حبيبي..وشلون اصبحك بالخير
وانت.. صباح الخير والخير كلّـه

صبح الندى والعشب والغصن والطير
صبح الغيوم..اللي علينا..مطّـله

انت صباحات السـعد والتباشـير
على وجـيه<ن>بالرضا مسفهلّـه

دامك صباحي وين ما اروح واسير
والله ما ادور فـوق راسي مظلّـه

جيت ووقفت لك ضلوعي جماهير
يتل منها شـوقي اللي يتلَّــه

وما دام جيتني فانا حالـي بخير
لو كان جرحي ما استرته الاجلّه

جيتك هذي غير..وإنتي بعد غير
جيتك مثل الوسم لا جاك حلّـه

تزهر بها قيعان قلب مداهـير
وترد معها روح خل<ن> لخلّه

يا مرحبا يا اغلى واعز المسايير
واغلى المشاعر بيت اهله تدّله

عروق قلبي لك دلال<ن>مباهير
صبيتها دله...ودله...ودلّه

تربع بين الحشـا والازاريــر
واخذ على..ترويقة البال..فلّه

والا اصبر بطير القلب تطيـير
وانت تعال واجلس..في محلَه

سقت الغلا لك والنويا مغاتـير
ولا همني..حقد القلوب..المغلَه

مدري صباح الخير والا مسا الخيـر
مير الوكاد .. فوجهك الخير .. كلّه