بسم الله الرحمن الرحيم

الحمدلله والصلاة والسلام على رسول الله وعلى آله وصحبه أجمعين ..

السلام عليكم ورحمة الله وبركاته .

تنوية(نتمنى من كل شخص يدخل الموضوع أن يكتب رداً حتى لو قال شكراً فقط فنحن نريد الإرتقاء بالمنتدى لا نريد أن نرى المواضيع مشاهداتها بالآلاف والردود 60 رداً))شكراً لكم

كلنا يعلم أهمية سوق الخضار..وكيف أنه كان بداية الكثير من التجار(مثل الشربتلي ..لاتصدقون أمزح)..

ولكن الكثير منا يجهل كيفية العمل بهذا المجال..وماهي الماديات التي يحتاجها هذا العمل..
من سيارة..ورأس مال..ومكان الشراء باالجملة..؟؟كل هذه الأسئله نواجهها ولا نجد من يدلنا ويجيبنا عليها..!!

المهم سيكون هذا الموضوع كمجلة يُطرح فيها كُل المعلومات عن سوق الخضار والفواكه..ونتمنى من أصحاب هذه المهنة إفادتنا بكل معلومة..وأن لا يبخلوا أبداً .. أبداً..:o

وكل هذا من أجل الفائدة..لكل المتواجدين على هذا المنتدى..فقد بدأنا نشعر بأننا في أمس الحاجة للإعتماد عل النفس و التخلي عن((الإتكاليّة))..

.سأبدا أنا إذا سمحتم:

*بالنسبة لمنطقة مكه المكرمة من أين أحصل على البضاعه من خضار وخلافه..أسم المنطقة..؟

*ثانياً: كم يحتاج مني هذا المشروع لكي ابدأ..من نقود يعني؟؟

أخوكم/بنك الراجحي.

بصراحه البنقاله اكلينا في هذا الموضوع والله انه في خير ومكسب كبير بس مشكلته انه لازم الواحد في البدايه يستحمل تعبه
وربي يوفقكم في مشاريعكم

في مكه سمعت ان حزمة البقدونس ب3 ريال برمضان
وتباع بابها حزمتين كبيرتين بريال
واشكرك على موضوعك

هامور سابقاً/والله المفروض نتحد ضدهم..لكن تعرف السعوديين يبيلهم يحسون باللطعه اكثر عشان يتحركون المفروض نغزيهم حتى الموظف الحكومي يشتغل بالليل..عشان يعرفون هالبنقال إننا شعب طموح..وموضوعي عن المشاركات بيض اعضاء المنتدى موجود بس مالاقى تفاعل جيد..أتمنى تزوره وتستفيد..

شفت ياحبوشه كيف الرزق..والله فيها رزق خاصة برمضان..
ننتظر الشباب اللي فاهمين بهالموضوع..يفيدونا بكل شيء..وأنا متأكد أنهم بيتحفوننا..
نحن ننتظرهم.شكرا

الله يوفقكم ويرزقكم من اوسع ابواابه
اي والله الهنوود كسبوا الملايين من ورى الخضار
اسمع اخوي ماعندي خلفيه
لكن مدام إنك تفكر فيها إبدأ لو بكم رياال
رووح من قبل الفجر واشتري من الحلقه وبيع ع سيارتك داايم اشوفهم كذا
(بارك الله لأمتي في بكورها)
المهم إنك تبدأ ومع الوقت راح تتوسع معلوماتك وتبدأ بمشرووع مقنن
إنت توكل ع ربك وإبدأ ترى البدايه اهم شي
وانا اختك اعرف نااس كثير ياكثر مشاريعهم وافكارهم لكن بس كلام مافي بدايه
لو جلسنا نخاف من الفشل احسلنا نكبر المخدهـ ونقول يالله >>سوري دخلت بموضوع ثاني بس من القهر الّي احسه
قل آميــن
ياالله ياارب وفقه ويسرله الخير واطرح البركه في شغله له ولجميع الشباب والبنات

اختي ريم1..كثر الله من أمثالك..والله أني افكر اني ابدأ في مقر دراستي بمكه..ولكن أبي اجمع المعلومات من هالموضوع عشان أستفيد ..وتستفيدون أنتم كمان..عموماً أختي هناك فتيات من جده يبون يتشاركون بمشروع.. ادخلي موضوعي تبع المشاركه بين الأعضاء..اشكركِ على المتابعة.

اخي العزيز : انا سألت قبلك عن هذا الشي لأن سوق الخضار يطلع ذهب لكن قالولي اول شي تستأجر محل وهذا يبغالك تعطيه مقدم 6شهور وبعدين تقدم طلب رخصة على البلدية والله يعينك على الشروط حقتهم وطلباتهم ومابتطلع الرخصة لو اعطوك إلأ بعد شهرين او ثلاثة اقل شي . وتدري وش صلحت ؟ نزلت حلقة الجملة بجدة اللي في الصفاء ومعي صاحبي سيارتة داتسون واشترينا جملة بأسعار حلوة وحصلنا ناس سعوديين مسوين بسطات بدون تصريح ونصبنا خيمة معهم وشفنا شغالين زي الحلاوة . بس دايم نخاف البلدية تداهمنا وتصادر اللي معنا . الله يحمينا منهم ... هذي كل المعلومات اللي عندي ,, وفق الله الجميع

عبود ..أي محل الله يهديك..حنا نبي نبدأ بالبسطات مثلك.. عموماً معلوماتك رائعه جداً..حماك الله من البلديه.
وشكرأ على متابعتك لمواضيعي؟؟