست من اي شي احاول ابسط عمري باي شكل من الاشكال

وربي كاتب لي رزقي
المهم في يوم من الايام بالصدفه قابلت واحد من اخوياي كان يدرس معاي من صف اول ابتدائي لين ثالث ثاانوي طبعن كل واحد اخذ علم الثاني ونذكر ايام زمان وانواع الوناسه
قال بشر وش انت فيه قلت على باب الكريم لاشغله ولا مشغله قال افا قلت اي والله خليها على ربك بس
قال ربك ييسرها والله يووفقك ويصير خير المهم تعشينا سوا وعينا من الله خير واخذ رقم جوالي
بعدها كم من يووم اتصل علي الصبااح وانا نايم وانواع الحلام

رديت على الاتصال طبعا ما شفت الرقم عيووني رايحه فيها من الغمص

قال الو قلت اهلين قال نايم قلت ايه قال قووم بسررعه
قلت انت مين وش عندك مزعجنا على الصباح

قال معاك فلان قلت هلا والله يا الله حيه بصراحه انخرشت
قال جهززلي الملف واي خبره عندك حطها في الملف قلت عندي خبره في عدد محافضات المملكه ومدنها

فززيت وغسلت وجهي ولعنة الشيطان وجهززت الملف واتصلت عليه قلت اجيك قال لا ابجي الليل اتقهوا عندك واخذ ملفك قلت اسعدها من فررصه جاني بالليل واعطيته ذا الملف الجديد احس انه احلا ملف شريته

المهم الرجال قال بيصير خير وبنكون على اتصاال
مر اسبوع اسبوعين شهر وما فيه شي ما قدرت اتصل عليه واحرجه مسوي ولد مؤدب:o
قبل يومين تقريبا جااني منه اتصال الصباح شفت الرقم ويدي على قلبي اقوول الله يستر بس
المهم قال وينك قلت تحت البطانيه المكيف قووي شوووي

قال اسمع بكرره تتصل علي الصباح وتجيني عملي قلت تامر امر عززمته على الغداء قال مشغوول
قلت اوك باكر اتصل عليك قال اوك تامر شي قلت سلامتك
طبعا رجعت الفراش ابي انام ما قدرت قلت ياولد عليك با الانترنت لين يجيك نووم
المهم جلست الين الضهر صليت وتعووذت من الشيطان ونمت ابشرركم

صحيت العشاء
بعد ما صحيت وصليت قلت ياولد وش تتوقع بكره المقابله اتصل على كم من واحد من اخويااي
الي مثلي من مدينه الا مدينه حضنا اقشر

ما عندهم سالفه مثلي
قلت ابروح عند اخوياي في الاستراحه نلعب ونسبح ابشركم فززت في البلاستيشن

المهم جلسنا الا بعد الفجررجعت البيت افطرت وعينة من الله خير قررب موعد المقاابله
وقلبي يقوول طربق طربق قلت ياولد بلا طربقه انت ذيب حسيت اني قووي

الطامه الكوبرى

جيت عند جوالي ابي افتح مفتاح القفل مو رااضي يفتح وافكك اوم الجوال واطفيه ومو راضي يشتغل جلست تقريبا نصف ساعه عليه ومو راضي يفتح طبعا اكل عليه الدهر وشرب :o
قلت وش الحل جالس افكر اقلب الشقه فوف تحت يمكن الاقي جوال ضايع ولاشي

ما حصلت شي
تذكرت حارس العماره طبعن صديقي وامون عليه

قلت ابي جوالك ضروري وخذ جوال انا فيه وظيفه يبغى يكلم مدير جاك ابو هنود يهز راسه قال وين جوال انتا قلت خربان شوفه مرمي هنا قال لا قلت اعقب وانا كل يووم اعطيك ريال وريالين هب وجهه

تعررفون وش الي صار اخذت الجوال وصكيته في الجدار خخخخ تبوون الجد اشفقت عليه من 6 سنوات وهو يخدمني بغيت اوصله المستشفى من الكسور الي جااته

المهم جمعت الجوال وركبت الازرار ووجه الجوال قلت ياولد خليني اجرب يمكن يشتغل وفجأه اشتغل ما صدقت قمت بووسته

المهم اتصلت على خووي قال المدير ما جاء لما يجي بتصل عليك قلت اوك انتضرت نصف سااعه اتصل قال المدير جاء حسيت اني مسئوول كبير خخخ قلت جاايك الحين

المهم قمت لبست الثووب والشمااغ والعقال وتعطرت

ومشيت طبعا ما عندي سياره حاليا مسكين

وقفت لوومززين واتصلت على خووي لين وصفني على مكان عمله وصلت عنده واستقبلني ورحب فيه
قال ابدخلك على المدير قلت طيب دخلت على المدير سلمت عليه قال انت فلان قلت ايه
طالع في اوراقي شووي وانا خاايف وش يصير الله يستر ما تكلم معي وفجأه وهو يقلب اوراقي قال مبرروك انت موظف جديد عندنا انا ماصدقت في حلم ولا علم وكنت اقول بيني وبين نفسي قسم لو فيه مدير مثل الي واجهته
راح يتووظفون العاطلين كل ابووهه
قال رح لفلان في الجهه الثانيه قله كذا وكذا قلت ابشر تامر شي قال بالتووفيق
طلعت من المكتب شفت خووي ورحت اهروول عنده الي يشووفني يقول ذا في ميدان اختراق ضاحيه خخخ

سلمت على راسه وقلت الله يبيض وجهك قال واجبنا والشكر لله سبحانه وتعالى

علىىى طوول اتصلت على الوالده وبلغتها الخبر وجلست تدعي لخووي ذا تقريبا نصف سااعه

اخيرا

اسئل الله رب العرش العظيم ان يووفق خووي دنيا واخرره ويوفقنا جميعا لما يحب ويرضى

وان يوفق كل عااطل على وجه هذه الارض وييسر امورهم

هذي معااناتي مع العطاله

سبحانك استغفرك واتوب اليك