قصيدة رائعة لشاعر إماراتي يشكي الحال
وش عاد يا دار ٍ بها صار ( توطين )
و في مكتب التوظيف سوسن و ميسون !
مديرهم مدحت و نائبْته نسرين
و على الرسبشن حمّص و فول و زيتون !
كل ما اتصلت اسمع ( الو مرحبا مين ؟
بدّك وظيفه ؟ .. مين دلّك على هون ؟ )
اقول انا لي اتصل صار شهرين
و انتوا وعدتوني متى بس توفون
اسمي ( مواطن ) ( جامعي ) طيب و زين
كني ابخطب عندكم و اتّغلون !
عندي شهادة طايحه بجبدي سنين
عشش عليها شي له ستة عيون !!
لو للشهاده لسان قالت ( على وين
ناوي توديني . . تلف فيني الكون ؟ )
من كثر ما صورتها غارق بدين
للهندي راعي المطبعه صرت مديون
لا ليلي ليل ولا نهاري نوى يبين
دقيت راسي لين ما صرت مينون !
مطلوب خبره عالأقل في مجالين
ولا ّ تجينا بواسطه و سير مدهون !
ولا انثبر في بيتك . . افرك بكفين
يومك يشابه امسك و عيش مغبون
تعدادنا ويّاهم اربع ملايين
و اهل البلد للحين ما صاروا مليون !!
ويلاه من باكر اذا وضعنا الحين
و احنا اقل من الربع حالنا شجون !
و اللي ابتسم له حظه والله مسكين !
حصّل وظيفه . . بس ف ي وين .. تدرون ؟
ساكن في راس الخيمه .. حطوه في العين !!
و اللي سكن في الذيد .. في السلع مدفون !!
يشوف اهله بس في الأسبوع يومين
و اذا حسبتوا الدرب كم ساعه . .. تبكون
يعني في كل احواله ذاق الأمرين
شغّال محزون و بلا شغل محزون
و الأجنبي اللي راتبه فوق عشرين
فله و سياره و تذاكر . . و طاعون
عنده بدل كل شي عالراتب الفين
حتى بدل معجون اسنان و صابون !
و من بعد ما يجمع من بلادي فلسين
و يربّي من القعده على الكرسي بطون
و يصير في بلاده غني و عنده برجين
يرحل و هو جاحد . . و كم مثله ملعون !
و حتى الجماعه قوم مدحت و نسرين
يرضون بشوية دراهم . . و شفتين
صبح و عصر . . لو حتى في الليل يرضون
بس لو سمعتوا همسهم بينهم بين
وسط القهاوي يلعنون و يسبون !
لا تحسبوني عنصري . . كلنا طين
و الخِـل لو عاتب محبينه يمون
داري و انا اولى بها من الغريبين
ما يوصلون لحبها لو يموتون
و ( الأقربون اولى ) . . كلام ٍ من الدين
ما جبته من شعري مع الهام و ظنون
ولد البلد ما يبغي لبلاده الشين
بالروح بالدم يفتديها ولا يخون
لكن سؤاله يوم قلتوا له ( توطين )
يا كيف بيد الغرب توظيفه يكون ؟؟!!
شعا رهم معروف ( راجعنا بعدين )
و باين من التأجيل ... انهم ي خافون
اذا معك خبرة .. يا اهلين و سهل ين
و اذا شهاده بس .. عن ّ ك يصدون
ما عندنا شاغر . . و بطلنا تعيين
ولو تحرق الهاتف ترى ما يردون !
من وين اجيب الخبره ؟ من وين من وين ؟
دام الوظيفه عند سوسن و ميسون !
عندي بمطبخ بيتنا خبره سنتين !
تنفع اذا صاروا المطاعم يوطنون ؟؟!
ولاّ أهاجر و آخذ الخبرة في الصين ؟
صح العيون صغار . . لكن يقدْرو ن
سؤال يا دار ٍ ..صراحه بترضين ؟
اني أسافر و اطلب الغرب لي عون ؟
و سؤال يا ناس ٍ على الراس و العين
صدق الوظايف واسطه و سير مدهون ؟
اما الجواب الشافي يجيني الحين
او هاتوا تأشيره . . اذا كنتوا ترضون !
------------------------------------------------------------------------------------------------------
هذا الشاعر يشكي حاله في الامارات ... اجل لو صار عندنا شكله بينتحر
لكن نقول الشكوى لغير الله مذله والله يرزق اخوانا العاطلين بالخير في شهر الخير
تقبلو خالص تحياتي
23-08-2009, 04:49 PM
اروع قصيدة قـــرأتــهــا...صح لسانك
العرض الشجري
