اخوي شنتر بن عداد عيدك مبارك ... انا بإذن الله نويت ابدأ بمشروعك
انا عندي استراحة قريبة من الرياض( بالمزاحمية ) بصراحة الموية شاحة لكن بإذن الله ناوي على وايتات
1 -الأرض تربتها تميل للرملية هل تنفع لزراعة الخيار
2 -وهل من الممكن الإستعانة بمهندس ( اشراف فقط دون نقل كفالة وزحمة )
3 -وهل من الممكن ان نحظى بزيارة منك لنا ولو لمرة واحد للإطلاع على المنتطقة والتوجيه والإرشاد
ذكرتني ببرنامج الأرض الطيبة
لك رسالة على الخاص

الاهنت ياالغالي عندي سؤالين مهمين اتمنا الاجابه عليه
س/انا من حفرالباطن هل ينجح المشروع ؟

س/هذاسؤال مهم وش يضمن ان أبيع بااليوم او با اليومين مايقارب (70 اوبخلال اليومين 140) كرتون؟

يعطيك العافيه اخوي شنتر وفعلا الخيار انتاجه سريع وبكثافه بالرغم ان تجربتي متواضعه على حسب الامكانات الي متوفره قدامي والي من فتره طويله وانا احاول امتلاك بيوت محميه بس عاطل والعاطل في الغالب امكاناته محدوده

بعد محاولات يائسه سواء في محاولة استإجار بيوت والي كان اخرها 8 معدل الاطوال 56 متر والعرض 9 متر كان منها 4 بيوت مزروعه وفيها انتاج للطماطم بمعدل قرابة 5 الاف شتلة طماطم بالاضافة الى نص بيت فيه قرابة 650 شتله فلفل رومي وثلاث بيوت ونص مشتوله وغير منتجه وكان المطلوب اجار شهري للبيت الواحد 4500 ريال يعني 36000 وكان معدل الانتاج اليومي قرابة 100 كرتون بواقع 25 كرتون للبيت الواحد والسعر للبيع من المزرعه 3 ريال وهو السعر الادنى و5 ريال في السوق وكان قبل شهر رمضان بقرابة الثلاث شهور فحسبته بحساب المعدل الادنى لاحتمال تعرض الشتلات للمرض واحتمال جفاف الما بالاضافه الى نص الانتاج للعماله المكونه من عاملين يعني المعدل الادنى قرابة سعر الاجار للبيت الواحد والمكسب اربع شهور وهذ الاربع شهور تكون انتاج لثلاث بيوت ونص ويمكن المكسب الاضافي في نص البيت الخاص بالفلفل الرومي الي كان معدل انتاجه 45 كرتون لكل ثلاث ايام يعني 15 كرتون لليوم

كانت المسافه بعيده شوي قرابة 80 كيلو عن مكان اقامتي ففضلت التراجع خاصه لما بديت حساباتي مع الما والي ممكن ما يكون غزارته الا في عام 1433 يعني بعد ثلاث سنوات او اربع لما حسبت الدوره الفلكيه وهي اقتراب مرور 66 عام على الجفاف المشابه والي عم البلد وكل دوره فلكيه قرابة 33 عام وكل دوره لهطول الامطار بغزاره على المدى القصير قرابة 8 سنوات وعاد انا ماشاء الله حظي فل ابشن فقلت يازيني وانا ادربي راسي في فترة جفاف المياه وقلت تتأجل ثلاث او اربع سنوات والي صبرنا عشرات السنين يصبرنا كم عام وابدى حتى لو كان سعر الكرتون بالمعدل الادنى 3 او اقل

قلت في فترة الفضاوه بجرب لو كنت خسران لجل اتعلم لان مليت من كثرة البحث والاستفسار بدون اي تطبيق فقلت اسوي معمل تجارب مصغر وبيني وبينك كنت اتمنا ان تظهر كل المشاكل الي ممكن تواجهني قبل الدخول في مشروع الحلم المستحيل وفعلا ظهرت لي مشاكل فكان عنندي حوش في بيت قديم قلت أشغله مساحته صغيره وارضيته صعب فيها الزراعه واخذت الاطوال ثم مريت على محل توزيع مواصير واخذت ثلاث انواع 2 بوصه وبوصه ونص وبوصه بـ 780 ريال ومريت على حداد اتفقت انا واياه على قصها وتلحيمها بميتين ريال ثم جبتها للحوش واخذت قلاب من واحد من الشباب وحملت خمس ردود تربه واخذت خزان اثنين طن ولفه ليات ب 180 ريال ولفه بلاستك ب 550 ريال ومعها اسلاك ومثلثات توزيع وحبال ربط وبحدود 300 ريال مبيدات يعني التكاليف من 2100 الى 2200 ريال وهي باهضه مقارنه بالمساحه 10 × 6 لكن الفرق ان البلاستك والليات والمبيدات اكثر من المطلوب يعني بعد خصم الزياده تكون التكاليف قرابة 1800 ريال تحويشة العمر راحت يا قدعان

طبعا كونك تسأل وتستفسر او تبحث كل واحد بيعطيك راي والسبب التجربه الملائمه لاجواء وتربة المنطقه الي تزرع فيها فبحثت في النت وبحثت على ارض الواقع وحاولت اجرب لكن قناعتي ان تجربتي تتلائم مع المنطقه الي زرعت فيها وإن اول تجربه راح تفشل ويمكن ثاني او ثالث اول الاسباب هو عدم الخبره الكافيه ثم التربه والجو والامراض والفتره المناسبه للشتل ونوع الشتلات فجربت طماطم وقلت يا شيخ خسران خسران ومسكت كم طماطه من الثلاجه حق انتاج محمي وفركتها في التربه وقلت اطلعي او لا بوك ولا بو من جابك وفعلا طلعت ومصعتها وشتلت ثنتين في كل نقطة توزيع وكل نقطه تبعد عن الثانيه نص متر وسردت اثناعشر قايد في كل واحد منها 11 نقطة توزيع بواقع 264 شتله منها 44 شتله خيار وقلت احرسوا بعض اياني واياكم اجي بكره والاقي وحده مشتكيه من الثانيه لابخكم بالمبيد الحشري عاد الطماطم وحده تعيش ووحده تلفظ انفاسها والعجوز بس تحشي شتل كلما غبت ارجع والاقي 600 شتله في كل نقطه تقول باقة ورد قلت وماله جربي لين تقتنعين ويوم ورى يوم طلع الطماطم وصار زحمه والخيار بدى في الانتاج بعد قرابة شهر وبالرغم من قلة عدد الشتلات الي ما تقارن بالبيت المحمي والي المعدل فوق 1300 شتله الا ان الانتاج اليومي احيان كرتونين واحيان ثلاثه واحيان كرتون ومع بداية الطماطم اتفقت مع صاحب البقاله وقلت بعطيك انتاجي الوفير مقابل مشتروات من عندك وعرضت عليه الطماطم والخيار واعجبه مقارنه بالي عنده بس المشكله الانتاج ضعيف يعني معدل كل يومين بالكثير اعلى انتاج 14 كرتون واقل شي 8 واذا يومي من 5 الى 7 كراتين فكنت اخذ مكانها مشتروات للبيت والطماطم ينتج ويوقف اما الخيار مدهر زي ما قال اقطف اليوم واجي بكره الاقي الي كانت صغار جاهزه للجني واحيان لما اتأخر لليوم الثالث الاقي الخياره تقول حبحبه ماناقصها الا اسفط فيها وابيع خيار على السكين وكانت تجربة جميله وصفق الجميع

تكاليف الماء كان معدل وايت شهريا يعني من 100 الى 150 خاصه وقت الصيف ارتفع السعر ومعدل الري قرابة ساعتين صباح ونص ساعه في المسا ودرجة الحراره قريب من 30 درجه ومعلوم ان الطماطم خاصه الطماطم غير محدود النمو يتوقف نموه بارتفاع درجة الحراره ويمكن يفرق عن الخيار لان لاحظت توقف للنمو ففتحت الاشرعه كي يتنفس الطماطم الصعداء وبهذلني الطماطم صراحه مقارنه بالخيار حبيب الشعب بالرغم ان الطماطم مرغوب اكثر من الخيار وبالرغم ان نوع البذور الي اخذتها للخيار كيس ابو خمسه قلت حق تجربه ولو انها طفره ولكن لا مانع من التعلل بالتجارب ما دمنا عاطلين باطلين وهي خربانه تربانه فسألت الدكتور حق الصيديله البيطريه وقلت ليش مشاكل الطماطم قال ممكن زراعتك كانت في غير موسم قلت طيب في انواع مقاومه للمرض وحدد انواع للطماطم والخيار اسعار الالف حبه تبدى من 200 ريال والعلب تبدى من 550 ريال قلت وش السر قال مقاومه وانتاجها اوفر يعني اغزر باللغة العربية الصعيديه السعوديه وهذه لغتنا نحن كبارية تجار البيوت المحيمة في الشرقي الاوسطي والسبع المحيطات وقاهرين الي ما عندهم بيوت محميه فما كان مني الا ان رجعت اجر اذيال الخيبه وقلت زين المره الجايه بشتري طماطم ام الف حبه بخمسه ريال لان ما عندي استعداد اشتري حبوب بمآت الدورارات لبيت انتاجه ما يغطي تكاليفه

طبعا الايام الجايه راح تكون التكاليف في البذور والسماد والماء والعلاج ومافي شي مغري اكثر من كونه معمل تجارب تحضيري على مدى سنوات للتمكن من الحصول على بكلوريا في زراعة البيوت المحميه وإذا غطت تكاليفها بنفسها وصار عندي خبره كافيه وقتها بحاول افكر بشكل جدي اني افتح فرع جديد في زاوية الحوش مترين في متر وازرع فيه كزبره وكراث

نصائحنا ككبار خبراء في زراعة جميع الخضروات بما فيها الخيار والطماطم

أولاً : إذا كان عندك بيت قديم وفيه حوش فبادر باخذ قلاب قريبك وإدفنه بالتراب لين يقول بس
ثانياً : إذا اتممت بناء البيت المحمي بطول 10 متر وعرض سته وبذرت البذور فأعزف لها بالمزمار كي تظهر وهي تتراقص
ثالثاً : اتصل على الوايت الاول فإن لم يرد فاتصل على الوايت الثاني وإن لم يرد فقل لطماطمك والخيار اصبروا صبر ايوب الذي صبر ثلاثين عاما وإن غدا لناضره قريبو
رابعا : اذا ما صار لك اي شي من السابق فما عليك الا البكاء والعويل لان لم تصبخ من تجار البيوت المحميه المشاهير

هذا كل ما لدينا واي استفسار يرجى الاتصال على رقم شركتنا المجاني 6×10×12×11×2=264 اي 14 كرتون كل يومين او 7 كرتون يوميا

إضافه بسيطه للراغبين في شتل الطماطم والي ينعمل لها شتل عن طريق الصواني كل صينيه 77 شتله لها تربه الكيس قرابة 40 ريال وابحث في النت عن الشتل بالصواني وهو اسلوب للشتل قبل زراعته في البيوت المحميه

معدل الانتاج لكل بيت بكامل الفتره مع العنايه السليمه والشتلات الممتازه قرابة 3000 كرتون حجم صغير معدل البيع الادنى 3 ريال ومعدل البيع الاعلى يتجاوز 15 ريال يعني ادنى 9000 ريال واعلى 45000 حسب الموسم والانتاج معدل مرتين في السنه مع مراعاة اوقات الشتل ونوع البذور الخاصه في كل موسم

معدل التكاليف للاسمده والمبيدات للسنه للبيت الواحد تقريبا 250 ريال إذا كانت الاعداد كثير اما اذا قل العدد فالفارق يكون بسبب الكميات الاضافيه والي تكون اكثر من استهلاك البيت الواحد

طبعا هذي معلومات اخذتها وفي ملاحظه ان الاماكن البارده في الصيف انتاجها اعلى من المناطق الحاره خاصه في الطماطم ويمكن زيه بعض المنتجات والمعدل في الاماكن البارده بمعدل 6000 الاف شهريا وهذي معلومه اخذتها من اصحاب بيوت محميه كثر بعكس المناطق الحاره قرابة 3500 ريال معدل الشهر ويمكن يرتفع الانتاج في محاصيل اخرى

قلت المعلومات هذي عشان ما يتحطم احد وقلت الي قبله لان التجربه الاولى يشوبها نوع من الاخطاء فلا احد يحكم على الفشل بسبب التجربه الاولى الا اذا كانت كل العوامل تؤدي للفشل وما كانت مجرد قلة الخبره وكل التمنيات للجميع بطماطم وخيار مدبدبين مستانسين

غريب الاوطان بصراحه انت رهيب هههههههههههه

مشكور يالغالي على معلوماتك الجيده و ايضا تجربتك الحلووووه

وانا اقول كل انسان يتعلم من الخطاء اذا اليوم اخطيت ان شالله بكره تتفاده الاخطاء

تحياتي

غريب الاوطان
تجربه ممتازه وحلوه هههههههههههه

بس لو انك بديت بالخيار بدال الطماطم كان كملت التجربه

ولعلمك الخيار ينتج في فصل الصيف اكتر من الشتاء لان الحراره تزيد من هيجان الشتله وتنتج اكثر من الضعف تقريبا

واللي مايخطي مايتعلم .. ولكن كمشروع مكلف ما انصحك تدخله الا بوجود مهندس خبره اكثر من الدراسه او يكون عندك اللمام قوي بالصنعه ..
بالتوفيق لك