اليوم حابه انقلكم تجارب ومشاريع زوج صديقتي
لكن والله مااعرف الحكم من الناحيه الشرعيه الظاهر انها جائزه لكن انا اوسوس عشان كذا تأكدوا ماعدا مشروع الليموزين

ماعلينا


اول شي طلع ليموزين عن طريق بنك التسليف
وخلال سنه الظاهر صارت عنده
وعلى كلامها انو يطلع منها شهريا بحدود ال17 الف ريال
وانا صدقتها لان زباينه كلهم بنااااات
لانو كبير بالسن بحدود ال50 عمره
بعضهم التزام يعني شهريا زي الموظفات
وبعضهم لا
بس مشاويررهم ماتخلص كل يووم وباليوم اكثر من مره
وشوفوا كم تدفع ع المشوار
الي عرفته منها انو يوصل بنات كل خميس لملاهي الشلال ب50 ريال لان بيتهم عند الخط السريع
يعني البنات يدفعوا مايهمهم
غير شغله المفرق بالشوارع خلال اليوم<<مالومه لوطلع ال17 واكثر

هذا اول مشروع


المشروع الثاني شاف حلاق(صالون) للتقبيل وعلى طول اخذه ب15000بكامل معداته واجره على عامل بلي فيه
وصار ياخذ منه 800 ريال شهريا وماله شغل بشي يعني المحل للعامل هوه ماعليه الاياخذ المبلغ الثابت شهريا

نفس الحركه سواها بسيارة نقل عفش الظاهر دينه مدري بكم اشتراها بس موكثير اتذكر انها قالت 20 او24 الف
وسلم العامل كل شي المهم يوصل لجيبته 2500 ريال شهريا
تعرفوا الدينه باليوم تطلع لصاحبها اكثر من 1000 ريال داخل المدينه غير المشاوير الي من مدينه لثانيه
والله مره انا وامي اشترينا كنب وعجزنا نلاقي واحد يشيله كلهم يقولو مشغولين وننتظر لبكره لانهم محجوزين
اخرشي بعد جدال واخذ وعطا لاقينا واحد بالصدفه والله بيتنا موبعيد عن السوق يمكن 10 دقايق واخذ 50 ريال


ونفس الحركه سواها بكفتريا تقبلها ب12000 الف بكامل معداتها وياخذ شهريا 700 ريال


طبعا هالمشاريع ماسواها دفعه وحده بين كل مشروع والثاني شهور ويمكن سنه

ماشاءالله عليه الله يديه الصحه والعافيه

اتمنى اكون قدمت شي لخواني الشباب وترى حتى انتو يابنات تقدروا تنفذوها ماعدا التاكسي ههههه
احتاج دعواتكم عندي نتايج اشعه مهمه دعواتكم تطلع سليمه

يعطيك العافيه ولكن لي تحفظ على الطريقه هذي

وهذا سبب لدمار اقتصادنا لو كل الناس فكرت بالتفكير هذا

الله يعطيك العافية
ماشاء الله عليه والله لايظره
بس أحس الإجار الشهر ألي يا خذه قليل جدا
فمثلاً الحلاق بس ياخذ منه 800 ريال
ترى الحلاق يطلع الـ800 في يومين ولا عاد في الأعياد تشوف تقعد فوق الساعة تنتظر دورك علشان يجي وعاد حلاقه شعر ودقن و.....و....إلخ

صحيح كلام اخواني هذا دمار لإقتصادنا

الله يوفقه ويسعده في ما يرضي الله

ويوفق الجميع

كيف يعني دمار؟

مافهمت

طالما الموضوع غير مفيد وبيجيب نتايج عكسيه اتمنى حذفه
وياليت اعرف ووش قصدكم بكلمة دمار؟
قصدكم العماله؟؟
شاكره مرورالجميع

دمار الاقتصاد يعني العامل ابو 1000 ريال بدال ما يحول 600 كل شهر لبلده على حساب جيوبنا

يصير يحول 6000 كل شهر على حساب اقتصادنا

يعني بدال مالعشره مليون يحولوا 6 مليار كل شهر يحولوها 60 مليار كل شهر

يعني المبلغ هذي بدل ما نستفيد منه في البناء داخل بلدنا يستفيدوا منها في البناء داخل بلدانهم

زيه زي الاستيراد من برى واتلافه بالاستخدام زيه زي السياحه برى ورمي فلوس البلد لتطوير سياحة البلدان غير بلدنا

بعطيك مثال مختصر

لو قلنا ان رب منزل راتبه 10 الاف

هوه حاط رجل على رجل وعنده سواق ماسك المفتاح ويمشوره للمكان الي يريد مقابل 1000 ريال
وزوجته حاطه رجل على رجل وعندها خدامه ماسكه المطبخ وتطبخ الي يريدون مقابل 1000 ريال
وعنده اربع عيال كل واحد منهم ياخذ الف ريال ويباشر فيها على الشباب برى ويطيروا 4000 ريال
والعايله تشتري من البقاله اغراض الشهر وتشتري من المطاعم وتتمشى بما يعادل 4000 ريال

وطارت العشره الاف ريال

وفي المقابل يتسلف ويصير عليه مديونيه ما بين سلف من الناس وقروض بنكيه

بعكسه تمام لو كان الاب والام والاولاد منتجين لجل بناء بيتهم الي هي حياتهم كم راح يكون التخفيف من الاستهلاك والارتفاع في الانتاج

بس دام الموظفين عقليتهم بايزه وما ياكلها الا العاطلين الطفرانين الكحيانين فلا مانع من العيش على حساب البلد لان مو معقول المنتف الكحيان يهتم بالمبدأ ويحمل هم البلد والي منعم عليه ربي يبادر بالكفران والجحود ويقول في ستين داهيه يا بلد والكل يصفر له ويصفق

بالنسبه لليموزين فما جربت ليموزين بس جربت بسيارتي الخاصه والدخل الصافي غير التكاليف بنزين وصيانه قريب من 20 الف شهريا وإذا طاح وكنت كسول او في منطقه قليل فيها الركاب يكون الصباح حق ساعتين ثلاث يطلع منها من 70 الى 100 ريال واحيان تاصل 300 ريال ومن العصر لقرب العشا فوق 100 ريال واحيان بعض المشاوير من 600 الى 800 ريال وبعض الايام تتجاوز الالف ونص وتاصل الى الالفين احيان خاصه المواسم

طريقة الكداده في حساب تكلفة المشاوير ريال واحد لكل كيلو يعني 100 كيلو بمية ريال يروح منها بنزين من 5 الى 15 ريال بحسب السياره والباقي حق تعب المشوار على الكداد وعلى السياره وإذا كان الركاب مجموعه ينعمل قسمه للقيمه بينهم

يعني مشوار 600 كيلو بـ 600 ريال والركاب خمسه يتم التقسيم عليهم يطلع كل واحد 120 ريال وإذا كان واحد يدفع حق المشوار 600 ريال او ينتظر حتى يجي معاه ركاب

بالنسبه للدينات ما استخدمتها الا مره وحده في موسم التمر نقلت حمله تكلفتها من المزرعه 800 ريال في نص الليل وطوال النهار بيع الى المغرب وكان المكسب حدود 5000 ريال غير سيارتي وسيارة واحد من الشباب كل وحده طلعت صافي حدود 2000 ريال وكان في بداية الموسم لان في نهاية الموسم عرضه للخساره فكل واحد يحط في باله اغتنام الفرص لاي منتج وهي تجربه وحيده في التمر ايام الثانوي اخذت انا واحد من اخواني عليه الفلوس وعلي التصريف انتاج 80 نخله بـ 7000 ريال بعنا انتاج 20 نخله بصافي غير تكاليف الشحن 30 الف ريال خلال خمس ايام وباقي انتاج 60 نخله باعه من المزرعه بـ 10 الاف ريال يعني المكسب حدود الثلاثين في اسبوع

جيت مره ثانيه قلت بجرب انا واحد من الشباب وحجزت رطب في النخل بـ 6 الاف ريال وكان صاحب المزرعه قريب وقام يتفلسف يقول لا تبيعوا في البدايه عشان ما تخسروا قلنا نسمع نصيحته دامه مزارع وله خبره ويوم صار رطب صفيناه في كراتين ونزلنا فيه في السوق ما احد التفت فيه قلت لخويي اصبر وكان عجول وقال نطلع من السوق ونروح سوق ثاني ويضل في كل سوق حق 10 دقايق ويطفش وفي النهايه اخذت التمر وحشيته في تنك اعطيته نص الكميه وبعت نصيبي في كم يوم بضعف التكلفه وسألته وش صار معك قال والله فتحته للغنم وما بعت ولا تنكه

يمكن تحطم وما كان عنده ثقه في المكسب لان الاقناع من عندي وتلاشت قناعاته بقناعات ان مافي مكسب فما باع شي

لا تتحطمي يا شهوده فالصواب ان ما يسلم في ايادي العماله شي لانها مو بس تنصب على مواطن الا تنصب على وطن بحاله

غريب الاوطان الله يسعدك ويوفقك بصراحه كفيت ووفيت
هذا الي فهمته من ردود الاعضاء بس قلت اتأكد
قلت لوقصدهم كذا بيكونوا مثاليين صراحه لانو كثير ناس بيشتغلو كذا وماوقفت علىعاطل والامحتاج والاكحيان مثل ماذكرت بموضوعك
وانت قلتها بنفسك ((مو معقول المنتف الكحيان يهتم بالمبدأ ويحمل هم البلد والي منعم عليه ربي يبادر بالكفران والجحود ويقول في ستين داهيه يا بلد والكل يصفر له ويصفق ))
ولكن نرجع ونقول كلن يعمل بأصله وهالنقطه لفتو انتباهي لها جزاكم الله خير