السلام عليكم ...
بما إن سفرتك بتكون لــتــــركيـــا , أكيد إن التجارة مـــلابـــس ... صح ؟؟
أول شي بشرح لك الطريقة الصحيحة والمتبعة للأستيراد , وهـــي :
1/ تستخرج سجل تجاري من وزارة التجارة ويكون تجارة عامة ويشمل أنشطة كثيرة مثل ( تجارة المواد الغذائية وألعاب الأطقال والألبسة والأجهزة الكهربائية والأثاث والإكسسوارات والعطور ... الخ) يعني ممكن تحط سبع او ثمان انشطة مو مشكلة , وطبعاً تشوف لك معقب يستخرج لك السجل خلال يومين وانت في البيت , وبيكلفك حوالي ( 1700 ريال ) وهي تشمل ( رسوم السجل التجاري + رسوم عضوية الغرفة التجارية + اتعاب المعقب ) وممكن تحصل معقب بأعلاناتهم في الوسيلة أو جريدة الرياض مليانين, وبدون ماتتعب نفسك ولا تروح ولاتجي لأن المعقب بيخلص لك كل شي , وعموماً هذا رقم معقب ممتاز مخالف واسمه / أحـمـد , وهو بالرياض .
2/ بعد ما تستلم السجل التجاري جاهز , ترميه بأقرب درج في البيت , بعد كذا تقص تذكرتك وتسافر الى تركيا , وتنزل لسوق الجملة وتشتري كل أغراضك وللمعلومية منت محتاج فواتير من المحلات (لكن أحفظ الفواتير لك شخصياً عشان تعرف تكاليف بضاعتك ) وياليت قبل ما تبدأ تشتري تشوف لك مكتب شحن في تركيا عشان كل ما اشتريت لك كمية توديها لمكتب الشحن يحفظها عنده , وبعد ما تخلص جميع مشترياتك تروح لمكتب الشحن وتجلس معه وتتحاسبون , طبعاً مكتب الشحن بيحط بضاعتك في كراتين ويغلفها , وبعد التغليف بيوزنها لك في مكتبه ويحاسبك على سعر شحن الكيلو بناءً على تكلفة الخطوط الجويه ( هذا إذا كان الشحن جوي وهو أسرع وأفضل طبعاً ) وبعد كذا يعطيك التكلفه الإجمالية وهي تشمل ( رسوم الشحن بالطائرة بالكيلو + أتعاب مكتب الشحن ) وطبعاً مكتب الشحن ما يحتاج منك فواتير , لأنه هو بيجمع كل مشترياتك ويسويها في فاتورة وبيان واحد ويوثقها من بلدهم ويسوي لها شهادة منشأ وكل شي , يعني انت مالك ألا تشتري وبس ومكتب الشحن مهمته يسوي لك كل الإجراءات وهذي شغلته أساساً , بعد كذا ترجع للسعودية وتعطي المكتب عنوانك عشان بعد ما يكملك كل الأوراق يرسلها لك بالبريد ( فيديكس أو دي إتش إل ) والأوراق ( الفاتورة الأصلية + شهادة المنشأ + بوليصة الشحن ), وهذا رقم مكتب شحن وهو رجل صادق وثقه بإذن الله وجربناه أكثر من مره وشغله مرتب وجواله ( مخالف) واسمه/ شاهين .. ابو احمد , وهو عراقي وعايش في تركيا له أكثر من عشرين سنة .
3/ بعد ما ترجع بالسلامة وتريح كم يوم بيوصلك البريد بالأوراق من مكتب الشحن , بعد كذا تستلمها وتشوف مكتب تخليص جمركي وتعطيه جميع الأوراق بالإضافة أنك تسوي له تفويض على ورق مؤسستك وتصدقه من الغرفة التجارية عشان يقدر يراجع الجمارك نيابةً عنك , وطبعاً هو يتولى جميع الإجراءات من الألف إلى الياء وانت ريح في البيت , وطبعاً التكاليف تشمل ( الرسوم الجمركية للدولة وهي 5% من قيمة الفاتورة + اتعاب المخلص وهي بحدود 300 ريال + مصاريف توصيل البضاعة لموقعك ) وهذا رقم مخلص جمركي ثقة وممتاز ومجربينه كثير ( مخالف) واسمة / فــايز , وهو بالرياض .
وهذي هي طريقة الأستيراد كاملة من الألـــف إلى اليـــاء , لا تزيد ولاتنقص .
هنا بجاوبك على إستفساراتك حسب الترتيب :
1/ لأ ... ماتروح الغرفة التجارية لأن مالهم أي خص بإستخراج السجل التجاري وهو من إختصاص وزارة التجارة , وطريقة إستخراج السجل كتبتها لك فوق .
2/ صحيح ... تروح لمكتب التخليص الجمركي ولكن بعد ما توصلك الأوراق زي ما كتبت لك فوق .
3/ صحيح ... لابد من مكتب شحن في تركيا ولكن هو الي بيسويلك الفاتورة وكل الإجراءات زي ما كتبت لك فوق .
4/ لأ ... انت خذ فاتورة من البائع عشانك انت , أما موضوع ترجمة الفاتورة فهي بتجيك فاتورة وحدة من مكتب الشحن وانت سلمها المخلص وهو بيترجمها خلال دقايق يعني مو مشكلة نهائياً .
5/ لأ ... ما يحتاج بيان تعبئة , لأن مكتب الشحن بيجمع لك كل مشترواتك في فاتورة وحدة وهي تعتبر فاتورة وبيان بنفس الوقت , يعني كأنك اشتريت بضاعتك من جهة وحدة .
6/ لأ ... ماعنده شهادة منشأ وأنت أصلاً منت محتاجها , زي ما قلت لك فوق هذي من مهمة مكتب الشحن .
7/ لأ ... لاتروح ولا تختم أي شي , لأن زي ماقلنا فوق , مكتب الشحن هو الي بيسوي فاتورة وحدة وهو الي بيختمها .
بعض النقاط المهمة اللي لازم تنتبه لها :
ــ إذا جلست مع مكتب الشحن عشان يكتب لك الفاتورة بجميع مشترياتك , حاول تنزل شي بسيط من قيمة مشترياتك عشان الجمارك ينخفظ عليك شوي , طبعاً يكون تنزيل منطقي بحدود ( 20 إلى 40 % ) .
ــ انتبه وبقووووووووه إن المنتجات اللي تشتريها تكون (made in turkey ) لأن بعض المحلات هناك يحطون استيكر صناعة إيطالية أو فرنسية , وهذي لايمكن يسمحون بدخولها الجمارك عندنا ويعتبرونها غش تجاري , لأن كيف بضاعة جاية من تركيا وصتاعتها إيطالية ... وصلت المعلومة ؟؟؟
ــ إذا كنت ناوي تشتري ملابس نسائية , لا ولا ولا ولا ولا ولا ولا تستعجل في الشراء وخل أول يوم تنزل للسوق لف واستكشاق فقط , عشان بعد كذا تقدر تقارن بالموديلات والأسعار وتستخير الله , وانتبه من الأستعجال والإنبهار والركادة زينة .
ختاماً الف شكر على دعواتك الطيبة , وتمنياتي لك ولجميع المسلمين بالتوفيق والنجاح في مشروعك بإذن الله ,,,,
اخوكم ... ابو خالد .. ( فتى نجد ) ,,,
09-09-2009, 06:18 PM
اي احد استورد اي شي ولا سمع فيه يتفضل الله يبغلكم الجنة
العرض العادي
