السلام عليكم ورحمة الله وبركاته

رداً لصاحب الموضوع الكابتن فهمي

عند قراءتي لما كتبه الإخوان في الموضوع المذكور سابقاً للأخ الفاضل الكابتن فهمي جزاه الله خيراً واثابه وتأكيده المتكرر هو والأخ آحسآس شرقآوي وآإلمتآبع

قررت أن أذهب بنفسي للتأكد من تلك الأخبآر في صبآح هذا اليوم دعوت الله أن يشدّ من أزري وأن يفتح لي بآب رزق

قررت أن لا أنام حتى أنجز هذهـ المهمّة لأن عادة أغلب العاطلين في رمضآن ( صلاة الفجر ومن ثم النوم للظهر ) :o

فـ وش اللي صآر يالربع <~ نقلب الموجه بالعامي

طبعاً اوراق التقديم جاهزة جنب الطابعة مايحتاج يعني ترتيب وزحمة وقلق

انتظرت للساعة 8 وشي وقمت اتجهز ومن ثم طلعت شغلت سيارتي ناظرت طلع في بنزين ولله الحمد

انتظرت شوي السيارة تسخن واعشق وامشي [ فيس ينزل القزاز ] <~ مافي مكيف طبعاً

والله وامسك الخط واهج وصلت لميناء الملك عبدالعزيز بالدمام واخذ تصريح دخول زائر

ماشاء الله على الكابتن فهمي قسم بالله ياهو يعرف يوصف طبعت وصفه في اورقة معي ومشيت ع الوصف ووصلت للشركة بالضبط

دخلت للإدارة انتظر الأخ ( سعد الدايل - أبو عبدالله ) قالي السكرتير الهندي والمصري انتظر شوي لسه ماجا

فـ انتظرت وجالس ادعي ( اللهم لا تردني خائباً - اللهم يسر امري - اللهم افتح لي باب رزق ) طبعاً الوقت يمشي ولا دخلت على أبو عبدالله إلا الساعة 11 سلمت وجلست قالي تفضل قلت له جاي اقدم على الوظايف ومن ذا الحتسي ( طبعاً اللي ذكروها الإخوان في الموضوع ) قالي والله اعتذر يعني حالياً ماعندنا وظايف ولو عندنا ابشر ومن ذا الكلام

طبعاً مشيت والحمدلله على كل حآل

كل اللي ابي اقوله يا اخوان والله العظيم متأكد إنكم تبون الخير للجميع وإنكم ماكتبتوا الكلام إلا وأنتم نيتكم خير

بس في نقطة مهمّة تغفلون عنها اللّي هي تحرّي المصداقيّة في الطرح ما أقصد تكذبون ( محشومين ) بس ياليت الواحد يتأكد من الشي اللي بيكتبه ويحرص على إتقان العمل اللي بيسويه امتثالاً واقتداءً بهدي قول خير الأنام بأبي هو وأمي رسول صلى الله عليه وسلم [ إن الله تعالى يحب إذا عمل أحدكم عملا أن يتقنه ]

الحمدلله اموري متيسرة بس أعرف أشخاص قسم بالله حق بنزين ماعنده فمثل الكلام اللي كتبتوه يمكن يضطر يتسلف عشان يروح يقدم

أنتم الآن تعملون خير فياليت تسعون وتجتهدون وتحرصون على هذا الأمر

والله أسأل لي ولكم التوفيق والسداد وجزاكم الله خيراً وكل عام وانتم بخير وإلى الله أقرب