السلام عليكم ورحمة الله وبركاته

قصيده رائعه للشاعر راجح العجمي


[POEM="font="Simplified Arabic,5,white,bold,normal" bkcolor="transparent" bkimage="./images/backgrounds/22.gif" border="groove,3,silver" type=1 line=0 align=center use=sp num="0,black""]
عثى فينا جهاز الدش بث وعرض وإستقبال=محاقين الردى لا بارك الله في محاقنها
بدا وقت الفتن يطلع عسى الله يصلح الأحوال=ولا نقدر نقول إلا عسى ربي يزينها
طلع جيل يشيّب بالرضيع ويذهل العقّال=بعض ناس ذكرها المصطفى شفنا عواينها
لقينا الكاسيات العاريات الوصف والأشكال=عليها لبس .. لكن لبسها يبرز مفاتنها
تميل عن الطريق المستقيم ومن تبعها مال=خبيثة شكل .. ظاهرها يمثل خبث باطنها
ترحّلها إبليس وانجلى عنها الحيا وانجال=قامت تلملم .. من يصدقها ويامنها
تستر لين تدخل راسها في المشغل الشغال=وعلى الشغال بالمشغل مذارعها تبيّنها
غدت ماعاد تجفل من عيال الهند والبنغال=تغنّج له إلين يهزّ رأسه ثم يديّنها
على ذا الحال يمكن تفتن الصاحي مع البطّال=مادام إنها تغنّج له وكلمتها تلينها
تجرد عن لباس المسلمين وتلبس البنطال=مع قل الحلا .. تلبس لها لبس يشينها
يقولون الرجال إن الفرس في دبرة الخيال=ورى الخايب يخلي الخايبة تبرز محاسنها
ولا يؤدب ولا ينصح ولا ينظر لها في حال=يعاملها بهيمة ... بس مابه إلا يسمّنها
وبعضهم لو يبي يؤدب وينصح زوجته ما حتال=ولا ينكر عليها شيء وإن زعلت يساكنها
خذت منه القوامة وأصبح الحرمة وهي رجال=تخلي الثوب نصف الساق وثيابه يطمّنها
ولا جا الليل .. كل راح له سائق وله جوال=إلى من جات .. ما تلقاه ... وإن جاء ما يعيّنها
تحدد نسلها تبغى الرشاقة .. ما تريد عيال=مع عدوان دين الحق .. معلنة تضامنها
وظيفتها عساها البعد بين الناس قيل وقال=تجيب الهرج وتودّيه .. والفتنة تكوّنها
ولا أعمم لأن الخير في بعض البشر لازال=وكم مصيونة في بيتها والرب صاينها
ولا يمكن يضحّي بالشرف والدين بنت رجال=لأن الطيّبة .. يحمي شرفها .. طيب معدنها
عطاها الرب عقل ودين .. مافيها جهل وخبال=نتيجة قوة التيار ما تخلف توازنها
على زلة زوجها .. لو يكررها وسيعة بال=تحدث في المحاسن ... والعلوم القشر تدفنها
لها في مهجته منزل .. وله في قلبها منزال=تبادله الغلاء .. ماهيب خاينته وخاينها
ولا ننسى شباب إبتلن به طيبات الفال=تبي العفّة وستر الحال والداشر يجننها
مريض وناقص عقله .. خفيف وتشعفه الأزوال=ومنيحه من ردى حظه .. ومن خبثه يحينها
نهاره نوم .. وإن جا الليل يسهر في ردى وهبال=ولا جاء الفجر جاك يسحّب رجيله مطيّنها
من آثار المخدّر .. كنّ في جوفه مرض سلال=من التدخين كنّ شفاه .. بالنيلة يلوّنها
ومنهم من تميّز بالنعومة .. والظفور طوال=وذيك القذلة اللي من دهون أخته يدهنها
تحلى بالإنوثة مابقى إلا يلبس الخلخال=يشوف إخته تجمّل للعريس وغايرٍ منها
إلى منه هرج في المجتمع .. جات الهروج هزل=يدوّر للرخامة ... والمراجل ما يواطنها
يضايقه الآذان ... ويطرب الداشر مع الموّال=قضى ليلة مع الشلّة .. وبنت الناس هاينها
ولا أعمم لأن المجتمع لازال فيه أبطال=وترى الدنيا من أهل الطيب ماخليت مخازنها
رجال تلتزم نهج الرسول وللحمول جمال=ولا يخرج حديهم كلمته .. يا كود وازنها
ولا ننسى قضية من مسكها لاجل حب المال=لاجل المال .. وصلت بنته الخمسين راهنها
يبيع ويشتري فيها .. كما السلعة مع الدلال=يبي ينظر من اللي يدفع أكثر من زباينها
ترى هذا ومثله في المجالس عدّه الفنجال=جزى اللي علشان الطمع .. بنته يخزّنها
إلى جوه رجال طيبين الدين والأفعال=يحوّلهم على أم البنت والخايب ملقّنها
تقول : أبغى المهر اللحين نقد ريال فوق ريال=نبي فوق المية من غير حاجات تأمنها
تحته لين يبقى راس ماله غترة وعقال=يدوّر الدداسن في المعارض ويتدينها
ألا وآشيب راسي شاخت النسوان والأنذال=ولا يعتزّ جيل .. شيّخ الحرمة ومكّنها
أنا مانيب شامت .. بس أبيّن واضرب الأمثال=لعل أهل العقول الطيبة .. تردع مجننها
أبحاول علاج عصر الدش والأهوال=وناس ماتبي تسمع كلامي ما عليّ منها
يقوله واحد يخطي مع التفريط والإهمال=ولكن في رجا الرحمن لا صعبت يهوّنها
إلى منا هوينا في المقابر والحمول ثقال=وبدينا في حياة الآخرة وأول مساكنها
وجاء يوم عبوس قمطرير يشيب الأطفال=نهار فيه ناس يفرحون وناس يحزنها
ورود النار هذا شيء ثابت ماعليه إشكال=ولكن النجاة اللي تبي .. ما حد بضامنها
تسمّع يا وسيع العرف لاتجهل مع الجهّال=أبعرض النصيحة وانت ياجعلك تثمنها
تخيل يوم ينقطع النفس وتضيّع الآمال=ونفسك عن هجوم الموت ما تقدر تحصّنها
ولا ينفع ولدك ولا ولد عمك ولا إبن الخال=مسجّى والمكفن عند جثمانك يكفنها
ألا يا الله يا اللي بيدك الأرزاق و الآجال=ولا للناس غيرك .. رب يرحمها ويأمنها
تجاوز عن خطايانا إلى من عرضت الأعمال=نهار فيه نفس العبد ما يجدي تغابنها
عراة ما علينا لبس .. وحفاة بدون نعال=نهار فيه يجمع ظالم الأمة ومحسنها
[/POEM]

قصيده رائعه يامؤسس منتدانا الغالي
وصح لسان قايلها وناقلها
وقصيده للأسف تجسد الواقع
واحنا في زمن تغير فيه الكثير
نسأل العلي القدير ان يثبتنا على الحق
وتحياتي لك اخوي

قصيدة جزلةجدا
صح لسان الشاعر
تسلم يا كبيرنا على النقل