السلام عليكم ورحمة الله وبركاته
عندي موضوع وأبغا فيه فزعتكم , أنا إنسان متخرج لي سنه عاطل دورت ودورت وظيفة ولا حصلت (والحمد لله على كل حال) قدر الله
وماشاء فعل وعسى أن تكرهو شيئا وهو خير لكم وعسى أن تحبو شيئا وهو شر لكم . جات في راسي فكرة ومخمخت معي مضبوط اللي هي
أني أبغا أشتغل في مجال الخضرة , أنا عندي عزيمة بس ماعندي خبره ماعندي معلومات ماأعرف الطريقة , وين أروح وكيف أبدا أشتغل
مجال البسطات مثلا كيف طريقتها بالضبط وين هو سوق الجملة متى يفتح كيف أشتري منهم كيف أتعامل في البيع والشراء (بإختصار من
طقطق إلى السلام عليكم ) أبغا معلومات بالتفصيل الممل ,,, ممكن تكون أسئلتي بايخة لكن والله ماأعرف وأنا جاد في طلب التوجيه
..
أبغا واحد يدلني على الطريقة الصحيحة ..وأنا ناوي أبدا من الصفر .
(والله في عون العبد ماكان العبد في عون أخيه)
ملاحظه : أنا في مدينة الرياض ,,يعني شغلي إن شاء الله راح يكون في الرياض.
وسلامتكم.

الله يوفقك وأشوفك تملك أكبر شركه في المنطقه يعني افضل من الشربتلي..
ولأنني ماني من الرياض فأكيد الشباب حيوقفون معاك ..مابيقصرون..
وفقك الله.

مانزيد على كلام اخونا
الله يوفقك وننتظر من يفيدك ان شاء الله

هل انت بفتح محل ولا تبي تبسط

فيه طريقه افضل انك تروح لسوق الجمله تكون عندهم قبل صلاة الفجر تصلي معهم بعد الصلاه تلاقي حقين الجمله فيه ناس يبعون تفريد وفيه ناس جمله اشتر شحنة وانيت ولا دينا جمله سواء كانت طماط ولا بطاطس اللي اهو بيعها تفريد مكسب ريال ولا نصف ريال وانت واقف


عندك بالرياض سوق عتيقه و العزيزيه و فيه سوق على ما سمعت عند النقل الجماعي جنوب الرياض


اول جس نبض السوق و اعرف الاسعار انا ما اقدر افيدك في الاسعار لاني اشتغلت فيها مع بدية السعوده ترى فيها مكسب مغري


الله يوفقك

إن شاء الله فاتحة خير وبداية نجاح

سوق الجملة خلف النقل الجماعي اللي على الدائري الجنوبي

موفق يارب

أشكر شكر حار لكل من شارك بالموضوع ودعا لي بالتوفيق ..شكرا للجميع.

لكن ياأخ (كلام سليم) أنا ماأبغا أبدا بسرعه كذا .. أنا أبغا أسوي بسطه مثلا ..هل أروح لسوق الجملة وأشتري كمية معينه مثلا 30 كرتون طماط مثلا وأروح أبيعها مفرق ..أقصد يعطوني الكمية اللي أطلبها ولا لازم حد أدنى ..
وعندي فكره ماأدري كيف كويسه ولا لا بالأول أبغا آخذ خبره في هالمجال ومعروف أن حقين البسط شغالين أقدر أشتغل عندهم مثلا باليوميه حتى أكسب خبره ومعرفه ولا لا .
يمكن طفشتكم بالأسئلة .. لكن تعرفون لازم الواحد يستفسر قبل لا يقدم على أي عمل وخصوصا إذا ماكان يعرف فيه ولا شي .. تكفون ردو

شاكر ومقدر كل من شارك وخصوصا (كلام سليم) ولايهونون الباقين

شكلي بأبدا على بركة الله..

القطب الشمالي

ابشرك انك متوجه والخضرة فيها خير وعسى الله يوفقك ويوفق الجميع

انا اشتغلت فيها وكان مصدري سوق العزيزية مثل ما تفضلو الأخوان

والحمد لله عندي الخبرة الكافية لهذا المشروع

ابد اسئل وانا اجاوبك