والله المواقف كثيرة
واخرها وأسوأها بالنسبة لي البارحة
وراح احكيه لكم
طبعا عندنا عمال صار لهم تقريبا 40 يوم يشتغلون في بيتنا (ترميم) >>والله طلعوا الشيب في راسي
المهم كلهم من اسبوع انتهوا من اعمالهم ومابقي الا السباك وتقريبا خلص من شغله
فقلت خليني اضبط باب الحمام الجديد (وانتم بكرامة ) المهم لما ركبته مارضي ينغلق فقلت خليني اروح للحداد واقص منه2 سم
ولما مريت بالصاله الا عمتي جالسه عند ابوي وبعد ماسلمت عليها سألوني وين رايح قلت لهم رايح للحداد وطلعت من البيت وحطيت الباب في صندوق الهايلوكس
ولما مشيت مسافة 3 كيلو اطالع للباب في المراية الامامية وماشفته وانا اصفط علي يمين الطريق وادور في الصندوق والا الباب مافيه !!
قمت اوسوس وقلت يمكن ماشلت الباب وخليته
وقلت ولا يمكن طاح في الطريق وسبب حادث
المهم وارجع مع نفس طريقي لعلى وعسى القاه
ورجعت وماحصلته !!
قلت معقوله لو طاح بيختفي في ثلاث دقائق ؟!
رجعت البيت والقى اخواني واولاد عمي وسألتهم قلت انتم شفتوني لحظة ماحملت الباب ؟!
قالوا ايه !>>>لا تلومني قسم بالله ماعاد اصدق عقلي من الارهاق وكثرة طلبات العمال
والله وادخل البيت وانا كارهه كل شئ قدامي وسألني ابوي قال لي وش سويت في الباب ؟
قلت الباب اختفى !
قال لي كيف ؟؟ قصيت عليه القصة
عمتي خافت قالت معقوله يختفي كذا المهم راحت تتأكد وبالفعل مالقيته
قلت خليني اروح مع طريقي مره ثانية يمكن القاه !
المهم لما طلعت من الحي الا واشوف 5 دوريات رايحة جايه مع الطريق
اخذتني الافكار والوساوس مره ثانية قلت لا يكون الباب حقي مسبب حادث
والله من جد صدقت هذه السالفة
واروح للحداد قلت ابغى اكلمه يعمل واحد جديد وانا طالع من عند الحداد اشوف دورية توقف راعي هايلوكس قلت ياولد لا يكون يدورون على صاحب الباب الظاهر سبب حادث
المهم ان السالفة انتهت بتفصيل باب جديد والله يعين على المزيد من الخسائر